ອີງຕາມການລາຍງານຂອງຫ້ອງການໂຍທາທິການ ແລະ ຂົນສົ່ງເມືອງໄຊ ແຂວງອຸດົມໄຊ ເບື້ອງຕົ້ນໃຫ້ຮູ້ວ່າ: ເນື່ອງຈາກຝົນຕົກ ຕໍ່ເນື່ອງເປັນເວລາຫລາຍວັນ ຢູ່ເຂດເມືອງໄຊ ເຮັດໃຫ້ເສັ້ນທາງ ຫລາຍຈຸດຫລາຍບ້ານ ມີດິນເຈື່ອນຖົມເສັ້ນທາງ, ຂົວຂາດ, ນ້ຳຖ້ວມ ແລະ ທາງມືນ, ຊຶ່ງເຮັດໃຫ້ບາງເສັ້ນທາງບໍ່ສາມາດສັນຈອນໄປ-ມາໄດ້, ບາງເສັ້ນທາງໄປ-ມາໄດ້ແຕ່ຂ້ອນຂ້າງຍາກລຳບາກ ແລະ ມີຄວາມສ່ຽງຫລາຍ.
ໃນນີ້, ປະກອບມີ: ເສັ້ນທາງແຕ່ບ້ານ ລາງ ຫາບ້ານໃຫຍ່ນ້ຳແຫ່ງ ມີ 6 ຈຸດ ລົດສາມາດທ່ຽວໄດ້, ເສັ້ນທາງ 3 ແຍກບ້ານ ມົກຄະ ຫາບ້ານນ້ຳບໍຕາໄກ່ 3 ຈຸດ ບໍ່ສາມາດທ່ຽວໄດ້, ເສັ້ນທາງບ້ານຫ້ວຍຊາງ ຫາບ້ານປຸງຫຽງ ສົົ້ນຂົວຂາດ 1 ຈຸດ, ລົດໃຫຍ່ບໍ່ສາມາດທ່ຽວໄດ້ ສ່ວນລົດຈັກແມ່ນທ່ຽວໄດ້, ເສັ້ນທາງ ກໍນ້ອຍ -ນ້ຳແລງ ສົ້ນຂົວຂາດ 1 ຈຸດ ລົດບໍ່ສາມາດທຽວໄດ້, ເສັ້ນທາງບ້ານບໍ່-ບ້ານຫ້ວຍຊາງ ດິນເຈື່ອນ ແລະ ຈຸດຫ້ວຍຊາງ-ຫົວນ້ຳບາກ ສົ້ນຂົວຂາດ 1 ຈຸດ ແກ້ໄຂແລ້ວສາມາດທ່ຽວໄດ້. ສ່ວນເສັ້ນທາງ 2E ກິໂລແມັດ 18 -ບ້ານລ້ອງຍາ-ນ້ຳກັດ ນ້ຳໄດ້ເຊາະໜ້າທາງ 3 ຈຸດ ລົດສາມາດທ່ຽວໄດ້ປົກກະຕິ.
ສະນັ້ນ, ຈຶ່ງແຈ້ງຂ່າວມາຍັງພໍ່ແມ່ປະຊາຊົນ, ພໍ່ຄ້າຊາວຂາຍ, ພະນັກງານ-ລັດຖະກອນ ທີ່ສັນຈອນໄປ-ມາໃນໄລຍະນີ້ໃຫ້ລະມັດລະວັງ ພ້ອມທັງຕິດຕາມຂ່າວສະພາບດິນຟ້າອາກາດ ຈາກກົມອຸຕຸນິຍົມ ແລະ ອຸທົກກະສາດຢ່າງໃກ້ຊິດຕື່ມ.
