ກອງປະຊຸມ ສະໄໝສາມັນ ເທື່ອທີ 7 ຂອງສະພາປະຊາຊົນແຂວງອຸດົມໄຊ ຊຸດທີ II ໄດ້ເປີດຂຶ້ນໃນວັນທີ 18 ກໍລະກົດນີ້ ຢູ່ ແຂວງອຸດົມໄຊ ໂດຍພາຍໃຕ້ການເປັນປະທານຂອງ ທ່ານ ຄຳດີ ວົງລ້ອມ ປະທານສະພາປະຊາຊົນແຂວງອຸດົມໄຊ ໂດຍການໃຫ້ກຽດເຂົ້າຮ່ວມຂອງທ່ານ ບຸນຄົງ ຫຼ້າຈຽມພອນ ເຈົ້າແຂວງອຸດົມໄຊ, ມີບັນດາສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄຳດີ ວົງລ້ອມ ກ່າວວ່າ: ກອງປະຊຸມຄັ້ງນີ້ ຈະໄດ້ສຸມໃສ່ຄົ້ນຄວ້າ, ພິຈາລະນາ, ຕົກລົງບັນຫາສໍາຄັນພື້ນຖານຂອງແຂວງຄື: ຮັບຟັງການລາຍງານໂດຍສັງເຂບ ຂອງທ່ານເຈົ້າແຂວງ ກ່ຽວກັບການບໍລິຫານລັດ ປະຈຳ 6 ເດືອນຕົ້ນ ປີ 2024 ແລະ ທິດທາງແຜນການປະຈຳ 6 ເດືອນທ້າຍປີ 2024; ຮັບຟັງການລາຍງານ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປະຈຳ 6 ເດືອນຕົ້ນປີ 2024 ແລະ ທິດທາງແຜນການປະຈຳ 6 ເດືອນທ້າຍປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ; ຮັບຟັງການລາຍງານ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳ 6 ເດືອນຕົ້ນປີ 2024 ແລະ ທິດທາງແຜນການປະຈຳ 6 ເດືອນທ້າຍປີ 2024; ຮັບຟັງການລາຍງານຫຍໍ້ ການຈັດຕັ້ງປະຕິບັດ ຄໍາສັ່ງເລກທີ 13/ນຍ, ວ່າດ້ວຍການແກ້ໄຂບັນຫາເຄັ່ງຮ້ອນທາງດ້ານເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ໜີ້ສິນ ຢູ່ ແຂວງອຸດົມໄຊ ໃນ 6 ເດືອນຕົ້ນປີ 2024 ແລະ ທິດທາງແຜນການປະຈຳ 6 ເດືອນທ້າຍປີ 2024; ຮັບຟັງການລາຍງານ ການຈັດຕັ້ງປະຕິບັດ ການຂຸດຄົ້ນແຮ່ທາດ ຢູ່ ແຂວງອຸດົມໄຊ ປີ 2021 ຫາ 2024; ຮັບຟັງການລາຍງານ ການຈັດຕັ້ງປະຕິບັດບັນດາຄາດໝາຍພັດທະນາຊົນນະບົດ ແລະ ແກ້ໄຂຄວາມ ທຸກຍາກ ປີ 2021 ຫາ 2024; ຮັບຟັງການລາຍງານ ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕິດພັນກັບການແກ້ໄຂປະກົດການຫຍໍ້ທໍ້ໃນສັງຄົມ ປະຈຳ 6 ເດືອນຕົ້ນປີ ແລະ ທິດທາງແຜນການປະຈຳ 6 ເດືອນທ້າຍປີ 2024; ຮັບຟັງການລາຍງານ ຂອງຄະນະປະຈຳສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ຂອງສະພາປະຊາຊົນແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການປະຈຳ 6 ເດືອນທ້າຍປີ 2024. ພ້ອມນີ້ ກອງປະຊຸມຈະໄດ້ ຄົ້ນຄວ້າ, ພິຈາລະນາ, ຮັບຮອງເອົາການສະເໜີສ້າງນິຕິກຳໃຕ້ກົດໝາຍຂອງແຂວງ ຈຳນວນ 3 ສະບັບຄື: ຮ່າງຂໍ້ຕົກລົງວ່າດ້ວຍ ການກຳນົດເຂດສະຫງວນນໍ້າ ແລະ ຊັບພະຍາກອນນໍ້າ ຢູ່ ແຂວງອຸດົມໄຊ; ຮ່າງຂໍ້ຕົກລົງວ່າດ້ວຍ ການດໍາເນີນທຸລະກິດບໍລິການ ດ້ານເຕັກໂນໂລຊີການສື່ສານຂໍ້ມູນຂ່າວສານຢູ່ ແຂວງອຸດົມໄຊ; ຮ່າງຂໍ້ຕົກລົງເຈົ້າແຂວງ ວ່າດ້ວຍການຄຸ້ມຄອງ ການບໍລິການ, ການກໍ່ສ້າງ ແລະ ຕິດຕັ້ງໄຟຟ້າ ຢູ່ແຂວງອຸດົມໄຊ; ນອກຈາກນີ້, ກອງປະຊຸມຍັງຈະໄດ້ຮັບຟັງການຊີ້ແຈງ, ຕອບຄໍາຊັກຖາມຈາກພາກສ່ວນກ່ຽວຂ້ອງຈໍານວນໜຶ່ງ ຕໍ່ຄໍາຊັກຖາມຂອງບັນດາທ່ານສະມາຊິກສະພາປະຊາຊົນແຂວງ ອີກຈຳນວນໜຶ່ງ.
ຂ່າວ: ອຸດົມໄຊ
