ພິທີມອບ-ຮັບ ແລະ ເປີດນຳໃຊ້ໂຄງການກໍ່ສ້າງຂົວເບຕົງເສີມເຫຼັກອັດແຮງ ຂ້າມນ້ຳເຊຈຳພອນ ເຂດບ້ານນາທົ່ມ ເມືອງອາດສະພອນ ແຂວງສະຫວັນນະເຂດ ໄດ້ຈັດຂຶ້ນໃນວັນທີ 20 ສິງຫາຜ່ານມາ ໂດຍການເປັນກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ເຈົ້າແຂວງສະຫວັນນະເຂດ, ທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ ທ່ານ ບຸນລັດ ລໍບານເຢັນ ວ່າການເຈົ້າເມືອງອາດສະພອນ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ຄຳຜອງ ສົມວິຈິດ ຫົວໜ້າພະແນກໂຍທາທິການ ແລະ ຂົນສົ່ງ ( ຍທຂ ) ແຂວງໄດ້ລາຍງານໃຫ້ຮູ້ວ່າ: ໂຄງການກໍ່ສ້າງຂົວເບຕົງເສີມເຫຼັກອັດແຮງຂ້າມນ້ຳເຊຈຳພອນ ເຂດບ້ານນາທົ່ມຈຸດສຸມນາເລົ່າ ເມືອງອາດສະພອນແມ່ນນອນຢູ່ໃນບຸລິມະສິດເພື່ອແກ້ໄຂການສັນຈອນໃຫ້ທຽວໄດ້ 2 ລະດູຕາມດຳລັດ 348/ລບ ວ່າດ້ວຍມາດຕະຖານພົ້ນທຸກ ແລະ ມາດຕະຖານພັດທະນາ. ຍ້ອນເຫັນໄດ້ຄວາມສຳຄັນຈຳເປັນ ແລະ ຄວາມເປັນຫ່ວງເປັນໄຍຕໍ່ປະຊາຊົນການນຳແຂວງ ຈຶ່ງໄດ້ຕົກລົງກໍ່ສ້າງຂົວຂ້າມນໍ້າເຊຈຳພອນຈຸດດັ່ງກ່າວ ໂດຍນຳໃຊ້ງົບປະມານເງິນເກີນແຜນປີ 2023 ຊຶ່ງການກໍ່ສ້າງຂົວດັ່ງກ່າວສາມາດແກ້ໄຂປະຊາຊົນໄດ້ຈຳນວນ 13 ບ້ານ, ມີປະຊາກອນ 10.927 ຄົນໃຫ້ທຽວໄປ-ມາໄດ້ສະດວກສະບາຍ ຊຶ່ງມີຄວາມຍາວ 100 ແມັດ, ກວ້າງ 5,5 ແມັດ, ມີ 4 ຊ່ວງ, 5 ເສົາ ລວມມູນຄ່າການກໍ່ສ້າງ 19.99 ຕື້ກວ່າກີບ ໂດຍບໍລິສັດ VLP ພັດທະນາກໍ່ສ້າງຈຳກັດຜູ້ດຽວ ເປັນຜູ້ຮັບເໝົາກໍ່ສ້າງມີໄລຍະເວລາກໍ່ສ້າງ 24 ເດືອນ (15/3/2024-15/3/2026), ແຕ່ການຈັດຕັ້ງປະຕິບັດຕົວຈິງທາງບໍລິສັດໄດ້ກໍ່ສ້າງສຳເລັດ 98.50% ສາມາດເປີດນຳໃຊ້ກ່ອນແຜນການ ຫຼືກ່ອນສັນຍາ 18 ເດືອນ. ໃນນີ້, ບໍລິສັດ VLP ໄດ້ປະກອບສ່ວນດອກໄຟແສງຕາເວັນຕິດຕັ້ງໃສ່ຂົວຈຳນວນ 9 ຊຸດ ມາຮອດປັດຈຸບັນຍັງມີວຽກຈຳນວນໜຶ່ງທີ່ຍັງບໍ່ສຳເລັດຄື: ວຽກຖົມດິນຍົກລະດັບທາງເຂົ້າຂົວ, ວຽກກັນເຈື່ອນ, ວຽກແຜ່ນເບຕົງທາງເຂົ້າຂົວເທົ່າກັບ 1.50% ຂອງໜ້າວຽກທັງໝົດ ຊຶ່ງທາງບໍລິສັດຈະສືບຕໍ່ພາຍຫຼັງລະດູຝົນໃຫ້ສຳເລັດ 100% ພາຍໃນປີ 2024.
ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ບໍລິສັດ VLP ພັດທະນາກໍ່ສ້າງຈຳກັດຜູ້ດຽວ ທີ່ໄດ້ເອົາໃຈໃສ່ໃນການກໍ່ສ້າງໂຄງການຈົນສາມາດສຳເລັດກ່ອນແຜນການ ເຮັດໃຫ້ປະຊາຊົນໃນຈຳນວນ 13 ບ້ານຂອງເມືອງອາດສະພອນໄດ້ຊົມໃຊ້ຂົວຂ້າມນ້ຳເຊຈຳພອນ ໃນຊ່ວງລະດູຝົນປີນີ້ ຊຶ່ງເປັນເງື່ອນໄຂສຳຄັນໜຶ່ງທີ່ຈະນຳພາປະຊາຊົນໃຫ້ຫຼຸດພົ້ນອອກຈາກຄວາມທຸກຍາກເທື່ອລະກ້າວ ພ້ອມດຽວກັນນີ້, ທ່ານເຈົ້າແຂວງໄດ້ເນັ້ນໜັກ ໃຫ້ອຳນາດການປົກຄອງທ້ອງຖິ່ນຊີ້ນຳ-ນຳພາປະຊາຊົນທຳການຜະລິດໃຫ້ຫຼາຍ ກາຍເປັນສິນຄ້າເທື່ອລະກ້າວ ເພື່ອຍົກລະດັບຊີວິດການເປັນຢູ່ໃຫ້ດີຂຶ້ນກວ່າເກົ່າ ແລະ ພ້ອມກັນນຳໃຊ້ຂົວແຫ່ງດັ່ງກ່າວນີ້ໃຫ້ເກີດປະໂຫຍດສູງສຸດ.
ທ່ານ ບຸນໂຈມ ອຸບົນປະເສີດ ຍັງໄດ້ແຈ້ງຂ່າວດີແກ່ປະຊາຊົນວ່າ: ທາງແຂວງຈະຊ່ວຍຍົກລະດັບເສັ້ນທາງທີ່ເຊື່ອມຕໍ່ຈາກເມືອງເຂົ້າມາຂົວຂ້າມເຊຈຳພອນ ຊຶ່ງຈະເລີ່ມຈັດຕັ້ງປະຕິບັດໃນລະດູແລ້ງຕໍ່ໜ້າ; ສຳລັບລະດູຝົນປີນີ້ທາງບໍລິສັດ VLP ຈະຊ່ວຍໃນການປັບປຸງເສັ້ນທາງໃຫ້ກ່ອນໃນບ່ອນທີ່ຍັງພົບຄວາມຫຍຸ້ງຍາກໃນເສັ້ນທາງດັ່ງກ່າວ. ໃນພິທີທ່ານເຈົ້າແຂວງໄດ້ໃຫ້ກຽດລັ່ນຄ້ອງ 9 ບາດ, ຕັດແຖບຜ້າເພື່ອເປີດນຳໃຊ້ຂົວຂ້າມເຊຈຳພອນ ຢ່າງເປັນທາງການ.
ຂ່າວ: ສະຫວັນນະເຂດ
