ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເນື້ອທີ່ປ່າໄມ້ຫຼາຍກວ່າ 18,000 ເຮັກຕາ ເສຍຫາຍໜັກໜ່ວງຍ້ອນໄຟໄໝ້ລາມປ່າ ຢູ່ເມືອງໄຊ ແຂວງອຸດົມໄຊ:

ເລີ່ມແຕ່ຕົ້ນເດືອນມີນາຜ່ານມາ, ເມືອງໄຊ ແຂວງ ອຸດົມໄຊ ໄດ້ເກີດມີໄຟໄໝ້ລາມປ່າເປັນບໍລິເວນກວ້າງເຊີ່ງໄດ້ເຮັດໃຫ້ເນື້ອທີ່ປ່າໄມ້ຖືກໄຟໄໝ້ເສຍຫາຍຢ່າງໜັກໜ່ວງ ແລະ ເຮັດໃຫ້ເກີດມົນລະພິດທາງອາກາດ.

ອີງຕາມການລາຍງານຂອງຫ້ອງການກະສິກຳ ແລະ ປ່າໄມ້ປະຈຳເມືອງ ໄຊ ໃຫ້ຮູ້ວ່າ: ມາຮອດວັນທີ 4 ເມສາ 2020 ນີ້ມີເນື້ອທີ່ປ່າໄມ້ຂອບເຂດເມືອງໄຊຮັບຜິດຊອບ ຖືກໄຟໄໝ້ທັງໝົດຫລາຍກວ່າ 18,000 ເຮັກຕາ, ໃນນີ້ມີປ່າສະຫງວນແຫ່ງຊາດ ພູຫີ່ຜີ 7.000 ກວ່າເຮັກຕາ, ກວມເອົາ 18 ບ້ານ, ປ່າຜະລິດແຫ່ງຊາດສາຍນ້ຳງາ 6.000 ກວ່າເຮັກຕາ ກວມ 7 ບ້ານ, ປ່າຜະລິດແຫ່ງຊາດ ສາຍນຳ້ພາກ 1.000 ກວ່າເຮັກຕາ ກວມເອົາ 2 ບ້ານ ແລະ ປ່າສະຫງວນຂອງແຂວງ, ເມືອງ ແລະ ບ້ານ ອີກ 4.000 ກວ່າເຮັກຕາ.

ຈາກສະພາບການດັ່ງກ່າວ, ທາງຄະນະຮັບຜິດຊອບການສະກັດກັ້ນໄຟໄໝ້ລາມປ່າຂັ້ນແຂວງ, ຂັ້ນເມືອງ-ເມືອງໄຊ ແຂວງ ອຸດົມໄຊ ໄດ້ນຳພາການນຳຂອງບັນດາພະແນກການທີ່ກ່ຽວຂ້ອງ, ພະນັກງານອ້ອມຂ້າງແຂວງ, ເຈົ້າໜ້າທີ່ຈາກກອງກຳລັງປ້ອງກັນຊາດ-ປ້ອງກັນຄວາມສະຫງົບ, ພ້ອມດ້ວຍການນໍາ ແລະ ພະນັກງານອ້ອມຂ້າງເມືອງໄຊ, ອົງການປົກຄອງບ້ານ ແລະ ພໍ່ແມ່ປະຊາຊົນ ລົງໄປມອດໄຟພື້ນທີ່ທີ່ໄດ້ຮັບຜົນກະທົບຈາກເຫດໄຟໄໝ້ລາມປ່າໃນຂອບເຂດເມືອງໄຊ, ໂດຍມີຈຳນວນທັງໝົດ 5.895 ເທື່ອຄົນ, ຍິງ 486 ຄົນ.

ມາຮອດປະຈຸບັນ, ກໍ່ຍັງບໍ່ທັນສາມາດຄວບຄຸມໄຟໄວ້ໄດ້ເທື່ອ ເນື່ອງຈາກສະພາບພູມສັນຖານບໍ່ອຳນວຍ ເປັນພູຜາເຫວຊັນ, ກໍ່ໃຫ້ເກີດຄວາມຫຍຸ້ງຍາກໃນການເຂົ້າເຖິງ ບວກກັບ ສະພາບແຫ້ງແລ້ງ ຍິ່ງເຮັດໃຫ້ໄຟໄໝ້ລາມຢ່າງໄວວາ, ໃນຂະນະທີ່ຜູ້ທີ່ເຂົ້າຮ່ວມພາລະກິດມອດໄຟ ຍັງຂາດເຄື່ອງມືອຸປະກອນທີ່ຈຳເປັນ ເຊີ່ງມາຮອດຕອນນີ້ ຫລາຍເຂດກໍ່ຍັງມີໄຟທີ່ຍັງສືບຕໍ່ໄໝ້ຢູ່; ດັ່ງນັ້ນຈຶ່ງຂໍຮຽກຮ້ອງມາຍັງທຸກພາກສ່ວນຈົ່ງເປັນເຈົ້າການໃນການເຝົ້າລະວັງ ແລະ ຕັ້ງໜ້າປະກອບສ່ວນເຂົ້າຮ່ວມໃນການມອດໄຟໃນຄັ້ງນີ້ໃຫ້ບັນລຸຜົນສຳເລັດໂດຍໄວ.

 

ຂ່າວ: ຈັນພວງ ສີບຸນແພງ