ເປັນຫຍັງເວລາເກີດມີໄຟຕົກ-ໄຟມອດ ການແກ້ໄຂບັນຫາຈຶ່ງໃຊ້ເວລາດົນ
ໃນໂອກາດໃຫ້ສໍາພາດຕໍ່ສື່ມວນຊົນໃນວັນທີ 17 ພຶດສະພາ 2024 ນີ້ ທີ່ກະຊວງພະລັງງານ ແລະ ບໍ່ແຮ່ ທ່ານ ວົງສະກຸນ ຍິ່ງຍົງ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ (ຟຟລ) ໄດ້ອະທິ ບາຍຊີ້ແຈງຫລາຍບັນຫາ. ໃນນີ້, ສະເພາະບັນຫາເວລາເກີດມີໄຟຕົກ-ໄຟມອດ ການແກ້ໄຂບັນຫາໃຊ້ເວລາດົນ ເຊິ່ງສັງຄົມໃຫ້ຄວາມສົນໃຈຫລາຍທ່ານໄດ້ອະທິບາຍວ່າ: ເຫດການໄຟຕົກ-ໄຟມອດ ແມ່ນມີຫຼາຍສາເຫດ ທັງໃນໂຕ ແລະ ນອກໂຕ, ໃນນີ້ ເບື້ອງ ຕົ້ນຖ້າເຫດການໄຟຕົກ-ໄຟມອດ ເກີດຈາກລະບົບພາຍໃນຂອງໄຟຟ້າລາວ ບໍ່ວ່າຈະເປັນການມອດໄຟສຸກເສີນ, ບຳລຸງຮັກສາ, ສ້ອມແປງ, ປ່ຽນຖ່າຍອຸປະກອນ, ມອດໄຟໃຫ້ບັນດາບໍລິສັດຜູ້ປະ ກອບການກໍ່ສ້າງ ແລະ ຕິດຕັ້ງໄຟຟ້າ ເພື່ອຂະຫຍາຍການຊົມໃຊ້ໄຟ ຟ້າໃຫ້ກັບລູກຄ້າ ໃນກໍລະນີນີ້ ຟຟລ ຈະມີແຈ້ງການເປັນທາງການ ໂດຍຜ່ານສື່ອອນລາຍ ຫຼື ສ່ອງທາງແອັບພິເຄຊັນ, Facebook Page EDL LAO ຂອງ ຟຟລ ເພື່ອ ໃຫ້ລູກຄ້າ ໄດ້ຮັບຊາບຢ່າງທົ່ວເຖິງ ແລະ ແຜນການມອດໄຟຈະມີກຳນົດເວ ລາຢ່າງຊັດເຈນ ໃນການມອດໄຟແຕ່ລະຄັ້ງ.
ໃນກໍລະນີເກີດຈາກ ປັດໃຈພາຍນອກກະທົບໃສ່ລະບົບຂອງໄຟຟ້າລາວ ໂດຍສະເພາະເຫດການໄພພິບັດທາງ ທຳມະຊາດ ເຊັ່ນ: ພາຍຸ, ລົມແຮງ, ຝົນຕົກ, ຟ້າຜ່າ, ນໍ້າຖ້ວມ, ຕົ້ນໄມ້ຫັກລົ້ມທັບສາຍໄຟ, ສາຍໄຟຂາດ ຕໍ່ກັບບັນຫາເຫຼົ່າ ນີ້ ໄຟຟ້າລາວບໍ່ສາມາດຫຼີກລ່ຽງໄດ້ ທຸກບັນຫາທີ່ເກີດຂື້ນ ແມ່ນສ້າງຄວາມ ເສຍຫາຍ, ຜົນກະທົບຕໍ່ກັບໄຟຟ້າລາວ ແລະ ຜູ້ຊົມໃຊ້ໄຟຟ້າ.
ທ່ານໃຫ້ຮູ້ຕື່ມວ່າ: ສໍາລັບການແກ້ໄຂບັນຫາດັ່ງກ່າວ ໃນໄລຍະຜ່ານມາ ໄຟຟ້າລາວໄດ້ສຸມໃສ່ທຸກເຫື່ອແຮງ ໃນການລະດົມພະນັກງງານພາຍໃນສາຂາ ຫຼື ສູນບໍລິການທີ່ໃກ້ຄຽງ ເພື່ອມາຊ່ວຍແກ້ໄຂເລັ່ງສ້ອມ ແປງລະບົບໄຟ ຟ້າ ໃຫ້ສາມາດກັບມາສະໜອງໄຟໃຫ້ກັບສັງຄົມໄດ້ເປັນປົກກະຕິໂດຍໄວ. ດັ່ງເຫດການທີ່ເກີດຂຶ້ນຢູ່ນະຄອນຫຼວງ ວຽງຈັນ ໃນໄລຍະ 2-3 ອາທິດຜ່ານມາ ເກີດມີພາຍຸລະດູຮ້ອນກະທົບໃສ່ຫຼາຍຕົວເມືອງໃນຂອບເຂດນະຄອນຫຼວງວຽງຈັນ ສົ່ງຜົນກະທົບໃຫ້ ລະບົບໄຟຟ້າໄດ້ຮັບຄວາມເສຍຫາຍຈໍານວນຫຼາຍ ແລະ ເກີດເຫດການໄຟດັບ ເປັນບໍລິເວນກວ້າງ ເນື່ອງຈາກສາຍ ໄຟຖືກຕັດຂາດຫຼາຍຈຸດ, ເສົາຫັກ-ເສົາລົ້ມ, ອຸປະກອນເປ່ເພ ເສຍຫາຍຈໍານວນຫຼາຍ ຕໍ່ກັບເຫດການດັ່ງກ່າວ ອາດໃຊ້ເວລາດົນ ພໍສົມຄວນໃນການສ້ອມແປງແກ້ໄຂ ເກັບກູ້ລະບົບໃຫ້ສາມາດກັບມາສະໜອງໄຟເປັນປົກກະຕິ.
ສະນັ້ນ, ຕໍ່ກັບເຫດການທີ່ເກີດຂື້ນໃນໄລຍະຜ່ານມາ ໃນນາມຄະນະພັກ, ຄະນະນໍາຜູ້ບໍລິຫານລັດວິສາຫະກິດໄຟຟ້າລາວ ພ້ອມດ້ວຍ ອ້າຍເອື້ອຍ ນ້ອງພະນັກງານກຳມະກອນ ຂໍຮຽກຮ້ອງມາຍັງ ສັງຄົມ ຖ້າພົບເຫັນເຫດການໄຟຕົກ-ໄຟມອດ, ເຫດການໄຟຟ້າຂັດຂ້ອງ ຕ່າງໆ ຫຼື ປະກົດການຄົນລັກໄຟ ທ່ານສາມາດແຈ້ງສູນບໍລິການໃກ້ບ້ານທ່ານ ຫຼື ຜ່ານສາຍດ່ວນ 1199, EDL APP, Facebook Page EDL LAO, ເພື່ອເຮັດໃຫ້ໄຟຟ້າລາວ ສາມາດແກ້ໄຂບັນຫາໄດ້ຢ່າງທັນການ.
