ຫ້ອງການ ຖວທ ເມືອງຄູນຄຳ ໃຫ້ຮູ້ວ່າ: ໃນວັນທີ 26 ກໍລະກົດ 2024 ລະດັບນ້ຳໃນສາຍນ້ຳຕ່າງໆ ຢູ່ເມືອງຄູນຄຳ ແຂວງຄຳມ່ວນ ມີປະລິມານເພີ່ມຂຶ້ນຫລາຍ ເຮັດໃຫ້ນໍ້າໄຫລເຂົ້າຖ້ວມເສັ້ນທາງ ເຂດບ້ານນາຂາມ-ນ້ຳສະນາມ, ເສັ້ນທາງບ້ານມ່ວງນ້ຳສາງ-ບ້ານນາຊ້າງຂ້າມເກົ່າ ແລະ ເສັ້ນທາງເຂດບ້ານນາຄຳ-ບ້ານນາກາງ.
ສຳລັບການເດີນທາງດ້ວຍລົດໃຫຍ່ຮຸ່ນສູງ ແມ່ນສາມາດໄປໄດ້ ສ່ວນລົດປະເພດຕ່ຳ ຫລື ລົດຈັກແມ່ນມີຄວາມຍຸ້ງຍາກໃນການໄປ-ມາ.
ຂ່າວຍັງໃຫ້ຮູ້ຕື່ມວ່າ: ຢູ່ເຂດຖ້ຳກອງລໍ ສະພາບນໍ້າຂຶ້ນສູງເຊັ່ນດຽວກັນ ເຮັດໃຫ້ປະລິມານນ້ຳໄດ້ຕັນທາງເຂົ້າຖ້ຳກອງລໍ, ເມືອງຄູນຄຳ, ແຂວງຄຳມ່ວນ ເຮັດໃຫ້ບໍ່ສາມາດຂີ່ເຮືອເຂົ້າໄປໃນຖໍ້າໄດ້, ເນື່ອງຈາກປະລິມານນໍ້າຂຶ້ນສູງ ແລະ ໄດ້ປິດທາງເຂົ້າປາກຖໍ້າ.
ດັ່ງນັ້ນ, ຈຶ່ງແຈ້ງເຕືອນມາຍັງປະຊາຊົນ ຫລື ຜູ້ນຳໃຊ້ເສັ້ນທາງດັ່ງກ່າວ ຄວນມີສະຕິລະວັງຕົວໃນການໃຊ້ລົດໃຊ້ຖະໜົນດ້ວຍ ພ້ອມທັງຕິດຕາມຂ່າວພະຍາກອນອາກາດ ຢ່າງໃກ້ຊິດຕື່ມອີກ ເນື່ອງຈາກໄລຍະນີ້ ໃນບາງເຂດ ບາງທ້ອງຖິ່ນ ຍັງມີຝົນສືບຕໍ່ຕົກຢູ່ເລື້ອຍໆ ອາດຈະເຮັດໃຫ້ມີດິນເຈື່ອນ ຫລື ນ້ຳໄຫລຊຸ. ສຳລັບຜູ້ທີ່ອາໄສໃນພື້ນທີ່ຕໍ່າ ຫລື ລຽບຕາມແຄມນ້ຳ ໃຫ້ເກັບມ້ຽນເຄື່ອງຂອງໄວ້ບ່ອນທີ່ສູງ ຫລື ບ່ອນທີ່ປອດໄພ.
