ເຊັນສັນຍາຮັບເໝົາກໍ່ສ້າງ ໂຄງການປ້ອງກັນຕາຝັ່ງເຈື່ອນ ຊ່ວງທີ 2 ແຕ່ບ້ານດອນສະຫວັນ ຫາ ບ້ານດ່ານຖິ່ນ ແລະ ໂຄງການປ້ອງກັນຕາຝັ່ງເຈື່ອນ ຊ່ວງທີ 3 ຢູ່ບ້ານດ່ານຖິ່ນ ເມືອງຫ້ວຍຊາຍ ແຂວງບໍ່ແກ້ວ ລະຫວ່າງ ອົງການປົກຄອງແຂວງ, ຕ່າງໜ້າພະແນກໂຍທາທິການ ແລະ ຂົນສົ່ງແຂວງ ກັບ ບໍລິສັດ ເຮືອງປະເສີດ ກໍ່ສ້າງສ້ອມແປງເຄຫາສະຖານ ແລະ ຂົວທາງຈໍາກັດຜູ້ດຽວ, ພິທີແມ່ນໄດ້ຈັດຂຶ້ນໃນວັນທີ 27 ກັນຍາ 2024 ຢູ່ທີ່ພະແນກໂຍທາທິການແລະ ຂົນສົ່ງແຂວງ, ໃຫ້ກຽດເຂົ້າຮ່ວມມີ ທ່ານ ທອງຈັນ ມະນີໄຊ ເຈົ້າແຂວງບໍ່ແກ້ວ, ທ່ານ ເຄື່ອນເພັດ ວົງຈັນ ຮອງເຈົ້າແຂວງບໍ່ແກ້ວ, ມີທ່ານ ເຈົ້າເມືອງຫ້ວຍຊາຍ, ຫົວໜ້າພະແນກການ, ປະທານບໍລິສັດ ແລະ ພະນັກງານວິຊາການທີ່ກ່ຽວຂ້ອງ.
ທ່ານ ສົມອົກ ມະນີຈັນ ຮອງຫົວໜ້າ ພະແນກໂຍທາທິການ ແລະ ຂົນສົ່ງແຂວງ ໄດ້ຜ່ານຂໍ້ຕົກລົງ ຂອງທ່ານເຈົ້າແຂວງບໍ່ແກ້ວ ວ່າດ້ວຍການເຫັນດີ ຮັບຮອງເອົາບໍລິສັດ ເຮືອງປະເສີດ ກໍ່ສ້າງສ້ອມແປງ ເຄຫາສະຖານ ແລະ ຂົນສົ່ງຈໍາກັດຜູ້ດຽວ ເປັນຜູ້ຊະນະການປະມູນໂຄງການກໍ່ສ້າງປ້ອງກັນຕາຝັ່ງເຈື່ອນ ບ້ານດອນສະຫວັນ ຫາ ບ້ານດ່ານຖິ່ນ ຊ່ວງທີ່ 2 ມີຄວາມຍາວ 3,300 ແມັດ, ມູນຄ່າ 89,836,520,000 ກີບ ແລະ ໂຄງການກໍ່ສ້າງປ້ອງກັນຕາຝັ່ງເຈື່ອນ ບ້ານດ່ານຖິ່ນ ຊ່ວງທີ່ 3, ມີຄວາມຍາວ 2,669 ແມັດ ໃນມູນຄ່າ 146,321,070,000 ກີບ, ຕ່າງໜ້າອົງການປົກຄອງແຂວງບໍ່ແກ້ວ ເຊັນສັນຍາ ໂດຍແມ່ນ ທ່ານ ວົງເພັດ ສຸຂະວົງ ຮັກສາການ ຫົວໜ້າ ພະແນກໂຍທາທິການ ແລະ ຂົນສົ່ງແຂວງ, ທ່ານ ວັນນະສອນ ເຮືອງປະເສີດ ປະທານບໍລິສັດ ເຮືອງປະເສີດ ກໍ່ສ້າງສ້ອມແປງ ເຄຫາສະຖານ ແລະ ຂົວທາງຈໍາກັດຜູ້ດຽວ ໂດຍການເປັນສັກຂີພະຍານມີ ທ່ານ ທອງຈັນ ມະນີໄຊ ເຈົ້າແຂວງບໍ່ແກ້ວ.ໂຄງການກໍ່ສ້າງປ້ອງກັນຕາຝັ່ງເຈື່ອນ ກໍ່ແມ່ນໂຄງການໜຶ່ງ ເພື່ອພັດທະນາພື້ນຖານໂຄງລ່າງ ທີ່ເປັນການລົງທຶນດ້ວຍງົບປະມານຂອງລັດ ຢູ່ແຂວງບໍ່ແກ້ວ.
ຂ່າວ: ເງິນຫຼົງ ຈິດພູວົງ
