ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເຊັນສັນຍາສະໜອງທຶນໃຫ້ທະນາຄານທຸລະກິດ ແລະ ສະຖາບັນການເງິນຈຸລະພາກ ເພື່ອນໍາໄປສະໜອງສິນເຊື່ອໃຫ້ຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ
ໃນຕອນເຊົ້າຂອງວັນທີ 28 ທັນວາ 2023 ກອງທຶນສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ທສວ) ໄດ້ຈັດກອງປະຊຸມສະໄໝສາມັນຄັ້ງທີ II ຂອງສະພາບໍລິຫານກອງທຶນສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ ຂຶ້ນທີ່ໂຮງແຮມ ຄຣາວພາຊາ ວຽງຈັນ ໂດຍການເປັນປະທານຂອງທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ, ປະທານສະພາບໍລິຫານ ທສວ ໂດຍມີສະມາຊິກສະພາບໍລິຫານ ແລະ ກອງເລຂາ ທສວ ກໍ່ໄດ້ເຂົ້າຮ່ວມລວມທັງໝົດ 21 ທ່ານ. ກອງປະຊຸມໃນຄັ້ງນີ້ ແມ່ນຈັດຂຶ້ນເປັນຄັ້ງທີສອງ ຂອງສະມາຊິກສະພາບໍລິຫານ ທສວ ຊຸດໃໝ່,ຈຸດປະສົງຂອງກອງປະຊຸມແມ່ນ ເພື່ອລາຍງານຄວາມຄືບໜ້າການຈັດຕັ້ງປະຕິບັດຜົນກອງປະຊຸມສະໄໝສາມັນ ຄັ້ງທີ Iຜ່ານມາ ແລະ ແຜນວຽກຈຸດສຸມໃນປີຕໍ່ໜ້າ ພ້ອມທັງພິຈາລະນາຮັບຮອງ ແລະ ຂໍທິດຊີ້ນໍາ ຈາກຄະນະສະພາບໍລິຫານ ໃນບາງວຽກງານດັ່ງລຸ່ມນີ້:
1. ພິຈາລະນາຮັບຮອງການຈັດຕັ້ງປະຕິບັດວຽກງານປະຈຳປີ2023 ແລະ ທິດທາງແຜນການເຄື່ອນໄຫວວຽກງານປີ 2024;
2. ພິຈາລະນາຮັບຮອງແຜນງົບປະມານ ປະຈຳປີ 2024 ບ້ວງເງິນປະກອບຂອງລັດຖະບານ;
3. ພິຈາລະນາຮັບຮອງຜົນການຄັດເລືອກ ສະຖາບັນການເງິນ ແລະ ຈນກ ດີເດັ່ນ ໃນການນຳໃຊ້ທຶນຂອງ ທສວ ປະຈຳປີ 2023;
4. ສະເໜີຂໍທິດຊີ້ນຳ ການຈັດສັນທຶນບ້ວງເງິນປະກອບທຶນຂອງລັດຖະບານ ແລະ ບ້ວງສະສົມຂອງ ທສວ ປະຈຳປີ 2024 ໃຫ້ສະຖາບັນການເງິນ;
5. ສະເໜີຂໍທິດຊີ້ນຳ ເພີ່ມງົບປະມານຈາກ 30 ລ້ານກີບ ເປັນ 50 ລ້ານກີບ ຂອງບ້ວງບູລິມະສິດສຳລັບ 18 ແຂວງ;
6. ສະເໜີຂໍທິດຊີ້ນຳຈັດຈ້າງພະນັກງານຜູ້ຊ່ວຍວຽກສິນເຊື່ອ.
ນອກຈາກນີ້, ທສວ ຍັງໄດ້ຈັດພິທີສະໜອງທຶນລະຫວ່າງ ທສວ ແລະ ທະນາຄານທຸລະກິດ ແລະ ສະຖາບັນການເງິນຈຸລະພາກ ເພື່ອນໍາໄປສະໜອງສິນເຊື່ອໃຫ້ຈຸນລະວິສາຫະກິດ, ວິສາຫະກິດຂະໜາດນ້ອຍແລະກາງ (ຈນກ).ໃນນັ້ນ, ບ້ວງເງິນປະກອບທຶນຂອງລັດຖະບານໃຫ້ ທສວ ປະຈໍາ 6 ເດືອນທ້າຍປີ 2023 ຈຳນວນ 91 ຕື້ກີບໃຫ້ 6 ທະນາຄານທຸລະກິດ ຄື: 1). ທະນາຄານພັດທະນາລາວ ມູນຄ່າ 20 ຕື້ກີບ, 2). ທະນາຄານໄຊງ່ອນເທືອງຕິ່ນລາວ ມູນຄ່າ 15 ຕື້ກີບ, 3). ທະນາຄານຮ່ວມທຸລະກິດລາວ-ຫວຽດ ມູນຄ່າ 15 ຕື້ກີບ, 4). ທະນາຄານມາຣູຮານເຈແປນລາວມູນຄ່າ 10 ຕື້ກີບ, 5). ທະນາຄານຫວຽດຕິນລາວ ມູນຄ່າ 20 ຕື້ກີບ ແລະ 6). ທະນາຄານການຄ້າຕ່າງປະເທດລາວມູນຄ່າ 11 ຕື້ກີບ.
ນອກຈານີ້ ຍັງມີບ້ວງເງິນໂຄງການເຂົ້າເຖິງແຫຼ່ງທຶນຂອງຈຸນລະວິສາຫະກິດ, ວິສາຫະກິດຂະໜາດນ້ອຍແລະກາງເພື່ອຮັບມືກັບຜົນກະທົບ ແລະ ຟື້ນຟູຈາກໂຄວິດ-19 (MSME A2F-ESR) ຈຳນວນ 24,6 ຕື້ກີບ ໃຫ້ 2 ທະນາຄານຄື: ທະນາຄານຮ່ວມທຸລະກິດ ລາວຫວຽດ ມູນຄ່າ 1,98 ຕື້ກີບ ແລະ ທະນາຄານຫວຽດຕິນລາວ ມູນຄ່າ 22,62 ຕື້ກີບ
ພ້ອມນີ້ ຍັງມີບ້ວງເງິນສະສົມຂອງ ທສວ ຈຳນວນ 2,29 ຕື້ກີບ ໃຫ້ 3 ສະຖາບັນການເງິນຈຸລະພາກ ຄື: 1). ສະຖາບັນການເງິນຈຸລະພາກທີ່ຮັບຝາກເງິນ ຈໍາປາລາວ ມູນຄ່າ 792 ລ້ານກີບ, 2). ສະຖາບັນການເງິນຈຸລະພາກທີ່ບໍ່ຮັບຝາກເງິນ ສົມບູນຊັບ ມູນຄ່າ 500 ລ້ານກີບ ແລະ 4).ສະຖາບັນການເງິນຈຸລະພາກທີ່ບໍ່ຮັບຝາກເງິນ ໄຊຍະວົງແສງ ມູນຄ່າ 01 ຕື້ກີບ.
ເຂົ້າຮ່ວມເປັນສັກຂີພະຍານໃນພິທີເຊັນສັນຍາຄັ້ງນີ້ໂດຍແມ່ນ ທ່ານ ມະໄລທອງກົມມະສິດ, ລັດຖະມົນຕີກະຊວງອຸດສາຫະກໍາແລະການຄ້າ, ປະທານສະພາບໍລິຫານທສວ, ສະມາຊິກສະພາບໍລິຫານ ທສວ, ບັນດາສະຖາບັນການເງິນທີ່ເຊັນສັນຍາຄັ້ງນີ້ ແລະ ກອງເລຂາ ທສວ.