ເຊັນສັນຍາຮ່ວມທຶນ ແລະ ມອບສິດ ເຂົ້າຖືຮຸ້ນຕາງໜ້າລັດຖະ ບານລາວ ໃນບໍລິສັດ ຮຸ້ນສ່ວນທ່າເຮືອສາກົນ ລາວ-ຫວຽດນາມ

ໃນວັນທີ 23 ສິງຫາ 2024 ໄດ້ຈັດພິທີລົງນາມເຊັນສັນ ຍາຮ່ວມທຶນ ແລະ ມອບສິດ ໃຫ້ລັດວິສາຫະກິດ ລາວ-ເອເຊຍ ໂທລະຄົມ ເຂົ້າຖືຮຸ້ນຕາງໜ້າລັດຖະບານ ແຫ່ງ ສປປ ລາວ ໃນບໍລິສັດ ຮຸ້ນສ່ວນທ່າເຮືອສາກົນ ລາວ-ຫວຽດນາມ (ທ່າເຮືອຫວຸ້ງອ່າງ 1,2,3 ແຂວງຮ່າຕິ້ງ ສສ ຫວຽດນາມ) ໂດຍການຮ່ວມລົງນາມຂອງ ທ່ານ ພູວົງ ກິດຕະວົງ ຮອງລັດຖະມົນຕີກະຊວງ ການເງິນ ແລະ ທ່ານ ພົ.ວ ອຸລາຫາ ທອງວັນທາ ຜູ້ອໍານວຍການລັດວິສາຫະກິດ ລາວ-ເອເຊຍ ໂທລະຄົມ. ມີຕາງໜ້າຈາກກະຊວງ ໂຍທາທິການ ແລະ ຂົນສົ່ງ; ກະຊວງປ້ອງກັນປະເທດ ແລະ ຕາງ ໜ້າຈາກເອກອັກຄະລັດຖະທູດ ສສ ຫວຽດນາມ ປະຈໍາ ສປປ ພ້ອມດ້ວຍທ່ານຮອງປະທານ, ຜູ້ປະຈຳການຄະນະກໍາມະການຮ່ວມມື ລາວ-ຫວຽດນາມ ແລະ ພາກສ່ວນທີ່ກ່ຽວຂ້ອງເຂົ້າ ຮ່ວມ.

ໃນພິທີເຊັນສັນຍາໃນຄັ້ງນີ້, ທ່ານ ໄພທູນ ທ່ຽງລະໄມ ວ່າ ການແທນຫົວໜ້າກົມປະຕິຮູບ ແລະ ການປະກັນໄພ ກະຊວງ ການເງິນ ໃຫ້ຮູ້ວ່າ: ໃນໄລຍະຜ່ານມາ, ລັດຖະບານລາວ ກໍຄືກະຊວງການເງິນ ໄດ້ອອກຂໍ້ຕົກລົງ ວ່າດ້ວຍການອະນຸຍາດສ້າງຕັ້ງ ບໍລິສັດປະສົມ ລາວພັດທະນາທ່າເຮືອຫວຸ້ງອ່າງ ຈໍາກັດ ສະບັບ ເລກທີ 0643/ກງ, ລົງວັນທີ 06 ເມສາ 2010 ໂດຍປະກອບມີຜູ້ຖືຮຸ້ນຫຼາຍພາກສ່ວນ ທັງພາກລັດ ແລະ ເອກະຊົນ. ມາຮອດປີ 2015 ລັດຖະບານ ໄດ້ຕົກລົງຫັນກໍາມະສິດ ບໍລິສັດປະສົມ ລາວພັດທະນາທ່າເຮືອຫວຸ້ງອ່າງ ຈໍາກັດ ໄປຂຶ້ນກັບ (ເປັນບໍລິສັດລູກ) ລັດວິສາຫະກິດ ລາວບໍລິການສິນຄ້າຜ່ານແດນ ແລະ ປ່ຽນຊື່ມາເປັນ ລັດວິສາຫະກິດ ລາວບໍລິການທ່າເຮືອຫວຸງອ່າງ, ຊຶ່ງກະຊວງການເງິນຖືຮຸ້ນແຕ່ພຽງຜູ້ດຽວ ເປັນຜູ້ຕາງຫນ້າລັດຖະ ບານລາວ ຖືຮຸ້ນ 20% ໃນບໍລິສັດ ຮຸ້ນສ່ວນທ່າເຮືອຫວຸ້ງອ່າງ ລາວ-ຫວຽດ (VLP). ມາຮອດປີ 2019 ລັດຖະບານໄດ້ຕົກລົງສ້າງຕັ້ງລັດວິສາຫະກິດໃຫມ່ເພື່ອມາແທນລັດວິສາຫະກິດ ລາວບໍລິການທ່າເຮືອຫວຸງອ່າງ ຄື: ລັດວິສາຫະກິດ ພັດທະນາທ່າເຮືອຫວຸ້ງອ່າງ ລາວ-ຫວຽດນາມ (ຢູ່ ສປປ ລາວ), ຊຶ່ງເປັນການຮ່ວມທຶນ ລະຫວ່າງ ກະຊວງການເງິນ ແລະ ບໍລິສັດ ປີໂຕຣເທຣດ ລາວມະຫາຊົນ ເພື່ອເປັນການຮອງຮັບໃຫ້ແກ່ການຈັດຕັ້ງປະຕິບັດ ອະນຸສັນຍາ ລະຫວ່າງ ລັດຖະບານແຫ່ງ ສປປ ລາວ ແລະ ລັດຖະ ບານແຫ່ງ ສສ ຫວຽດນາມ ວ່າດ້ວຍ ການຮ່ວມມືລົງທຶນພັດທະ ນາທ່າທຽບເຮືອ 1, 2 ແລະ 3 ຂອງທ່າເຮືອຫວຸ້ງອ່າງ, ໂດຍຝ່າຍຫວຽດນາມຕົກລົງເຫັນດີທີ່ຈະເພີ່ມສັດສ່ວນການຖືຮຸ້ນ ຈາກ 20% ຂຶ້ນເປັນ 60% ໃຫ້ຝ່າຍລາວ.

ມາຮອດ ປີ 2023, ລັດຖະບານໄດ້ມີທິດຊີ້ນໍາໃຫ້ກະຊວງ ການເງິນສ້າງຕັ້ງວິສາຫະກິດຂອງລັດ 100% ແທນທີ່ ລັດວິສາ ຫະກິດ ພັດທະນາທ່າເຮືອຫວຸ້ງອ່າງ ລາວ-ຫວຽດນາມ ໂດຍໃຫ້ພິຈາລະນາເອົາບໍລິສັດລັດ ທີ່ມີທ່າແຮງ, ມີຄວາມພ້ອມທາງດ້ານທຶນຮອນ, ເຕັກນິກວິຊາການ ເພື່ອໄປຮ່ວມຈັດຕັ້ງປະຕິບັດກັບຝ່າຍຫວຽດນາມ, ພ້ອມນີ້ ກໍໄດ້ມີແຈ້ງການໃຫ້ຍຸບເລີກລັດວິສາ ຫະກິດ ພັດທະນາທ່າເຮືອຫວຸ້ງອ່າງ ລາວ-ຫວຽດນາມ ສະບັບເລກທີ 2014/ຫສນຍ, ລົງວັນທີ 19 ຕຸລາ 2020. ບັນດາ ແຈ້ງການດັ່ງກ່າວ ແມ່ນປະຕິບັດຕາມທິດຊີ້ນໍາຕໍ່ກັບການຈັດຕັ້ງຜັນຂະຫຍາຍຜົນຂອງກອງປະຊຸມ ຄັ້ງທີ 45 ຂອງຄະນະກໍາມະ ການຮ່ວມມືທະວີພາຄີ ລະຫວ່າງ ສອງລັດຖະບານ ລາວ ແລະ ຫວຽດນາມ ກໍຄື ແຜນຮ່ວມມື ລາວ-ຫວຽດນາມ ປະຈໍາປີ 2020.

ໃນການສ້າງຕັ້ງລັດວິສາຫະກິດ 100% ທີ່ຈະສືບຕໍ່ເຂົ້າ ຮ່ວມກັບຝ່າຍຫວຽດນາມໃນການພັດທະນາທ່າເຮືອຫວຸ້ງອ່າງ 1, 2 ແລະ 3 ໂດຍການ ເພີ່ມຮຸ້ນຈາກ 20% ຂຶ້ນເປັນ 60% ໃຫ້ຝ່າຍລາວ ນັ້ນ, ລັດຖະບານໄດ້ມີແຈ້ງການສະບັບເລກທີ 312/ຫສນຍ, ລົງວັນທີ 13 ກຸມພາ 2024 ໂດຍການເຫັນດີໃຫ້ເອົາ ລັດວິສາຫະກິດ ລາວ-ເອເຊຍ ໂທລະຄົມ ຕາມການຄົ້ນຄວ້າຂອງກະຊວງການເງິນ ສົມທົບກັບພາກສ່ວນກ່ຽວຂ້ອງ ທີ່ເຫັນວ່າມີ ສັກກະຍາພາບ ແລະ ຄວາມພ້ອມທາງດ້ານທຶນຮອນ, ປະສົບ ການ, ບຸກຄະລາກອນ ເຊິ່ງເປັນວິສາຫະກິດຂອງລັດ 100%.

ຂ່າວ : ກະຊວງການເງິນ