ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ສູນກາງຊາວໜຸ່ມປະຊາຊົນ ປະຕິວັດລາວ ໂດຍໄດ້ຮັບການສະໜັບສະໜູນຈາກລັດຖະບານ ສ.ເກົາຫຼີ ຜ່ານໂຄງການ ຄອຍກາ ໄອບີແອສ ຈັດການແຂ່ງຂັນຜູ້ປະ ກອບການທຸລະກິດລາວ 2023 ໃນວັນທີ 27 ທັນວາ 2023, ທີ່ໂຮງແຮມ ຄຼາວພາຊ່າ, ນະຄອນຫລວງວຽງຈັນ ໂດຍມີ ທ່ານ ທອງຈັນ ພູມີພັນ, ຮອງເລຂາຄະນະບໍລິຫານງານ ສູນກາງຊາວໜຸ່ມ ປະຊາຊົນ ປະຕິວັດລາວ, ທ່ານ ນາງ ຄິມ ມູຍ ຈີນ, ປະທານອົງການຄອຍກາ ປະຈໍາ ສປປ ລາວ, ພ້ອມດ້ວຍຜູ້ບໍລິຫານ ບໍລິສັດໂຊລຸຍເຕັກລາວ ຈຳ ກັດ, ຄະນະກົມອ້ອມຂ້າງສູນກາງຊາວໜຸ່ມ, ບັນດາຜູ້ຕາງໜ້າຄະ ນະຊາວໜຸ່ມປະ ຊາຊົນປະຕິວັດລາວ ກະຊວງ ແລະ ອົງການທີ່ກ່ຽວຂ້ອງ ແລະ ບັນດາຊາວໜຸ່ມທີ່ກຳ ລັງຄົ້ນຄິດການສ້າງທຸລະ ກິດເຂົ້າຮ່ວມ.
ຈຸດປະສົງຂອງການຈັດງານຄັ້ງນີ້ ເພື່ອເປັນການສົ່ງເສີມຂະ ບວນການສ້າງວຽກເຮັດງານທໍາຂອງຊາວໜຸ່ມໃຫ້ສອດຄ່ອງກັບຍຸກສະໄໝຂອງໂລກດິຈິຕອລ ກໍຄື ການນໍາໃຊ້ເຕັກໂນໂລຊີທີ່ທັນສະໄໝເຂົ້າໃນການເຮັດທຸລະກິດຕ່າງໆ.
ໃນໂອກາດກ່າວເປີດງານໃນຄັ້ງນີ້ ທ່ານ ທອງຈັນ ພູມີພັນ ໃຫ້ຮູ້ວ່າ: ການສະ ໜັບສະໜູນ ຂອງລັດຖະບານ ສ. ເກົາຫຼີ ໂດຍຜ່ານໂຄງການ ຄອຍກາ ໄອບີແອສ (KOICA IBS) ເລີ່ມແຕ່ປີ 2016 ເປັນຕົ້ນມາ ຈົນມາຮອດໄລຍະທີ່ 3 ທີ່ເອີ້ນວ່າ ໂຄງ ການສົ່ງເສີມການນຳໃຊ້ໄອທີ ແລະ ການສ້າງທຸລະກິດສະຕາດອັບ 2023-2025.
ໃນໄລຍະ 1 ປີ ຂອງໂຄງການໃນໄລຍະທີ3, ສິ່ງທີ່ສໍາຄັນທີ່ສຸດ ນອກຈາກການຊວ່ຍເຫຼືອໃນລະດັບສູນກາງ ໂຄງການຍັງໃຫ້ການສະໜັບສະໜູນ ສ້າງຫ້ອງໄອທີໃຫ້ກັບຊາວໜຸ່ມໃນລະດັບແຂວງ ແລະ ຍົກລະດັບການນໍາໃຊ້ ໄອທີ ເຂົ້າສູ່ການພັດທະນາອາຊີບ ກໍຄື ການລິເລີ່ມດໍາເນີນທຸລະກິດ (ທຸລະກິດ ສະຕາດອັບ) ສໍາລັບກຸ່ມຊາວ ໜຸ່ມ ແລະ ປູກຈິດສຳນຶກຊາວໜຸ່ມໃຫ້ສາມາດຄິດຄົ້ນສ້າງອາຊີບແບບໃໝ່ດວ້ຍຕົນ ເອງ ເພື່ອໃຫ້ສອດຄ່ອງກັບຍຸກສະໄໝຂອງໂລກ ດີຈິຕອລ.
ທ່ານ ທອງຈັນ ພູມີພັນ ໃຫ້ຮູ້ຕື່ມວ່າ: ໂຄງການນີ້ ຍັງເປັນໂຄງ ການທີ່ຜັນຂະຫຍາຍຍຸດທະສາດການພັດທະນາຊາວໜຸ່ມ ແລະ ເຍົາວະຊົນ 2030 ໂດຍສະເພາະແມ່ນທິດທາງຍຸດທະສາດ ທີ 3 ທີ່ເວົ້າເຖິງການສ້າງວຽກເຮັດງານທຳ ແລະ ສ້າງຕຳແໜ່ງຜູ້ປະ ກອບສຳລັບຊາວໜຸ່ມ, ແລະ ເປັນການ ຜັນຂະຫຍາຍຂະບວນ ການສີ່ບຸກ ໂດຍສະເພາະແມ່ນ ບຸກທີ 4 ຂະບວນການສ້າງວຽກເຮັດງານທໍາ ເຊິ່ງການສ້າງຊາວ ໜຸ່ມເພື່ອສ້າງທຸລະກິດສະຕາດອັບ ແມ່ນຂະບວນການໜຶ່ງທີ່ເຕົ້າໂຮມຊາວໜຸ່ມ ເພື່ອຄົ້ນຄວ້າສ້າງຕຳແໜ່ງງານໃໝ່ດວ້ຍຕົວເຂົາເອງ. ອີກດ້ານໜຶ່ງ ເພື່ອເປັນ ການປະກອບສວ່ນ ແລະ ສ້າງເງື່ອນໄຂໃຫ້ແກ່ຍຸດທະສາດຂອງລັດຖະບານ ສປປ ລາວ ທີ່ກຳລັງສຸມໃສ່ ສ້າງນິຕິກຳເປັນຕົ້ນ ດຳລັດວ່າດ້ວຍ ການສົ່ງເສີມທຸລະກິດແບບສະຕາດອັບ.
ໃນງານຄັ້ງນີ້, ກ່ອນອື່ນຜູ້ເຂົ້າຮ່ວມໄດ້ຮັບຟັງການລາຍງານກ່ຽວກັບຜ່ານໂຄງ ການ ຄອຍກາ ໄອບີແອສ2 ຕໍ່ການຜັນ ຂະຫຍາຍແຜນຍຸດທະສາດພັດທະນາຊາວໜຸ່ມ 2030 ແລະ ນະໂຍບາຍຂອງລັດຖະບານ, ແຜນກິດຈະກໍາຂອງໂຄງການ ແລະ ແຜນການໃນອະນາຄົດ, ການແນະນໍາກ່ຽວກັບກົດໝາຍການ ລົງທຶນ, ໂອກາດອອກສູ່ສາກົນ ແລະ ການສ້າງສະຕາດອັບຢູ່ປະ ເທດລາວ ແລະ ການລະດົມທຶນໃນເບື້ອງຕົ້ນສໍາລັບທຸລະກິດສະຕາດອັບ. ຈາກນັ້ນ 10 ຄະນະທີ່ເຂົ້າຮ່ວມແຂ່ງຂັນໄດ້ຂຶ້ນສະເໜີແຜນທຸລະກິດສະຕາດອັບຂອງຕົນໂດຍມີຄະນະກໍາມະການຄົນລາວ ແລະ ຕ່າງປະເທດເປັນຜູ້ໃຫ້ຄະແນນ.