ຕອນເຊົ້າຂອງວັນທີ 29 ຕຸລາ 2022 ນີ້, ທີ່ເດີ່ນກິລາຂອງເມືອງນ້ຳບາກ ໄດ້ຈັດພິທີເປີດເທດສະການໝາກກ້ຽງຫວານນ້ຳບາກ ຄັ້ງທີ ll ປະຈໍາປີ 2022, ມີ ທ່ານ ສຸກັນ ບຸນຍົງ ປະທານແນວລາວສ້າງຊາດແຂວງ, ພ້ອມດ້ວຍ ການນຳແຂວງຫລວງພະບາງ, ເມືອງອ້ອມຂ້າງ, ແຂກຮັບເຊີນ, ຕະຫຼອດຮອດປະຊາຊົນບັນດາເຜົ່າ ຊາວເມືອງນ້ຳບາກ ເຂົ້າຮ່ວມ. ພິທີ ໄດ້ມີຂະບວນແຫ່ໝາກກ້ຽງຈຳລອງຂອງແຕ່ລະບ້ານ ທັງໄດ້ມີການປະກວດລົດ ຊາດໝາກກ້ຽງ ແລະສາວງາມໝາກກ້ຽງຫວານໄປພ້ອມ, ພິເສດມີຂະບວນແຫ່ຂອງບ້ານວັດທະນະທຳໄຕລື້ ບ້ານນາຍາງເໜືອ ແລະຂະບວນແຫ່ໝາກກ້ຽງຈຳລອງຂອງເມືອງງອຍ. ຈາກນັ້ນ ທ່ານ ສົມຫວັງ ພອນຄໍາວົງສາ ເຈົ້າເມືອງນ້ໍາບາກ ໄດ້ມີຄຳເຫັນກ່າວຕ້ອນຮັບແຂກ ແລະປະຫວັດ ການປູກໝາກກ້ຽງຂອງປະຊາຊົນຊາວ ເມືອງນ້ຳບາກ ທີ່ເຄີບມີມູນເຊື້ອມາແຕ່ດົນນານ, ປັດຈຸບັນໄດ້ການເປັນສີນຄ້າບູລິມະສິດ ໃນການສ້າງລາຍຮັບໃຫ້ແກ່ປະຊາຊົນພາຍໃນເມືອງໃນແຕ່ລະປີ, ທົ່ວເມືອງມີບ້ານທີ່ປູກໝາກກ້ຽງແລ້ວ 26 ບ້ານ, ມີ 1.288 ຄອບຄົວ, ເນື້ອທີ່ຫລາຍກວ່າ 622 ເຮັດຕ່າ, ໃນນັ້ນ ໃຫ້ປົນຜະລິດແລ້ວຫລາຍກວ່າ 494 ເຮັດຕ່າ, ຜົນຜະລິດສະເລ່ຍ 15 ໂຕ່ນຕໍ່ເຮັກຕ່າ, ສ້າງລາຍຮັບໄດ້ 45 ລ້ານກີບຕໍ່ເຮັກຕ່າ, ບ້ານທີ່ປູກຫລາຍກວ່າໝູ່ ມີບ້ານບົມ, ບ້ານນະຄອນ, ບ້ານລີ່, ບ້ານຟ້າ, ບ້ານນ້ຳລາ, ບ້ານໂຄ້ງ, ບ້ານໂພນໄຊ, ບ້ານນ້ຳງາ ແລະບ້ານຫ້ວຍຫົກ. ພາຍຫລັງສຳເລັດພິທີ ໄດ້ມີການແຂ່ງຂັນກິລາດືງເຊືອກເພດຊາຍ ແລະກິລາຫາບໝາກກ້ຽງເພດຍີງ ພ້ອມທັງມີການມອບລາງວັນດານປະກວດໝາກກ້ຽງຈຳລອງ, ການປະກວດສາວງາມໝາກກ້ຽງ, ການປະກວດລົດຊາດໝາກກ້ຽງ ແລະກິລາທັງສອງປະເພດ ດ້ວຍບັນຍາກາດຄຶກຄື້ນ ແລະເບີກບານມ່ວນຊື່ນ.
