ວັນທີ່ 11 ສິງຫາ 2022 ຢູ່ຫ້ອງປະຊຸມຫ້ອງວ່າການເມືອງໂພນທອງ ແຂວງຫລວງພະບາງ ຫ້ອງການໂຍທາທິການ ແລະ ຂົນສົ່ງເມືອງ ໄດ້ຈັດພິທີເຊັນສັນຍາ ໂຄງການ ກໍ່ສ້າງຂົວເບເລ ຫຼື ຂົວເຫຼັກ ຂ້າມນໍ້າຮຶບ ບ້ານເມືອງຮຶບ, ມີ ທ່ານ ແຕ໋ງທອງ ໄຊຍະທິ ຮອງເຈົ້າເມືອງໂພນທອງ, ພ້ອມດ້ວຍຄະນະກຳມະການຄຸ້ມຄ້ອງການລົງທຶນຂອງລັດຂັ້ນເມືອງ ແລະກຸ່ມບໍລີສັດແວວ ປະເສີດກໍ່ສ້າງຄົບວົງຈອນ ເຂົ້າຮ່ວມ.
ພິທີ ທ່ານ ຕຸ້ຍແພງ ວົງສອນໄທ ຫົວໜ້າຫ້ອງການໂຍທາທິການ ແລະ ຂົນສົ່ງເມືອງໂພນທອງ ແຂວງຫລວງພະບາງ ໄດ້ຜ່ານມະຕິຕົກລົງຂອງທ່ານເຈົ້າເມືອງໂພນທອງ ວ່າດ້ວຍການຮັບຮອງເອົາກຸ່ມບໍລິສັດ ແວວ ປະເສີດ ກໍ່ສ້າງຄົບວົງຈອນ, ເປັນຜູ້ຈັດຕັ້ງປະຕິບັດໂຄງການກໍ່ສ້າງຂົວເບເລຂ້າມນໍ້າຮຶບ ບ້ານເມືອງຮຶບເມືອງໂພນທອງ ເຊີ່ງມີຄວາມຍາວ 36 ແມັດ, ກວ້າງ 6 ແມັດ ໂດຍແມ່ນທຶນຂອງລັດ 100% ມູນຄ່າການກໍ່ສ້າງ 4 ຕື້ 323 ລ້ານກວ່າກີບ, ໄລຍະເວລາໃນການກໍ່ສ້າງ 21 ເດືອນ ຫຼື 630 ວັນ ເລີມແຕ່ວັນທີ່ 1 ຕຸລາ 2022 ຫາ ວັນທີ່ 1 ກໍລະກົດ 2024 ໃຫ້ສໍາເລັດ 100% ເພື່ອເຮັດໃຫ້ການໄປມາຫາຊູ່ລະຫວ່າງບ້ານຕໍ່ບ້ານ ມີຄວາມສະດວກ ໂດຍສະເພາະປະຊາຊົນໃນ 8 ບ້ານ ຂອງເມືອງຈະໄດ້ຮັບຜົນປະໂຫຍດ, ຈາກນັ້ນ ໄດ້ມີພິທີເຊັນສັນຍາຕາມ ລະບຽບກົດໝາຍຂອງລັດວາງອອກ.
ຕອນທ້າຍ ທ່ານຮອງເຈົ້າເມືອງໂພນທອງ ແຂວງຫລວງພະບາງ ໄດ້ສະແດງຄວາມຂອບໃຈ ຕໍ່ທຸກພາກສ່ວນ ທີ່ເຮັດໃຫ້ການພັດທະນາພື້ນຖານໂຄງລ່າງຂອງເມືອງໂພນທອງ ໄດ້ຮັບການຈັດຕັ້ງປະຕິບັດ ແລະໄດ້ເນັ້ນໜັກ ໃຫ້ບໍລິສັດຮັບເໝົາ ຕ້ອງຮັບປະກັນ ເຖິງຄຸນນະພາບຂອງການກໍ່ສ້າງເພື່ອໃຫ້ນຳໃຊ້ໄດ້ຍາວນານ.
ຂ່າວ: ສົມເພັດ ໄຊມີກອນ ນັກຂ່າວເມືອງໂພນທອງ
Loading...