ໃນເດືອນກໍລະກົດ 2021 ນີ້, ທະນາຄານ ຮ່ວມທຸລະກິດ ລາວ-ຫວຽດ ຈໍາກັດ (LaoVietBank) ໄດ້ສະໜັບສະໜູນຕັ່ງຫີນໃຫ້ກັບ 10 ສະຖານທີ່ສໍາຄັນຂອງນະ ຄອນຫຼວງວຽງຈັນ ໄດ້ແກ່: ຄິວລົດໂດຍສານສາຍໃຕ້, ໂຮງໝໍແມ່ ແລະ ເດັກ, ສູນການຄ້າເວີດເທຣດເຊັນເຕີ, ສູນການຄ້າວຽງຈັນເຊັນເຕີ, ວັດສີສະເກດ, ຫໍຫຼັກເມືອງ, ຫໍພະແກ້ວ, ສະຖາບັນເສດຖະກິດການເງິນ, ສວນໄຊເຊດຖາ ແລະ ໜັງສືພິມປະຊາຊົນ ລວມທັງໝົດຈໍານວນ 160 ໜ່ວຍ.
ກິດຈະກໍາດັ່ງກ່າວ, ໄດ້ເລີ່ມຈັດຕັ້ງປະຕິບັດມາແຕ່ກາງເດືອນມິຖຸນາ 2021 ເຊິ່ງທໍາອິດໄດ້ມອບຕັ່ງຫີນສະໜັບສະໜູນໃຫ້ແກ່ສະໜາມບິນສາກົນວັດໄຕ ຈໍານວນ 20 ໜ່ວຍ ເພື່ອໃຫ້ມວນຊົນທີ່ເດີນທາງເຂົ້າ-ອອກສະໜາມບິນໄດ້ມີບ່ອນນັ່ງລໍຖ້າ ຫຼື ນັ່ງພັກຜ່ອນຕາມອັດທະຍາໃສ ເມື່ອມາໃຊ້ບໍລິການຢູ່ສະໜາມບິນດັ່ງກ່າວ. ຖັດຈາກນັ້ນ, ໃນເດືອນກໍລະກົດ 2021, LaoVietBank ກໍ່ໄດ້ສືບຕໍ່ມອບຕັ່ງຫີນໃຫ້ກັບບັນດາສະຖານທີ່ສໍາຄັນຕື່ມອີກໃນທຸກໆອາທິດເປັນຕົ້ນແມ່ນ: ໂຮງຮຽນ, ໂຮງໝໍ, ສະຖານທີ່ສາທາລະນະ, ແຫຼ່ງທ່ອງທ່ຽວ ແລະ ອື່ນໆ ເພື່ອເປັນການປະກອບສ່ວນຊ່ວຍເຫຼືອສັງຄົມ.
ໂອກາດນີ້, ທ່ານ ນາງ ແສງມະນີ ພິລາວົງ, ຫົວໜ້າໜ່ວຍງານພັດທະນາເຄື່ອງໝາຍການຄ້າ ແລະ ສື່ສານມວນຊົນ ທະນາຄານ ຮ່ວມທຸລະກິດ ລາວ-ຫວຽດ ຈໍາກັດ ກ່າວວ່າ: ໃນເດືອນກໍລະກົດ 2021, ພວກເຮົາໄດ້ທະຍອຍມອບຕັ່ງຫີນໃຫ້ສະຖານທີ່ສໍາຄັນຕ່າງໆຢູ່ໃນນະຄອນຫຼວງວຽງຈັນດັ່ງທີ່ໄດ້ລາຍງານໄປຂ້າງເທິງມີ 10 ຈຸດສໍາຄັນ ລວມທັງໝົດ 160 ໜ່ວຍ. ສໍາລັບໃນເດືອນສິງຫາ 2021 ພວກເຮົາຈະສືບຕໍ່ຈະມອບຕັ່ງຫີນໃຫ້ກັບບັນດາສະຖານທີ່ສໍາຄັນຕ່າງໆທີ່ໄດ້ຂຶ້ນແຜນໄວ້ ເຊັ່ນ: ມະຫາວິທະຍາໄລແຫ່ງຊາດ, ສະຖາບັນການທະນາຄານ, ຫໍວັດທະນະທໍາແຫ່ງຊາດ, ສວນເຈົ້າອະນຸວົງ (ແຄມຂອງ), ວັດວາອາຣາມ, ສະຖານທີ່ທ່ອງທ່ຽວ ແລະ ອື່ນໆ.
ຂໍ້ມູນຈາກ LaoVietBank ຍັງໃຫ້ຮູ້ຕື່ມອີກວ່າ: ໃນອາທິດສຸດທ້າຍຂອງເດືອນກໍລະກົດ 2021, ທະນາຄານ ຮ່ວມທຸລະກິດ ລາວ-ຫວຽດ ຈໍາກັດ ກໍ່ໄດ້ມອບຕັ່ງຫີນໃຫ້ກັບສະຖາບັນເສດຖະກິດການເງິນ, ສວນໄຊເຊດຖາ ແລະ ໜັງສືພິມປະຊາຊົນ. ໃຫ້ກຽດມອບໂດຍ ທ່ານ ນາງ ແສງມະນີ ພິລາວົງ ແລະ ກ່າວຮັບໂດຍ ດ໋ອກເຕີ ນາງ ຄໍາແສງ ບົວລະພັນ ຕາງໜ້າໃຫ້ແກ່ສະຖາບັນເສດຖະກິດການເງິນ; ທ່ານ ລໍາມອນ ເພັດສະຫວັນ ຕາງໜ້າໃຫ້ກັບສວນໄຊເຊດຖາ ແລະ ທ່ານ ວັນໄຊ ຕະວິນຍານ ຫົວໜ້າບັນນາທິການໜັງສືພິມປະຊາຊົນ.
[ຂ່າວ-ພາບ: LaoVietBank]
Loading...