ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເປີດກອງປະຊຸມປຶກສາຫາລືການສົ່ງເສີມວິສາຫະກິດຂະໜາດນ້ອຍ-ກາງ ກ່ຽວກັບການສົ່ງອອກ

ກອງປະຊຸມປຶກສາຫາລືການສົ່ງເສີມວິສາຫະກິດຂະໜາດນ້ອຍ-ກາງ ກ່ຽວກັບການສົ່ງອອກສິນຄ້າ ໄດ້ຈັດຂຶ້ນຢູ່ທີ່ຫ້ອງປະຊຸມໂຮງແຮມມິດຕະພາບ ແຂວງອຸດົມໄຊ ໃນຕອນເຊົ້າວັນທີ 14 ພຶດສະພາ 2019 ໂດຍການເຂົ້າຮ່ວມເປັນປະທານຂອງທ່ານ ທອງອິນ ຄຳສົມປອງ ຮອງປະທານສະພາການຄ້າ ແຂວງອຸດົມໄຊ, ເຂົ້າຮ່ວມມີທ່ານ ສາ ສີລິພົງ ຮອງກົມສົ່ງເສີ່ມວິສາຫະກິດຂະໜາດນ້ອຍ ແລະ ກາງ ກະຊວງອຸດສາຫະກຳ ແລະ ການຄ້າ, ມີຜູ້ຕາງໜ້າຈາກພາກລັດ ແລະ ທຸລະກິດ ຈາກສູນກາງ ແລະ 3 ແຂວງພາກເໜືອ ຫຼວງນ້ຳທາ, ຜົ້ງສາລີ ແລະ ແຂວງອຸດົມໄຊ ເຂົ້າຮ່ວມ.

ໃນໂອການດກ່າວເປີດກອງປະຊຸມທ່ານ ທອງອິນ ຄຳສົມປອງ ໄດ້ໃຫ້ຮູ້ວ່າ: ຈຸດປະສົງຂອງກອງປະຊຸມຄັ້ງນີ້ແມ່ນເປັນການນຳສະເໜີ ແລະ ສ້າງຄວາມເຂົ້າໃຈ ກ່ຽວກັບກົນໄກການປະສານງານ ນະໂຍບາຍ ການສົ່ງເສີມຂອງພາກລັດຂັ້ນສູນກາງ ແລະ ທ້ອງຖິ່ນ ໂດຍສະເພາະແມ່ນລະບຽບການ ຂັ້ນຕອນ ການສົ່ງເສີມ-ເອື້ອອຳນວຍຄວາມສະດວກ ທາງດ້ານການຄ້າ ການລົງທຶນ ແລະ ການສົ່ງອອກໃຫ້ແກ່ວິສາຫະກິດຂະໜາດນ້ອຍ-ກາງ ເພື່ອສົ່ງສິນຄ້າ ແລະ ສົ່ງເສີມວຽກງານການຄ້າຊາຍແດນ ຕິດພັນກັບການແກ້ໄຂບັນຫາຂໍ້ຫຸຍງຍາກ ຂອງຜູ້ປະກອບການ ເພື່ອປະກອບສ່ວນໃນການພັດທະນາສເດຖະກິດ-ສັງຄົມ ແນໃສ່ການສົ່ງເສີມການສ້າງລາຍຮັບໃຫ້ແກ່ລັດ ກໍ່ຄືພາກທຸລະກິດ ໃນການພັດທະນາແບບຍືນຍົງ ແລະ ມີສ່ວນຮ່ວມ. ໃນນັ້ນກອງປະຊຸມແມ່ນໄດ້ຮັບຟັງການສະເໜີກ່ຽວກັບ ສະພາບລວມ ແລະ ນະໂຍບາຍສົ່ງເສີ່ມການສົ່ງອອກສິນຄ້າ ກະສິກຳ-ອຸດສາຫະກຳ ທີ່ກ່ຽວຂ້ອງກັບຕະຫຼາດພາກພື້ນ ແລະ ສາກົນ, ຮັບຟັງການນຳສະເໜີໂດຍຫໍ້ຍກ່ຽວກັບ ພາລະບົດບາດ ແລະ ຮູບແບບການສົ່ງເສີມການຄ້າ-ການສົ່ງອອກ ຂອງສະພາອຸດສາຫະກຳການຄ້າແຫ່ງຊາດ ແລະ ແຂວງ ໃນນັ້ນກໍຈະໄດ້ມີການປະກອບຄຳຄິດຄຳເຫັນນຳກັນ ລະຫ່ວາງພາກລັດ ກັບ ພາກທຸລະກິດ ກ່ຽວກັບບັນຫາຂໍ້ສະດວກ ແລະ ຂໍ້ຫຸຍງຍາກ ໃນການສົ່ງອອກສິນຄ້າ ເປັນຕົ້ນແມ່ນການສົ່ງອອກສິນຄ້າກະສິກຳ ຜ່ານການຄ້າຊາຍແດນ ລາວ-ຈີນ, ການສົ່ງອອກສິນຄ້າ ສູ່ຕະຫຼາດເອີຣົບ ແລະ ປຶກສາຫາລືຂໍ້ຫຸຍງຍາກ ໃນການສົ່ງອອກສິນຄ້າທີ່ກ່ຽວຂ້ອງກັບ ຄຸນນະພາບ ແລະ ປະລິມານການຜະລິດ, ການດຳເນີນເອກະສານສົ່ງອອກ ແລະ ບຸກຄະລາກອນ, ການຂົນສົ່ງສິນຄ້າ ແລະ ຄ່າໃຊ້ຈ່າຍ ແລະ ບັນຫາການປະຕິບັດລະບຽບ-ນະໂຍບາຍການສົ່ງອອກ. ກອງປະຊຸມຄັ້ງນີ້ແມ່ນມີຄວາມໝາຍສຳຄັນໃຫ້ແກ່ພາກທຸລະກິດ ຕໍ່ກັບການສົ່ງເສີ່ມການສ້າງຄວາມເຂັ້ມແຂງ ໃຫ້ຜູ້ປະກອບການວິສາຫະກິດຂະໜາດນ້ອຍ ແລະ ກາງ ໃນການພົບປະ ການສ້າງເຄື່ອຂ່າຍ ປຶກສາຫາລື ແລກປ່ຽນບົດຮຽນຂ່າວສານ ທາງດ້ານການຄ້າ ການລົງທຶນ ການເງີນ ການຕະຫຼາດ ການເຂົ້າເຖິງແຫຼ່ງທຶນ ແລະ ນະວັດຕະກຳໃໝ່ເພື່ອພັດທະນາສິນຄ້າ ການບໍລິການໃຫ້ມີຄຸນນະພາບ ເພື່ອສ້າງມູນຄ່າເພີ່ມ ສ້າງຂີດຄວາມສາມາດ ໃຫ້ສາມາດແຂ່ງຂັນກັບພາກພື້ນ ຕາມກົນໄກເສດຖະກິດຕະຫຼາດ.

ຂ່າວຈາກ: ສີຈັນ ເກດວົງສາ