ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ເມື່ອບໍ່ດົນມານີ້, ກະຊວງອຸດສາຫະກຳ ແລະ ການຄ້າ ຈັດພິທີເປີດກາໝາຍຫັດຖະກຳ ແຫ່ງຊາດ ຢ່າງເປັນທາງການ ໂດຍການສະໜັບສະໜູນຈາກ ອົງການພັດທະນາສາກົນ ສະຫະລັດອາເມລິກາ (USAID) ເຊິ່ງກາໝາຍກັ່ງກ່າວ ແມ່ນຖືເປັນການຍົກລະດັບໃຫ້ແກ່ ຊ່າງຫັດຖະກຳທ້ອງຖິ່ນ ແລະ ຜູ້ຜະລິດເຄື່ອງຫັດຖະກຳ, ສ້າງຄວາມເຂັ້ມແຂງໃຫ້ເຂົາເຈົ້າ ສາມາດຍົກລະດັບຄຸນນະພາບຂອງ ຜະລິດຕະພັນ ແລະ ແຂ່ງຂັນໄດ້ຢ່າງມີປະສິດທິ ພາບໃນເວທີສາກົນ ເຂົ້າຮ່ວມໃນງານຄັ້ງນີ້, ມີ ທ່ານ ມະໂນທອງ ວົງໄຊ ຮອງລັດຖະມົນຕີກະຊວງ ອຸດສາຫະກຳ ແລະ ການຄ້າ ແລະ ທ່ານ ນາງ ມິແຊວ ເອົ້າລໍ ຕາງໜ້າຈາກສະຖານທູດ ສະຫະລັດ ອາເມລິກາ ປະຈຳ ສປປ ລາວ, ມີຜູ້ຕາງໜ້າຈາກບັນດາກະຊວງ, ບໍລິສັດເອກະຊົນ ແລະ ອົງການຈັດຕັ້ງສາກົນ ເຂົ້າຮ່ວມ.
ທ່ານ ມະໂນທອງ ວົງໄຊ ໃຫ້ຮູ້ວ່າ: ການເປີດກາໝາຍຫັດຖະກຳແຫ່ງຊາດ ແມ່ນການຜັນຂະຫຍາຍ ແຜນພັດທະນາອຸດສາຫະກຳປຸງແຕ່ງ ແລະ ຫັດຖະກຳ 2021-2025 ກໍຄື ພັດທະນາອຸດສາຫະກຳປຸ່ງແຕ່ງ ແລະ ການຄ້າ 5 ປີ ຄັ້ງທີ V ຕາມແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ໂດຍໃຫ້ສອດຄ່ອງກັບນະໂຍບາຍລັດຖະບານ ແລະ ຄວາມຕ້ອງການຕົວຈິງຂອງຜະລິດຕະພັນຫັດຖະກຳຕະຫລາດພາຍໃນ ພາກພື້ນ ແລະ ສາກົນ ພາຍໃຕ້ການສະໜັບສະໜູນຂອງ ອົງການ USAID. ກາໝາຍຫັດຖະກໍາ ແຫ່ງຊາດ ເປັນເຄື່ອງມືໜຶ່ງໃນການສົ່ງເສີມທາງດ້ານການຜະລິດ ແລະ ການຕະຫລາດ ທີ່ມີຄວາມໝາຍຄວາມສຳຄັນໃຫ້ແກ່ຫັດຖະກໍາລາວ ໃຫ້ມີຄວາມໂດດເດັ່ນ ແລະ ເປັນທີ່ຮູ້ຈັກຂອງສັງຄົມຢ່າງກວ້າງຂວາງ ແລະ ທົ່ວເຖິງ; ກາໝາຍຫັດຖະກໍາ ແຫ່ງຊາດ ໄດ້ຖືກຮັບຮອງຢ່າງເປັນທາງການຈາກ ລັດຖະບານ ຕາມແຈ້ງການຈາກຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 1871/ຫສນຍ, ລົງວັນທີ 02 ຕຸລາ 2023.
ໂອກາດນີ້, ທ່ານ ນາງ ມິແຊວ ເອົ້າລໍ ໄດ້ສະແດງຄວາມຊົມເຊີຍຕໍ່ ກະຊວງອຸດສາຫະກຳ ແລະ ການຄ້າ ທີ່ເປັນເຈົ້າການນຳພາ ການເພີ່ມທະວີຄວາມສາມາດແຂ່ງຂັນພາກເອກະຊົນ ໂດຍຜ່ານການສ້າງກາໝາຍຫັດຖະກຳ ແຫ່ງຊາດ. ງານການເປີດກາໝາຍຫັດຖະກຳແຫ່ງຊາດ ເປັນການສະເຫລີມສະຫລອງຄວາມພະຍາຍາມຂອງພວກເຮົາຮ່ວມກັນ ແລະ ຮຽກຮ້ອງໃຫ້ທຸກພາກສ່ວນກ່ຽວຂ້ອງ ນຳໃຊ້ກາໝາຍຫັດຖະກຳແຫ່ງຊາດ ນີ້ ເພື່ອຍົກລະດັບເຄື່ອງຫັດຖະກຳຂອງລາວໃຫ້ ເຂົ້າສູ່ຕະຫລາດພາກພື້ນ ແລະ ສາກົນ.
ກາໝາຍຫັດຖະກຳ ແຫ່ງຊາດ ຈະມີບົດບາດສໍາຄັນໃນການສົ່ງເສີມມໍລະດົກວັດທະນະທໍາ ອັນໂດດເດັ່ນຂອງ ສປປ ລາວ ຜ່ານເຄື່ອງຫັດຖະກໍາ ດ້ວຍການວາງສະແດງເຄື່ອງຫັດຖະກໍາ ໃຫ້ທົ່ວໂລກໄດ້ຮັບຮູ້, ກາໝາຍຫັດຖະກຳ ແຫ່ງຊາດ ຈະສ້າງຄວາມຮັບຮູ້ກ່ຽວກັບມໍລະດົກທາງດ້ານວັດທະນະທໍາ ອັນອຸດົມສົມບູນຂອງປະເທດ ແລະ ກະຕຸ້ນການທ່ອງທ່ຽວ ແລະ ສາມາດສ້າງຜົນກະທົບທາງບວກດ້ານເສດຖະກິດໃນທ້ອງຖິ່ນ.
ໃນງານເປີດໂຕກາໝາຍຫັດຖະກຳ ແຫ່ງຊາດຄັ້ງນີ້, ປະກອບມີຫລາຍກິດຈະກຳປິ່ນອ້ອມ ໂດຍສະເພາະການເດີນແບບເຄື່ອງຫັດຖະກໍາ Fashion show, ວາງສະແດງສິນຄ້າຫັດຖະກໍາເຊັ່ນ: ຫັດຖະກຳແຜ່ນແພ, ໄມ້, ຫວາຍ ແລະ ໄມ້ປ່ອງ, ເຄື່ອງປະດັບ-ເຄື່ອງເອ້ຍ້ອງ ແລະ ອື່ນໆ. ພ້ອມກັນນີ້, ຍັງມີການຝຶກອົບຮົມເຜີຍແຜ່ຂໍ້ຕົກລົງວ່າດ້ວຍກາໝາຍຫັດຖະກຳ ແຫ່ງຊາດ ແລະ ການສົ່ງອອກສິນຄ້າຫັດຖະກຳ ໃຫ້ແກ່ພາກລັດ ແລະ ພາກທຸລະກິດ ໄດ້ຮັບຮູ້, ເຂົ້າໃຈ ແລະ ປະຕິບັດໃນທາງດຽວກັນ.
ຂ່າວຈາກ: ຂປລ