ເມື່ອບໍ່ດົນ ຜ່ານມາ ຢູ່ທີ່ສຸກສາລາບ້ານບຸ່ງພ້າວ ເມືອງທຸລະ ຄົມ ແຂວງວຽງຈັນ ໄດ້ມີການຈັດງານເທສະການອາຫານຂຶ້ນ, ໂດຍການຮ່ວມມືລະຫວ່າງຫ້ອງການສາທາລະນະສຸກເມືອງ ແລະ ອົງການ IRD (Institut de Rechrche pour le Developpement FRANCE).
ຈຸດປະສົງເພື່ອສະຫຼຸບກິດຈະກໍາໃນການຊຸກ ຍູ້-ສົ່ງເສີມວຽກ ງານໂພສະນາການໃຫ້ແກ່ແມ່ຍິງ ແລະ ເດັກນ້ອຍ ໃຫ້ເຂົາເຈົ້າມີຄວາມຮູ້, ຄວາມເຂົ້າໃຈໃນການຮັກສາສຸຂະພາບ ໃຫ້ຖືກຕ້ອງຕາມຫຼັກການໂພສະນາການ ເປັນຕົ້ນ: ແມ່ນແມ່ຍິງໃນໄວຈະເລີນພັນໃນຊ່ວງອາຍຸລະຫວ່າງ 15-49 ປີ ແລະ ເດັກນ້ອຍລຸ່ມ 5 ປີ ໃຫ້ມີສຸຂະພາບທີ່ດີ ແລະ ມີໂພຊະນາການ.
ເມືອງທຸລະຄົມ ມີສະຖານທີ່ບໍລິການປິ່ນປົວຮັກສາສຸຂະ ພາບຂອງລັດ ທັງໝົດ 6 ແຫ່ງ, ສໍາລັບສຸກສາລາບຸ່ງພ້າວ ກໍແມ່ນ 1 ໃນ 6 ສະຖານທີ່ບໍລິການສຸຂະພາບຂອງປະຊາຊົນ 2 ບ້ານຄື: ບ້ານບຸ່ງພ້າວ ແລະ ຫາດໄຊ ເພື່ອແນໃສ່ບັນລຸໃຫ້ໄດ້ 11 ຕົວຊີ້ບອກ ທີ່ສະພາຮັບຮອງ ກໍ່ຄືກະຊວງສາທາລະນະສຸກວາງອອກໃຫ້ໄດ້ຮັບຜົນຕາມຄາດໝາຍ.ໄລຍະທີ່ຜ່ານມາຫ້ອງການສາທາລະ ນະສຸກເມືອງ ໄດ້ສົມທົບກັບອໍານາດການປົກຄອງ 4 ບ້ານເປົ້າ ໝາຍຄື: ບ້ານບຸ່ງພ້າວ, ບ້ານ ຫາດໄຊ, ບ້ານ ນາເງິນ ແລະ ບ້ານ ນາຍາງ ໄດ້ອໍານວຍຄວາມສະດວກໃຫ້ແກ່ອົງການ IRD ແລະ Immana ໄດ້ເຄື່ອນໄຫວເຮັດໜ້າທີ່ເລີ່ມແຕ່ປີ 2022 ເປັນ ຕົ້ນມາ, ຮອດປັດຈຸບັນຖືວ່າສໍາເລັດຜົນຕາມລະດັບຄາດໝາຍ ຊຶ່ງຜົນສໍາເລັດດັ່ງກ່າວ ຍ້ອນການຊີ້ນໍາ-ນໍາພາຂອງຄະນະພັກຂັ້ນເມືອງ, ຍ້ອນການຕັດສິນໃຈສູງຂອງອໍານາດການປົກຄອງຂັ້ນບ້ານ ແລະ ປະຊາຊົນ ພ້ອມກັນປະຕິບັດກິດຈະກໍາດັ່ງກ່າວຈຶ່ງສໍາເລັດ ແລະ ທີ່ສໍາຄັນແມ່ນຍ້ອນໄດ້ຮັບການສະໜັບສະໜູນຈາກອົງການ IRD, Immana ແລະ ອົງການອາຫານໂລກ ທີ່ໃຫ້ການຊ່ວຍ ເຫຼືອທຸກດ້ານ.
ພາຍໃນງານເທສະການຄັ້ງນີ້ ໄດ້ມີການຈັດກິດຈະກໍາຫຼາຍຢ່າງ ເພື່ອໃຫ້ບັນດາແຂກທີ່ມາຮ່ວມງານໄດ້ມີສ່ວນຮ່ວມ ແລະ ຮັບຊົມ ເຊັ່ນ: ການຈັດວາງສະແດງອາຫານຫຼາກຫຼາຍຊະນິດ ມີອາຫານຄາວ, ຫວານ ທີ່ເປັນອາຫານລາວ ແລະ ຕ່າງປະເທດ, ມີການວາງສະແດງສິນຄ້າກະສິກໍາ ທີ່ຊາວບ້ານບຸ່ງພ້າວຜະລິດຂຶ້ນພາຍໃນບ້ານ, ມີກິດຈະກໍາກວດສຸຂະພາບໃຫ້ແກ່ແມ່ຍິງ ແລະ ເດັກນ້ອຍ ໂດຍບໍ່ເສຍຄ່າ ຈາກຫ້ອງການສາທາລະນະສຸກເມືອງ, ມີການສະແດງສິລະປະຈາກນ້ອງນັກຮຽນມໍຕົ້ນໂພນຄໍາ ແລະ ມໍຕົ້ນສຸກ ສາລາ ເຊິ່ງທາງອົງການ IRD ໄດ້ມອບເງິນເພື່ອເປັນທຶນການ ສຶກສາໃຫ້ແກ່ນ້ອງນັກຮຽນ, ໂຮງຮຽນລະ 2 ລ້ານກີບ ພ້ອມ ດ້ວຍຂອງທີ່ລະນຶກຈາກອົງການຈໍານວນໜຶ່ງ.
ໃນຕອນທ້າຍຂອງງານ ໄດ້ຈັດການແຂ່ງຂັນປຸງແຕ່ງອາຫານລາວເຊັ່ນ: ຕົ້ມໄກ່, ແກງໜໍ່ໄມ້, ຕໍາໝາກຫຸ່ງ, ລາບເປັດ ແລະອື່ນໆ ຊຶ່ງຜູ້ເຂົ້າແຂ່ງຂັນແມ່ນເປັນຕົວແທນມາຈາກບ້ານຕ່າງໆພາຍໃນເມືອງທຸລະຄົມ. ຜົນການແຂ່ງຂັນມີດັ່ງນີ້: ທີ 1 ໄດ້ແກ່ ບ້ານບຸ່ງພ້າວ ໄດ້ຮັບເງິນລາງວັນ 2.000.000 ກີບ; ທີ 2 ໄດ້ແກ່ບ້ານຫາດໄຊ ໄດ້ຮັບເງິນລາງວັນ 1.800.000 ກີບ, ທີ 3 ໄດ້ແກ່ບ້ານນາຍາງ ໄດ້ຮັບເງິນລາງວັນ 1.000.000 ກີບ, ສ່ວນບ້ານທີ່ບໍ່ໄດ້ອັນດັບ ແມ່ນໄດ້ຮັບລາງວັນຊົມເຊີຍ ລາງວັນລະ 500.000 ກີບ ແລະ ທາງອົງການ IRD ຍັງໄດ້ມອບຂອງທີ່ລະນຶກ ໃຫ້ແກ່ບັນດາບ້ານທີ່ມາຮ່ວມການແຂ່ງຂັນ ແລະ ແຂກຜູ້ມາຮ່ວມງານ.
ຂ່າວ-ພາບ: ບ່າວຫາດໄຊ
