ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເຊັນສັນຍາໂຄງການສະຫນອງອຸປະກອນກິລາໃຫ້ນັກກິລາຄົນພິການພາຍໃຕ້ໂຄງການຊ່ວຍເຫຼືອລ້າຂອງປະເທດຍີ່ປຸ່ນ

ມື້ນີ້ ວັນທີ 3 ມີນາ 2020, ທີ່ຫ້ອງປະຊຸມຄະນະກຳມະການໂອແລມປິກແຫ່ງຊາດລາວ ນະຄອນຫຼວງວຽງຈັນ, ໄດ້ຈັດພິທີເຊັນສັນຍາໂຄງການສະໜອງອຸປະກອນກິລາຄົນພິ​ການໃຫ້ແກ່ນັກກິລາຄົນພິການ ພາຍໃຕ້ໂຄງການຊ່ວຍເຫຼືອວັດທະນາທຳຂັ້ນຮາກຖານຂອງປະເທດຍີ່ປຸ່ນ ແລະ ປະ​ຊາຊົນຍີປຸ່ນ, ໂດຍການໃຫ້ກຽດເຂົ້າຮ່ວມຂອງທ່ານນາງ ແສງເດືອນ ຫຼ້າຈັນທະບູນ, ລັດຖະມົນຕີກະຊວງສຶກສາທິການ ແລະ ກິລາ, ແລະ ທ່ານ ທາເກວະກະ ເຄໂຊ, ເອກອັກຄະລັດຖະທູດຍີ່ປຸ່ນປະຈຳລາວ, ພ້ອມດ້ວຍຜູ້ຕາງຫນ້າອົງການໄຈກາປະຈຳລາວ, ຄະນະກຳມະການພາຣາແລມປິກແຫ່ງຊາດລາວ, ຄະນະກຳມະການໂອແລມປິກແຫ່ງຊາດລາວ ແລະ ພາກສ່ວນກ່ຽວຂ້ອງ.
ໃນໂອກາດນີ້, ທ່ານ ນາງ ແສງເດືອນ ຫຼ້າຈັນທະບູນ, ລັດ​ຖະມົນຕີກະຊວງສຶກສາທິການ ແລະ ກິລາ ມີຄຳເຫັນວ່າ: ພິທີລົງນາມໂຄງການສະໜອງອຸປະກອນກິລາຄົນພິການໃຫ້ແກ່ນັກກິລາຄົນພິການ ພາຍໃຕ້ໂຄງການຊ່ວຍເຫລືອລ້າຂອງໂຄງການຮາກຖານວັດທະນາທຳຂອງປະເທດຍີ່ປຸ່ນ ແມ່ນການສົ່ງເສີມທາງດ້ານອຸປະກອນການຝຶກແອບ, ການຝຶກຊ້ອມຂອງນັກກິລາຄົນພິການ, ຄົນບໍ່ພິການ ແລະ ເປັນການເປີດໂອກາດໃຫ້ຄົນພິການ ແລະ ຄົນບໍ່ພິການຢູ່ໃນຊຸມຊົນທີ່ມີຄວາມຮັກ, ຄວາມມັກກິລາ, ມີຄວາມສະຫມັກໃຈໃນການຫຼິ້ນກິລາທີ່ໄດ້ມີອຸປະກອນຮັບໃຊ້ເຂົ້າໃນການຝຶກແອບ ແລະຝຶກຊ້ອມ.
ໃນໄລຍະຜ່ານມາ, ລັດຖະບານລາວ ແລະ ລັດຖະບານຍີ່ ປຸ່ນ ໄດ້ມີສາຍພົວພັນທາງການທູດມາເປັນເວລາຍາວນານເຖິງ 65ປີ, ມີສາຍພົວພັນຄູ່ຮ່ວມຍຸດທະສາດເປັນເວລາ 5ປິ ແລະ ມີການພົວພັນທີ່ເຂັ້ມແຂງລະຫວ່າງລາວ ແລະ ຍີ່ປຸ່ນ ໃນຫລາຍຂົງເຂດ ໂດຍ 2 ຝ່າຍໄດ້ມີການພົບປະກັນຢ່າງເລິກ​ເຊິ່ງໃນຫລາຍລະດັບ, ລວມທັງໃນລະດັບນາຍົກລັດຖະມົນຕີເຊິ່ງໄດ້ເພີ່ມທະວີສາຍພົວພັນດ້ານເສດຖະກິດ, ແລະ ການແລກປ່ຽນໃນຂົງເຂດຊາວຫນຸ່ມ ແລະ ກິລາ.
ທ່ານນາງ ແສງເດືອນ ຫຼ້າຈັນທະບູນ, ລັດຖະມົນຕີກະຊວງສຶກສາທິການ ແລະ ກິລາ ມີຄຳເຫັນຕື່ມວ່າ: ສຳລັບການຊ່ວຍເຫລືອດ້ານອຸປະກອນກິລາຄົນພິການຂອງລັດຖະບານຍີ່ປຸ່ນ ແລະ ປະຊາຊົນຍີ່ປຸ່ນ ລວມມີມູນຄ່າທັງຫມົດ 18,553 ໂດລາສະຫະລັດ ຫຼື ປະມານ 163 ລ້ານກີບໃນຄັ້ງນີ້ ຈະນຳໃຊ້ເຂົ້າໃນຂະບວນການຝຶກແອບ-ຝຶກຊ້ອມຂອງນັກກິລາຄົນພິການ ແລະ ຄົນບໍ່ພິການທີ່ໄດ້ມີສ່ວນຮ່ວມຢູ່ໃນຊຸມຊົນຢ່າງມີປະສິດທິຜົນ.
ຂ່າວ: ອຳໄພວັນ ວົງອຳທອນ