ພິທີລົງນາມເຊັນສັນຍາ ພັດທະນາໂຄງການ ເຊື່ອມຕໍ່ພະລັງງານສະອາດພາກເໜືອ ສປປ ລາວ ໄລຍະທີ II ພະລັງງານແສງຕາເວັນ ລະຫວ່າງ ລັດຖະບານແຫ່ງ ສປປ ລາວ ກັບ ບໍລິສັດຊີຈີເອັນ ເອເນີຈີ ເຕັກໂນໂລຢີ(ລາວ)ຈໍາກັດ ໄດ້ຈັດຂຶ້ນໃນວັນທີ 8 ສິງຫາ 2024 ໂດຍການເປັນສັກຂີພະຍານຂອງ ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ, ທ່ານ ນາງ ຟາງຮົງ (Ms. Fang Hong) ເອກອັກຄະລັດຖະທູດ ສປ ຈີນ ປະຈໍາ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່ ໄດ້ໃຫ້ຮູ້ວ່າ: ການຈັດຕັ້ງປະຕິບັດໂຄງການຖານເຊື່ອມຕໍ່ພະລັງງານສະອາດພາກເໜືອ ບໍ່ພຽງແຕ່ຈະຊຸກຍູ້ການຫັນປ່ຽນສີຂຽວ ແລະ ກາກບອນຕໍ່າຂອງພະລັງງານທ້ອງຖິ່ນໃນ ສປປ ລາວ ໃຫ້ມີຄຸນນະພາບແບບຍືນຍົງ, ການພັດທະນາເສດຖະກິດ ແລະ ສັງ ຄົມເທົ່ານັ້ນ, ແຕ່ຍັງຈະປັບລະດັບການພົວພັນເຊື່ອມຕໍ່ ພະລັງງານລະຫວ່າງເຂດພາກເໜືອຂອງ ສປປ ລາວ ແລະ ເຂດພາກໃຕ້ຂອງ ສປ ຈີນ. ຫວັງວ່າ ບໍລິສັດ ຊີຈີເອັນ ແລະ ພາກສ່ວນກ່ຽວຂ້ອງຂອງລັດຖະບານ ສປປ ລາວ ຈະສືບຕໍ່ສົມທົບກັນຊຸກຍູ້ໂຄງການດັ່ງກ່າວ ໃຫ້ເຂົ້າສູ່ການຜະລິດໃຫ້ໄວເທົ່າທີ່ຈະໄວໄດ້ ແລະ ສ້າງຜົນປະ ໂຫຍດຕໍ່ປະຊາ ຊົນຂອງສອງປະເທດໂດຍໄວ. ອີງຕາມສັນຍາດັ່ງກ່າວ, ສອງຝ່າຍຈະສືບຕໍ່ສົມທົບກັນພັດທະນາໂຄງການໄລຍະທີ II ໂຄງການໄຟຟ້າພະລັງງານແສງຕາ ເວັນ 580 MW ຢູ່ແຂວງຫລວງນໍ້າທາ ແລະ ໂຄງການໄຟຟ້າພະລັງງານແສງຕາເວັນ 420 MW ຢູ່ແຂວງອຸດົມໄຊ ບົນພື້ນຖານໂຄງການໄລຍະທີ I ຂອງໂຄງການໄຟຟ້າພະລັງງານແສງຕາເວັນ 1.000 MW.
ໂຄງການເຊື່ອມຕໍ່ພະລັງງານສະອາດພາກເໜືອ ສປປ ລາວ ແມ່ນໂຄງການທີ່ສຳຄັນຂອງບໍລິສັດ ຊີຈີເອັນ ໃນການປະຕິບັດຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ແລະ ຊ່ວຍກໍ່ສ້າງຄູ່ຮ່ວມຊາຕາກຳ ລາວ-ຈີນ, ເປັນໂຄງການສະໜອງໄຟຟ້າທີ່ສຳຄັນ ໃນການສົ່ງເສີມການເຊື່ອມຕໍ່ໄຟຟ້າແມ່ນໍ້າລ້ານຊ້າງ -ແມ່ນ້ຳຂອງ. ໂຄງການດັ່ງກ່າວ, ກວມເອົາ 3 ແຂວງພາກເໜືອຂອງ ສປປ ລາວ ຄື: ແຂວງອຸດົມໄຊ, ແຂວງຜົ້ງສາລີ ແລະ ແຂວງຫລວງນ້ຳທາ ໂດຍຈະສ້າງຖານພະລັງງານສະອາດແບບປະສົມປະສານ ລວມມີພະລັງງານລົມ, ພະລັງງານແສງຕາເວັນ ແລະ ພະລັງງານນໍ້າກັກເກັບ ແລະ ອື່ນໆ .
ປັດຈຸບັນ, ໂຄງການໄຟຟ້າພະລັງງານແສງຕາເວັນ 1000 MW ຢູ່ແຂວງອຸດົມໄຊ ໄລຍະທີ I ໄດ້ເຂົ້າສູ່ໄລຍະກະກຽມການລົງມືກໍ່ສ້າງ, ການເຊັນສັນຍາພັດທະນາໂຄງ ການ ໃນໄລຍະທີ II ຂອງໂຄງການພະລັງງານລົມ ແລະ ພະລັງງານແສງຕາເວັນ 580 MW ຢູ່ແຂວງຫລວງນໍ້າທາ ແລະ ໂຄງການໄຟຟ້າພະລັງງານແສງຕາເວັນ 420 MW ຢູ່ແຂວງ ອຸດົມໄຊ ຈະຊ່ວຍເຮັດໃຫ້ຄວາມສາມາດ ຂອງການຜະລິດພະລັງງານໃໝ່ຂອງ ສປ ຈີນ ທີ່ມີຈຸດເດັ່ນເຂົ້າມາໃນ ສປປ ລາວ; ຫັນປ່ຽນພະລັງງານ ແລະ ຍົກລະດັບລະບົບຕ່ອງໂສ້ອຸດສາຫະກຳຂອງ ສປປ ລາວ ເພີ່ມບາດກ້າວໜຶ່ງ, ພ້ອມທັງຊ່ວຍສ້າງ “ແບັດເຕີລີພະລັງງານສະອາດອາຊີຕາເວັນອອກສຽງໃຕ້” ໃນ ສປປ ລາວ, ປັບລະດັບການພົວພັນເຊື່ອມຕໍ່ພະລັງງານໄຟຟ້າລະຫວ່າງ ສປ ຈີນ ແລະ ສປປ ລາວ, ລົງເລິກການກໍ່ສ້າງຄູ່ຮ່ວມຊາຕາກຳ ລາວ-ຈີນ, ຊ່ວຍສ້າງຜົນປະໂຫຍດໃຫ້ແກ່ປະຊາຊົນຂອງສອງປະເທດຢ່າງແທ້ຈິງ.
ຂ່າວ: ກິດຕາ
ພາບ: ເກດສະໜາ
