ໂຄງການກໍ່ສ້າງ ອານຸສອນສະຖານບັ້ນຮົບນໍ້າບາກ ເມືອງນ້ຳບາກ ແຂວງຫຼວງພະບາງ ເປັນໂຄງການໜຶ່ງທີ່ມີຄວາມໝາຍສຳຄັນທາງດ້ານການເມືອງ ແລະປະຫວັດສາດຂອງຊາດລາວ ເພື່ອຫວນຄືນມູນເຊື້ອການຕໍ່ສູ້ກູ້ຊາດ ອັນພິລະອາດຫານຂອງນັກຮົບປະຕິວັດ ໃນພາລະກິດຕໍ່ສູ້ປົດປ່ອຍຊາດ ເພື່ອຄວາມຢູ່ເຢັນເປັນສຸກ ຂອງປະຊາບັນດາເຜົ່າໃນປັດຈຸບັນ ເວົ້າສະເພາະ ແມ່ນປະຊາຊົນຊາວແຂວງຫຼວງພະບາງ ເພື່ອສ້າງເປັນແຫຼ່ງທ່ອງທ່ຽວທາງປະຫວັດສາດ ເປັນບ່ອນຮຽນຮູ້ປູກຈິດສຳນຶກໃຫ້ຄົນຮຸ່ນຫຼັງ ເຫັນໄດ້ຄວາມໝາຍຄວາມສໍາຄັນຂອງໂຄງການ. ພັກ-ລັດຖະບານ ກໍ່ຄືການນຳແຂວງຫຼວງພະບາງ ຈຶ່ງໄດ້ຕົກລົງໃຫ້ສໍາຫຼວດ-ອອກແບບ ມີການຮັບຮອງແບບ, ຮັບຮອງລາຄາ ແລະໄດ້ປະເມີນຜົນໂຄງການ, ໂດຍໄດ້ມີການເປີດປະມູນໂຄງການ ເພື່ອຄັດເລືອກເອົາບໍລິສັດທີ່ມີເງື່ອນໄຂຈະມາຮັບເໝົາກໍ່ສ້າງ ໃຫ້ໂຄງການໄດ້ດຳເນີນລົງມືກໍ່ສ້າງ ໃຫ້ສຳເລັດຕາມແຜນການໂດຍໄວ. ພາຍຫຼັງສຳເລັດການປະມູນ ໄດ້ຈັດພິທີເຊັນສັນຍາ ຮັບເໝົາການກໍ່ສ້າງ ໂຄງການກໍ່ສ້າງ ອານຸສອນສະຖານບັ້ນຮົບນໍ້າບາກ ໃນວັນທີ 20 ກັນຍາ 2024 ນີ້, ຢູ່ສະໂມສອນຂອງກອງບັນຊາການທະຫານແຂວງຫຼວງພະບາງ, ໂດຍການຮ່ວມລົງນາມຂອງ ພົນຈັດຕະວາ ສີວິໄຊ ເພັງສັນຕິສຸກ ຫົວໜ້າການເມືອງກອງບັນຊາການທະຫານແຂວງ ແລະທ່ານ ຄໍາຫຼ້າ ດວງພະສຸກ ປະທານບໍລິສັດ ດວງພະສຸກ ກໍ່ສ້າງ ສ້ອມແປງຂົວ-ທາງ, ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ມີທ່ານ ບຸນເລື່ອມ ມະນີວົງ ຮອງເຈົ້າແຂວງຫຼວງພະບາງ ພ້ອມດ້ວຍຄະນະບັນຊາ ກອງບັນຊາການທະຫານແຂວງ, ຜູ້ຕາງໜ້າພະແນກການກ່ຽວຂ້ອງ ແລະ ພະນັກງານວິຊາການທີ່ກ່ຽວຂ້ອງທັງສອງຝ່າຍ ເຂົ້າຮ່ວມເປັນສັກຂີພິຍານ. ເຊີ່ງໂຄງການກໍ່ສ້າງ ອານຸສອນສະຖານບັ້ນຮົບນໍ້າບາກ ເມືອງນ້ຳບາກ ແຂວງຫຼວງພະບາງ ແມ່ນ ບໍລິສັດ ດວງພະສຸກ ກໍ່ສ້າງ ສ້ອມແປງຂົວ-ທາງ, ເຄຫາສະຖານ ແລະ ຊົນລະປະທານ ຈໍາກັດຜູ້ດຽວ ເປັນຜູ້ຮັບເໝົາກໍ່ສ້າງ ໃນມູນຄ່າທັງໝົດ 19 ຕື້ 940 ລ້ານ 8 ແສນກວ່າກີບ, ໂດຍມີການກໍ່ສ້າງເປັນສັນຍາແຕ່ລະໄລຍະ ສະເພາະໄລຍະທີ່ 1 ອົງການປົກຄອງແຂວງ ເຫັນດີໃຫ້ເຊັນສັນຍາກັບຜູ້ຮັບເໝົາ ໃນມູນຄ່າ 4 ຕື້ກີບ ຕາມມະຕິຂອງຄະນະປະຈຳສະພາປະຊາຊົນແຂວງ ວ່າດ້ວຍການຮັບຮອງເອົາ ການສະເໜີຂໍນຳໃຊ້ຮ່ວງເງີນເກີນແຜນ ປີ 2023 ຂອງແຂວງ, ສ່ວນມູນຄ່າຍັງເຫຼືອ ແມ່ນຈະສືບຕໍ່ຈັດຕັ້ງປະຕິບັດ ພາຍຫຼັງລັດຖະບານໄດ້ອະນຸມັດ ຫຼື ມີການຮັບຮອງຈາກສະພາ ໃນການຈັດຕັ້ງປະຕິບັດ.
