ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີເຊັນສັນຍາສໍາປະທານເຂື່ອນນໍ້າຮຸ່ງ1 ສະບັບປັບປຸງ, ຈັດຂຶ້ນໃນຕອນແລງຂອງວັນທີ 23 ພຶດສະພາ 2024 ນີ້, ທີ່ຫ້ອງປະຊຸມພະແນກແຜນການ ແລະ ການລົງທຶນແຂວງໄຊຍະບູລີ, ລະຫວ່າງພະແນກແຜນການ ແລະ ການລົງທຶນແຂວງ ຕາງໜ້າອົງການປົກຄອງແຂວງໄຊຍະບູລີ ກັບ ບໍລິສັດນໍ້າຮຸ່ງ1 ໄຮໂດຣພາວເວີຈໍາກັດ, ເປັນກຽດເຂົ້າຮ່ວມ ຂອງທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ ຜູ້ຊີ້ນໍາວຽກງານຂົງເຂດເສດຖະກິດ, ມີຫົວໜ້າ – ຮອງຫົວໜ້າພະແນກການທີ່ກ່ຽວຂ້ອງພ້ອມດ້ວຍ ວິຊາການທັງຝ່າຍເຂົ້າຮ່ວມ.
ທ່ານ ໄຊພອນ ບຸນຊູ ຮອງຫົວໜ້າພະແນກ ພະລັງງານ ແລະ ບໍ່ແຮ່ແຂວງໄຊຍະບູລີ ກ່າວວ່າ: ໂຄງການໄຟຟ້ານໍ້າຕົກຂະໜາດນ້ອຍນໍ້າຮຸ່ງ1 ເປັນໂຄງການແຫ່ງທໍາອິດທີ່ໄດ້ຮັບອານຸຍາດຂັ້ນແຂວງ, ມີກໍາລັງຕິດຕັ້ງ 15 MW ກໍງລັງຜະລິດໄຟຟ້າ 87,28 GWH / ປີ, ມູນຄ່າການລົງທຶນ 49,10 ລ້ານ USD ໄດ້ເຊັນບົດບັນທຶກຄວາມເຂົ້າໃຈ ຫຼື MOU ກັບແຂວງໄຊຍະບູລີ ຄັ້ງວັນ ທີ 10 ພຶດສະພາ 2010 ໃນກໍາລັງຕິດຕັ້ງ 12,5 MW ,ໃນປີ 2015 ບໍລິສັດໂຄງການ ໄດ້ສະເໜີສຶກສາຄວາມເປັນໄປໄດ້ຂອງໂຄງການ ໃນການຍົກກໍາລັງຕິດຕັ້ງ 12,5 MW ໄດ້ເລີ່ມດໍາເນີນການກໍ່ສ້າງໂຄງການຕົວຈິງໃນປີ 2018 ແລະ ໄດ້ເປີດຂາຍໄຟຟ້າຢ່າງເປັນທາງການ ໃນວັນທີ 20 ກັນຍາ 2023, ເຫດຜົນຂອງການປັບປຸງສັນຍາສໍາປະທານໂຄງການ ແມ່ນຍ້ອນຍົກກໍາລັງຕິດຕັ້ງຈາກ 12,5 MW ຂື້ນເປັນ 15 MW ແລະ ໂຄງການດັ່ງກ່າວ ເປັນການດໍາເນີນທຸລະກິດຜະລິດໄຟຟ້າສະເພາະ ຕາມທີ່ໄດ້ກໍານົດໄວ້ໃນມາດຕາ 42 ຂອງກົດໝາຍວ່າດ້ວຍໄຟຟ້າ ສະບັບປັບປຸງ ປີ 2017 ທີ່ຈະຕ້ອງໄດ້ຮັບສໍາປະທານຈາກລັດ ເຊິ່ງດໍາເນີນກິດຈະການກ່ຽວກັບ ການຜະລິດໄຟ້າ ຫຼື ທັງຜະລິດ ແລະ ສົ່ງໄຟຟ້າໄປຄຽງຄູ່ກັນ, ສັນຍາຄຸ້ມຄອງສະບັບເດີມ ເຫັນວ່າຍັງບໍ່ໄດ້ກໍານົດລະອຽດຈະແຈ້ງ ບໍ່ຮັດກຸມເທົ່າທີ່ຄວນ ເຮັດໃຫ້ພົບບັນຫາຂອດການຈັດຕັ້ງປະຕິບັດພົບຄວາມຫຍຸ້ງຍາກ, ບໍ່ສອດຄ່ອງກັບລະບຽບກົດໝາຍຂອງ ສປປ ລາວ ເປັນຕົ້ນ ກົດໝາຍວ່າດ້ວຍໄຟຟ້າສະບັບປັບປຸງປີ 2017 ເຊັ່ນ: ການກໍານົດຮູບແບບທຸລະກິດຜະລິດໄຟຟ້າສະເພາະ, ການກໍານົດອານຸສັນຍາໂຄງການ, ມື້ສໍາເລັດການກໍ່ສ້າງໂຄງການ, ມື້ເປີດຂາຍໄຟຟ້າຢ່າງເປັນທາງການ, ການກໍານົດລະອຽດກ່ຽວກັບສິດ ແລະ ພັນທະຂອງບໍລິສັດລົງທຶນ ຫຼື ບໍລິສັດໂຄງການ ແລະ ຂອງອົງການປົກຄອງແຂວງ, ຜົນປະໂຫຍດຂອງແຂວງ, ກົນໄກການປັບໃໝ ແລະ ອື່ນໆ, ມີການໂອນກິດຈະການໂຄງການໄຟຟ້ານໍ້າຮຸ່ງ1 ຈາກບໍລິສັດ ເອັດເອັມຈິ ກຣຸບ ຈໍາກັບຜູ້ດຽວ( ຜູ້ໂອນກິດຈະການ) ກັບບໍລິສັດເອກະໄຊໂຊກ ຈໍາກັດຜູ້ດຽວ( ຜູ້ຮັບໂອນຮຸ້ນ) ໃນຈໍານວນ 17,420,000 ຮຸ້ນ (ຮຸ້ນລະ 50,000 ກີບ) ມູນຄ່າໂອນຫຸ້ນທັງໝົດ 16,500,000 ໂດລາສະຫະລັດ, ມູນຄ່າການລົງທຶນທັງໝົດ ໄດ້ເພິ່ມຂື້ນຈາກ 34 ລ້ານໂດລາສະຫະລັດເປັນ 49,10 ລ້ານໂດລາສະຫະລັດ ແລະບັນຫາອື່ນໆ.
ຈາກນັ້ນ ທ່ານ ຄໍາເຫຼັກ ແກ້ວວິໄລພອນ ຫົວໜ້າພະແນກ ແຜນການ ແລະ ການລົງທຶນແຂວງ ທ່ານ ຄໍາເພັດ ພົມມະລາດ ຫົວໜ້າພະແນກພະລັງງານ ແລະ ບໍ່ແຮ່, ທ່ານ ສີສຸວົງ ດວງພະຈັນ ຜູ້ອໍານວຍການບໍລິສັດນໍ້າຮຸ່ງ ໄຮໂດຣພາວເວີຈໍາກັດ ໄດ້ຮ່ວມກັນເຊັນສັນຍາສໍາປະທານ ໂຄງການເຂື່ອນໄຟຟ້ານໍ້າຮຸ່ງ1 ສະບັບປັບປຸງ ຢ່າງເປັນທາງການ, ໂດຍຊ້ອງໜ້າ ທ່ານ ສົມຈິດ ຈັນທະວົງ ຮອງເຈົ້າແຂວງໄຊຍະບູລີ , ພ້ອມດ້ວຍແຂກທີ່ເຂົ້າຮ່ວມ ເປັນສັກຂີພີຍານ.
ຂ່າວ+ພາບ: ບຸນທີ