ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ອົງການກວດສອບແຫ່ງລັດ ໄດ້ຈັດກອງປະຊຸມເຜີຍແຜ່ເຊື່ອມຊຶມ ແລະ ຜັນຂະຫຍາຍມະຕິ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ໃນໄລຍະໃໝ່, ໂດຍການເຜີຍແຜ່ຂອງ ທ່ານ ວຽງທະວີສອນ ເທບພະຈັນ ກຳມະການສຳຮອງສູນກາງພັກ ເລຂາຄະນະບໍລິຫານງານພັກ ປະທານອົງການກວດສອບແຫ່ງລັດ, ມີສະຫາຍຮອງເລຂາຄະນະບໍລິຫານງານພັກ, ຄະນະປະຈຳພັກ, ບັນດາສະຫາຍເລຂາໜ່ວຍພັກ, ຄະນະໜ່ວຍພັກ, ຄະນະກົມ ແລະ ຄະນະພະແນກ ເຂົ້າຮ່ວມ ໃນວັນທີ 6 ມິຖຸນາ 2024.
ມະຕິ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງ ໃນໄລຍະໃໝ່ ສະບັບເລກທີ 04/ກມສພ ລົງວັນທີ 11 ເມສາ 2024 ສະແດງໃຫ້ເຫັນເຖິງຄວາມຈຳເປັນ, ແນວຄິດຊີ້ນຳການສ້າງເສດຖະກິດເອກະລາດເປັນເຈົ້າຕົນເອງ, ການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ສ້າງຄວາມເຂັ້ມແຂງໃຫ້ແກ່ການຜະລິດ, ການບໍລິການ, ລະບົບການເງິນ-ເງິນຕາ ແລະ ການຄຸ້ມຄອງບໍລິຫານລັດ ເພື່ອເປັນພື້ນຖານໃຫ້ແກ່ການສ້າງເສດຖະກິດເອກະລາດເປັນເຈົ້າຕົນເອງ ຢ່າງມີບາດກ້າວເດີນທີ່ໜັກແໜ້ນ ເຮັດໃຫ້ຄະນະພັກແຕ່ລະຂັ້ນ ລວມເຖິງສະມາຊິກພັກ-ພະນັກງານໃຫ້ຮັບຮູ້ ແລະ ເຂົ້າໃຈ, ເຊື່ອມຊຶມ ແລະ ກຳແໜ້ນຢ່າງເລິກເຊິ່ງ.
ນອກນີ້, ກອງປະຊຸມຍັງ ໄດ້ຮັບຟັງການປະກາດບົ່ງຕົວແຕ່ງ ຕັ້ງ ສະຫາຍ ນາງ ຕຸລາວັນ ພິມມະສອນ ເລຂາໜວ່ຍພັກ ຫົວໜ້າຫ້ອງການ ເປັນກຳມະການຄະນະບໍລິຫານງານພັກ ເພື່ອປ່ຽນແທນສະຫາຍ ກຳມະການຄະນະພັກທີ່ຖືກຍົກຍ້າຍໄປຮັບໜ້າທີ່ໃໝ່ ຢູ່ອົງການກວດສອບປະຈໍາພາກເໜືອ 2. ທັງນີ້, ກໍເພື່ອເປັນການຮັບປະກັນໃຫ້ແກ່ການກະກຽມ ແລະ ດຳເນີນກອງປະຊຸມໃຫຍ່ຂອງຄະນະພັກແຕ່ລະຂັ້ນ ໃຫ້ບັນລຸຕາມຈຸດປະສົງ, ລະດັບຄາດໝາຍ ແລະ ທັນຕາມກຳນົດເວລາທີ່ກຳນົດໄວ້.
ໃນຕອນທ້າຍ, ທ່ານ ວຽງທະວີສອນ ເທບພະຈັນ ຍັງໄດ້ຊີ້ນໍາໃຫ້ບັນດາສະຫາຍຄະນະບໍລິຫານງານພັກ, ຄະນະໜ່ວຍພັກ, ຄະນະນໍາກົມ ແລະ ຄະນະພະແນກ ເອົາໃຈໃສ່ຢ່າງຕັ້ງໜ້າສືບຕໍ່ເອົາໃຈໃສ່ສຶກສາອົບຮົມການເມືອງ- ແນວຄິດໃຫ້ສະມາຊິກພັກ, ພະນັກງານໃຫ້ຖືບັນຫານີ້ເປັນບັນຫາກົກ ແລະ ເປັນຄວາມຮັບຜິດຊອບຂອງຄະນະພັກແຕ່ລະຂັ້ນ, ສະມາຊິກພັກ-ພະນັກງານ ຕ້ອງໄດ້ຍົກລະດັບຄວາມຮູ້ທາງດ້ານທິດສະດີການເມືອງ ດ້ວຍການເອົາໃຈໃສ່ຄົ້ນຄວ້າ, ເຊື່ອມຊຶມແນວທາງນະໂຍບາຍຂອງພັກ ໃຫ້ເລິກເຊິ່ງ ແລະ ໜັກແໜ້ນ.