ນັກກິລາຈໍານວນ 324 ຄົນ, ຍິງ 47 ຄົນ ຈາກ 24 ພາກສ່ວນ, ໃນນັ້ນມີ 5 ແຂວງ ຄື: ຈໍາປາສັກ, ສະຫວັນນະເຂດ, ຄຳມ່ວນ, ຫຼວງພະບາງ ແລະ ອຸດົມໄຊ, ລວມເຖິງນັກກິລາຈາກບັນດາສະໂມສອນອ້ອມຂ້າງສູນກາງ ແລະ ນັກກິລາອິດສະລະທີ່ບໍ່ມີສັງກັດ ເຂົ້າຮ່ວມແຂ່ງຂັນດອກປີກໄກ່ ຊິງຂັນປະທານສະພາແຫ່ງຊາດ ຄັ້ງທີ 22 ປະຈໍາປີ 2023 (22nd BeerLao Badminton Championship 2023 Presented by Lao Brewery Company) ທີ່ສະຫະພັນດອກປີກໄກ່ແຫ່ງຊາດລາວ ຈັດຂຶ້ນຢູ່ສະໂມສອນ ດອກປີກໄກ່ ເສດຖາ, ເຂດບ້ານບຶງຂະຫຍອງ, ເມືອງສີສັດຕະນາກ, ນະຄອນຫຼວງວຽງຈັນ ໃນລະຫວ່າງວັນທີ 23-26 ສິງຫານີ້, ມີຊິງໄຊທັງໝົດ 13 ລາຍການ, ຊິງເງິນລາງວັນລວມທັງໝົດ 146 ລ້ານກວ່າກີບ ໂດຍໄດ້ຮັບການອຸປະຖໍາຈາກ ບໍລິສັດ ເບຍລາວ ຈໍາກັດ, ມູນຄ່າ 362 ລ້ານກີບ.
ຈຸດປະສົງການຈັດແຂ່ງຂັນຄັ້ງນີ້ ເພື່ອສະເຫຼີມສະຫຼອງວັນລັດຖະທໍາມະນູນ, ວັນທີ 15 ສິງຫາ ຄົບຮອບ 32 ປີ, ທັງເປັນການສ້າງບັນຍາກາດແຂ່ງຂັນກິລາດອກປີກໄກ່ພາຍໃນປະເທດໃຫ້ມີຄວາມຄຶກຄື້ນ ເພື່ອໃຫ້ນັກກິລາມີໂອກາດທົດສອບຄວາມສາມາດຂອງຕົນ ແລະ ສາມາດຄັດເລືອກໄດ້ນັກກິລາດີເດັ່ນ ເພື່ອເປັນນັກກິລາທີມຊາດຮຸ່ນເຍົາວະຊົນທົ່ວໄປ, ຊຶ່ງການແຂ່ງຂັນຄັ້ງນີ້ຈະຄັດເລືອກເອົາອັນດັບທີ 1 ແລະ ອັນດັບທີ 2 ອາຍຸບໍ່ເກີນ 18 ປີ ເພື່ອເປັນຕົວແທນທີມຊາດເຂົ້າຮ່ວມການແຂ່ງ ຂັນກິລານັກຮຽນອາຊຽນທີ່ຈະຈັດຂຶ້ນຢູ່ ສສ ຫວຽດນາມ ໃນທ້າຍເດືອນກັນຍາທີ່ຈະມາເຖິງນີ້.
ສໍາລັບພິທີເປີດການແຂ່ງຂັນກິລາດັ່ງກ່າວຢ່າງເປັນທາງການ ຈັດຂຶ້ນໃນຕອນແລງວັນທີ 23 ສິງຫານີ້ ໂດຍການໃຫ້ກຽດເຂົ້າຮ່ວມຂອງ ທ່ານ ນາງ ທຸມມາລີ ວົງພະ ຈັນ, ປະທານກໍາມາທິການວັດທະນະທຳ- ສັງຄົມ, ສະພາແຫ່ງຊາດລາວ, ທ່ານ ນາງ ຂັນທະລີ ສີຣິພົງພັນ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ທັງເປັນຮອງປະທານຄະນະກຳມະການໂອແລມປິກແຫ່ງຊາດລາວ, ທ່ານ ໄຊບັນດິດ ຣາຊະພົນ, ຮອງປະທານ-ເລຂາທິການ ສະຫະພັນດອກປີກໄກ່ແຫ່ງຊາດລາວ, ທ່ານ ຈັນສະໝອນ ຜ່ອງຈັນທາ, ຜູ້ອໍານວຍການຝ່າຍການຕະຫຼາດ ບໍລິສັດ ເບຍລາວ ຈຳກັດ, ພ້ອມດ້ວຍແຂກຮັບເຊີນ, ຄູຝຶກ ແລະ ນັກກິລາເຂົ້າຮ່ວມ.
