ເມືອງອຸທຸມພອນ (ເຊໂນ) ແຂວງສະຫວັນນະເຂດ ຈັດງານຕະຫລາດນັດສິນຄ້າກະສິກໍາ-ຫັດຖະກໍາ, ສົ່ງເສີມການຄ້າ ແລະ ການທ່ອງທ່ຽວ ໃນວັນທີ 28 ກັນຍາ ຫາ 2 ຕຸລາ 2024 ຢູ່ເດີ່ນກິລາຂອງເມືອງ ໂດຍມີຜະລິດຕະພັນສິນຄ້າກະສິກໍາ-ຫັດຖະກໍາ ແລະ ສິນຄ້າທົ່ວໄປທີ່ມາຈາກບັນດາບ້ານພາຍໃນເມືອງ ແລະ ຕ່າງເມືອງ. ໃນນັ້ນ, ສິນຄ້າກະສິກໍາມີ 8 ລາຍການ, ຜະລິດຕະພັນຫັດຖະກໍາ 12 ລາຍການ ແລະ ສິນຄ້າ ທົ່ວໄປ 60 ລາຍການ.
ການຈັດງານຕະຫລາດນັດຄັ້ງນີ້, ເພື່ອເປັນການຊຸກຍູ້ສົ່ງເສີມ ຂະບວນການຜະລິດກະສິກໍາ-ຫັດຖະກໍາທີ່ເປັນພູມປັນຍາທີ່ຕິດ ພັນກັບມູນເຊື້ອ, ມູນມໍລະດົກ, ຮີດຄອງປະເພນີການດໍາລົງຊີວິດຂອງປະຊາຊົນບັນດາເຜົ່າພາຍໃນເມືອງ ໃຫ້ໄດ້ຮັບການສົ່ງເສີມກາຍເປັນສິນຄ້າ, ເປັນທີ່ຮັບຮູ້ຂອງສັງຄົມ ແລະ ນັບມື້ນັບເຕີບໂຕເຂົ້າສູ່ການຕະຫລາດ ແລະ ສົ່ງເສີມການທ່ອງທ່ຽວຢ່າງກວ້າງຂວາງ.
ໂອກາດນີ້, ທ່ານ ຄໍາພົງ ສຸລິເຍດ ຮອງເຈົ້າເມືອງ ກໍໄດ້ມີຄໍາເຫັນວ່າ: ເພື່ອເປັນການສົ່ງເສີມຜະລິດຕະພັນສິນຄ້າຂອງຄົນລາວ, ທຸກພາກສ່ວນຈົ່ງພ້ອມກັນຊົມໃຊ້ຜະລິດຕະພັນຂອງຄົນລາວ, ສົ່ງເສີມການນໍາໃຊ້ເງິນກີບລາວ ປະຕິບັດຄໍາຂວັນທີ່ວ່າ: ລາວເຮັດ ລາວໃຊ້ ລາວໄດ້ ລາວຈະເລີນ ຕິດພັນກັບການສົ່ງເສີມການທ່ອງທ່ຽວພາຍໃຕ້ຄໍາຂວັນ ລາວທ່ຽວລາວ.
ຂ່າວ: ບຸນຊູ ພົມມະເທບ
