ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີ ເຊັນບົດບັນທືກຄວາມເຂົ້າໃຈ ລະຫວ່າງຫ້ອງການຄະນະກໍາມະການຄຸ້ມຄອງແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ ແລະ ອົງການເພື່ອມະນຸດສະທໍາ ແລະ ການມີສ່ວນຮ່ວມປະຈໍາລາວ ສຳລັບໂຄງການຊ່ວຍເຫຼືອ ຜູ້ຖືກເຄາະຮ້າຍແບບເຊື່ອມສານ ແລະ ສົ່ງເສີມຄວາມປອດໄພຈາກລະເບີດບໍ່ທັນແຕກ ທີ່ຕົກຄ້າງຢູ່ແຂວງຜົ້ງສາລີ ຈັດຂື້ນໃນຕອນເຊົ້າວັນທີ 19 ທັນວາ 2023 ທີ່ໂຮງແຮມລາວພລາຊາ ນະຄອນຫຼວງວຽງຈັນ ຝ່າຍລາວ ນໍາໂດຍທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ, ຝ່າຍຜູ້ໃຫ້ທືນ ນໍາໂດຍ ທ່ານ ເຣເນຍ ຄາຣາໄບ ຫົວໜ້າອົງການເພື່ອມະນຸດສະທໍາ ແລະ ການມີສ່ວນຮ່ວມປະຈໍາລາວ ມີຜູ້ຕາງໜ້າຈາກກົມນະໂຍບາຍຜູ້ມີຜົນງານ ຜູ້ຕາງໜ້າຈາກຫ້ອງວ່າການແຂວງ ຜົ້ງສາລີ, ຮອງເຈົ້າເມືອງຂວາ ແລະ ເມືອງໃໝ່ແຂວງຜົ້ງສາລີ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ຈຸດປະສົງຂອງການເຊັນ ບົດບັນທືກຄວາມເຂົ້າໃຈໃນຄັ້ງນີ້ ແມ່ນເພື່ອສົ່ງເສີມປະສິດທິພາບວຽກງານແກ້ໄຂບັນຫາລະເບີດບໍທັນແຕກ ຜ່ານການຈັດຕັ້ງປະຕິບັດແບບເຊື່ອມສານ ຢູ່ແຂວງຜົ້ງສາລິ ແລະ ປະກອບສວ່ນເຂົ້າໃນການພັດທະນາແບບຍືນຍົງ ສົ່ງເສີມເສດຖະກິດແບບມີສ່ວນຮ່ວມ ແລະສົ່ງເສີມການດໍາລົງຊີວິດທີ່ປອດໄພຈາກລະເບີດບໍ່ທັນແຕກທີ່ຕົກຄ້າງໃນລາວ.
ທ່ານ ໂຈມແຍງ ແພງທອງສະຫວັດ ຫົວໜ້າຫ້ອງການຄະນະກໍາມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ລາວ ໃຫ້ຮູ້ວ່າ : ລາວ ເປັນປະເທດໜື່ງທີ່ໄດ້ຮັບຜົນກະທົບຈາກລະເບີດບໍ່ທັນແຕກໜັກກວ່າປະເທດອື່ນໆ ຖ້າທຽບໃສ່ຈໍານວນປະຊາກອນ ເນື່ອງຈາກໃນລະຫວ່າງສົງຄາມອິນດູຈີນ ແຕ່ປີ1964 – 1973 ໄດ້ມີເຮືອບິນ ນໍາເອົາງລະເບີດ ມາຖິ້ມໃສ່ດິນແດນຂອງລາວຈໍານວນ 580.000ຖ້ຽວ ຕະຫຼອດ ເວລາ 9 ປີ ແລະ ມີລະເບີດຖິ້ມໃສ່ 270 ລ້ານໜ່ວຍ ໃນນັ້ນບົມໃຫ່ຍປະມານ 4 ລ້ານໜ່ວຍ, ຄາດວ່າ30% ຍັງເປັນລະເບີດຕົກຄ້າງ ເຊິ່ງເປັນໄພອັນຕະລາຍແລະສົ່ງຜົນກະທົບຢ່າງໜັກ ຕໍ່ຊີວິດການເປັນຢູ່ ຂອງປະຊາຊົນ ແລະ ການສ້າງສາພັດທະນາປະເທດຊາດ. ໃນນັ້ນແຂວງຜົ້ງສາລີກໍແມ່ນແຂວງໜຶ່ງ ທີ່ໄດ້ຮັບຜົນກະທົບຈາກໄພພິບັດນີ້
ນັບແຕ່ປີ 1975 ມາຮອດປະຈຸບັນ ປະຊາຊົນລາວໄດ້ຮັບເຄາຮ້າຍຈາກລູກລະເບີດເຫລົ່ານີ້ ປະມານ 19.250ຄົນ, ມີຜູ້ໄດ້ຮັບບາດເຈັບ 9.347ຄົນ, ເສຍຊີວິດ 9.797ຄົນ, ນັບແຕ່ປີ 2008 ມາຮອດປະຈັນ ແຂວງຜົ້ງສາລີມີອຸປະຕິເຫດເກີດຂຶ້ນຍ້ອນລະເບີດຕົກຄ້າງ 25ກໍລະນີ ມີຜູ້ຖືກເຄາະຮ້າຍທັງໝົດ 31ຄົນ, ໄດ້ຮັບບາດເຈັບ 15ຄົນ, ເສຍຊີວິດ16ຄົນ.
ໂຄງການຊ່ວຍເຫຼືອ ຜູ້ຖືກເຄາະຮ້າຍແບບເຊື່ອມສານ ແລະ ສົ່ງເສີມຄວາມປອດໄພຈາກລະເບີດບໍ່ທັນແຕກ ທີ່ຕົກຄ້າງຢູ່ແຂວງຜົ້ງສາລີ ໄດ້ຮັບທືນສະໜັບສະໜູນຈາກກະຊວງການຕ່າງປະເທດ ນອກແວໃນມູນຄ່າ 618.750 ເອິໂຣ ໂດຍໄລຍະເວລາຈັດຕັ້ງປະຕິບັດນັບແຕ່ນີ້ ໄປຈົນຮອດວັນທີ 31 ທັນວາ 2024 .