ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ວັນທີ 12 ມິຖຸນາ 2024 ນີ້, ແຂວງເຊກອງ ຈັດກອງປະຊຸມເຜີຍແຜ່, ເຊື່ອມຊຶມຂໍ້ຕົກລົງວ່າດ້ວຍການສະສາງລົດລັດ ແລະ ນິຕິກຳກ່ຽວຂ້ອງ ໂດຍມີທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ, ຫົວໜ້າຄະນະຊີ້ນຳການສະສາງລົດຂອງລັດຂັ້ນແຂວງ, ທ່ານ ຈັນທະພອນ ແກ້ວມາລາວົງ ຫົວໜ້າກົມບໍລິຫານ, ພິທີ ການ ແລະ ການເງິນ ຫ້ອງການສຳນັກງານນາຍົກລັດຖະມົນຕີ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຈັນທະພອນ ແກ້ວມາລາວົງ ກ່າວວ່າ: ຂໍ້ຕົກລົງທ່ານນາຍົກລັດຖະມົນຕີສະບັບເລກທີ169/ນຍ ທີ່ນຳມາເຜີຍແຜ່, ເຊື່ອມຊຶມຄັ້ງນີ້ປະກອບມີ 5 ໝວດ,12 ມາດຕາ,ເຊິ່ງເນື້ອໃນໄດ້ກຳນົດເຖິງຫຼັກການໃນການສະສາງ ແລະຖອນຄືນ;ເປົ້າໝາຍການສະສາງລົດຂອງລັດ;ເງື່ອນໄຂຂອງພະນັກງານບຳນານ, ພະນັກງານປະຈຳການຂັ້ນສູນກາງແລະທ້ອງຖິ່ນ;ການຕີມູນຄ່າ,ການຊຳລະເງິນແລະຖອນຄືນປະເພດຂອງລົດເຊັ່ນ:ລົດຈິບ,ກະບະ,ລົດຕູ້,ລົດເກັງ,ລົດຈັກ ລວມເຖິງຂັ້ນຕອນການສະສາງ,ເຊິ່ງໃນຂໍ້ຕົກລົງໄດ້ກຳນົດຫຼັກການ,ລະບຽບການ,ເປົ້າໝາຍ,ເງື່ອນໄຂ,ຂັ້ນຕອນການສະສາງ,ການຖອນຄືນລົດຂອງລັດ ເພື່ອເປັນບ່ອນອີງໃຫ້ແກ່ບັນດາກະຊວງ,ອົງການ ແລະອົງການປົກຄອງທ້ອງຖິ່ນ ແນໃສ່ຫັນກຳມະສິດລົດຂອງລັດທີ່ພະນັກງານໄດ້ນຳໃຊ້ໃນປັດຈຸບັນໃຫ້ຂາດຕົວ,ແກ້ໄຂບັນຫາບຸກຄົນ,ນິຕິບຸກຄົນຫຼືການຈັດຕັ້ງທີ່ບໍ່ນອນໃນການຈັດຕັ້ງຂອງລັດ,ແຕ່ນຳໃຊ້ລົດຂອງລັດພ້ອມນັ້ນຜູ້ເຂົ້າຮ່ວມ ຍັງໄດ້ຮັບຟັງແຈ້ງການທ່ານລັດຖະມົນຕີກະຊວງການເງິນ ສະບັບເລກທີ 589/ກງ, ລົງວັນທີ 15 ກຸມພາ 2024 ວ່າດ້ວຍການຈັດຕັ້ງປະຕິບັດຂໍ້ຕົກລົງວ່າດ້ວຍການສະສາງລົດຂອງລັດສະບັບເລກທີ169/ນຍ, ຄູ່ມືການຄຸ້ມຄອງການສະສາງລົດຂອງລັດ ແລະ ນິຕິກຳທີ່ກ່ຽວຂ້ອງຕື່ມອີກ.
ໂອກາດດຽວກັນ,ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ,ຫົວໜ້າຄະນະຊີ້ນຳລວມການສະສາງລົດຂອງລັດຂັ້ນແຂວງມີຄຳເຫັນວ່າ: ວຽກງານການຄຸ້ມຄອງ ແລະ ນຳໃຊ້ລົດຂອງລັດ ຢູ່ແຂວງເຊກອງໃນໄລຍະຜ່ານມາ ເຫັນວ່າພົບຄວາມຫຍຸ້ງ ຍາກ ແລະ ການຄຸ້ມຄອງຍັງບໍ່ທັນຄົບຖ້ວນຕາມທີ່ກົດໝາຍວ່າດ້ວຍຊັບສິນຂອງລັດ ແລະ ດຳລັດວ່າດ້ວຍລົດຂອງລັດໄດ້ກຳນົດໄວ້, ສະນັ້ນ ເພື່ອເປັນການກະກຽມໃຫ້ແກ່ການກວດກາ, ຈັດສັນ, ດຸ່ນດ່ຽງ ການນຳໃຊ້ລົດຂອງລັດ ໃນແຕ່ລະບາດກ້າວໃຫ້ຖືກຕຕ້ອງຕາມເປົ້າໝາຍ ແລະ ລະບຽບການ ສະນັ້ນ,ຮຽກຮ້ອງທຸກພາກສ່ວນ ເປັນເຈົ້າການຜັນຂະຫຍາຍ ແລະ ຈັດຕັ້ງປະຕິບັດໃຫ້ເຂົ້າສູ່ລວງເລີກ ແລະ ເຂົ້າສູ່ວຽກງານຕົວຈີງ,ນຳເອົາເນື້ອໃນຈິດໃຈ ນຳໄປຈັດຕັ້ງປະຕິບັດ ເປັນຕົ້ນ ການປະກອບເອກະສານ, ການຊຳລະເງິນຈາກການສະສາງເຂົ້າງົບປະມານແຫ່ງລັດ, ການປົດປ້າຍທະບຽນ ພ້ອມທັງເຜີຍແຜ່ໃຫ້ການຈັດຕັ້ງທີ່ຕົນສັງກັດ ແລະ ພະນັກງານຜູ້ນຳໃຊ້ລົດຂອງລັດໄດ້ຮັບຮູ້, ເຂົ້າໃຈ ເພື່ອຮັບ ປະກັນການຈັດຕັ້ງປະຕິບັດຂໍ້ຕົກລົງຂອງນາຍົກ ລັດຖະມົນຕີ ວ່າດ້ວຍການສະສາງລົດຂອງລັດ ສະບັບນີ້ ຢ່າງມີປະສິດທິຜົນສູງ.
ຂ່າວ: ບູ້ສຸວັນ.