ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມືອງຊະນະຄາມ, ແຂວງວຽງຈັນ ຈັດງານເທສການໝາກຂາມຫວານໃນລະ ຫວ່າງວັນທີ 27 ມັງກອນ ຫາ 3 ກຸມພານີ້, ໃນນີ້ ສະເພາະມື້ຈັດງານຢ່າງເປັນທາງ ການແທ້ແມ່ນວັນທີ 3 ກຸມພານີ້.
ທ່ານ ແກ້ວ ພິມມະວົງ, ເຈົ້າເມືອງຊະນະຄາມ ໃຫ້ສໍາພາດວ່າ: ເລີ່ມແຕ່ວັນທີ 27 ມັງກອນເປັນຕົ້ນມາ ອົງການປົກຄອງເມືອງໄດ້ອະນຸຍາດໃຫ້ບັນດາຫົວໜ່ວຍທຸລະ ກິດ ແລະ ປະຊາຊົນມາຈັບຈອງພື້ນທີ່ຢູ່ຂອບເຂດແຄມນໍ້າຂອງບ້ານຊະນະຄາມ ຊຶ່ງເປັນສະຖານທີ່ຈັດງານເພື່ອຂາຍສິນຄ້າທົ່ວໄປ ແລະ ໝາກຂາມຫວານພາຍໃນສວນຂອງຕົນ, ຫລັງຈາກນັ້ນຮອດວັນທີ 2 ກຸມພາ ຈະເລີ່ມມີການສະແດງສິລະປະຂອງນ້ອງນ້ອຍຊົນເຜົ່າແຕ່ລະບ້ານ ແລະ ມີການປະກວດນາງສາວໝາກຂາມຫວານ ປະຈໍາປີ 2024, ຈາກນັ້ນໃນວັນທີ 3 ກຸມ ພາ ຈະເປັນມື້ເປີດງານຢ່າງເປັນທາງການ.
ພາຍໃນງານຄັ້ງນີ້ ມີຫລາກຫລາຍກິດຈະກໍາ ເປັນຕົ້ນ: ມີງານຕະຫລາດນັດຂາຍສິນຄ້າຊະນິດຕ່າງໆ, ມີການປະກວດນາງສາວໝາກຂາມຫວານ, ການວາງສະແດງຂາຍສິນຄ້າ ເຊັ່ນ: ໝາກຂາມຫວານ, ເບ້ຍໝາກຂາມຫວານ, ແນວພັນເຂົ້າ ແລະ ສິນຄ້າທົ່ວໄປ, ມີການຊີມໝາກຂາມຫວານ, ການສະແດງສິລະປະພື້ນບ້ານແລະ ກິດຈະກໍາອື່ນໆ.
ສໍາລັບ ເມືອງຊະນະຄາມ, ແຂວງວຽງຈັນ ເຄີຍຈັດງານເທສະການໝາກຂາມຫວານ ທີ່ໃຫຍ່ລະດັບເມືອງມາແລ້ວ 2 ຄັ້ງ ຄື: ຄັ້ງທີ 1 ໃນປີ 2019 ແລະ ຄັ້ງທີ 2 ໃນປີ 2022, ສ່ວນການຈັດງານໃນປີ 2024 ນີ້ ຖືເປັນການຈັດຂຶ້ນຄັ້ງທີ 3.
Cr: ທີມຂ່າວອອນລາຍ, ວສລ