ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 07 ກຸມພາ 2024 ໄດ້ເປີດຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະເມືອງ ເອເລັກໂຕຣນິກ eCRVS ຂຶ້ນຢ່າງເປັນທາງການ ທີ່ນະຄອນປາກເຊ, ແຂວງຈໍາປາສັກ ໂດຍການເປັນປະທານຂອງ ທ່ານ ທອງຈັນ ມະນີໄຊ ກໍາມະການສູນ ກາງພັກ, ເລຂາຄະນະພັກ -ລັດຖະມົນຕີກະຊວງພາຍໃນ.
ທ່ານ ສາຍທອງ ໄຊຍະວົງ ຮອງເລຂາພັກແຂວງ-ປະທານສະພາປະຊາຊົນແຂວງຈໍາປາສັກ ໄດ້ກ່າວຕ້ອນຮັບວ່າ: ມີຄວາມພາກພູມໃຈເປັນຢ່າງຍິ່ງທີ່ທາງກະຊວງພາຍໃນ ໄດ້ເລືອກເອົາແຂວງຈຳປາສັກ ໂດຍສະເພາະແມ່ນ ເມືອງຈຳປາສັກ ເພື່ອເປີດຂະບວນການຈົດທະບຽນການເກີດ ຜ່ານລະບົບຄຸ້ມຄອງຂໍ້ມູນພົນລະເມືອງ ເອເລັກໂຕຣນິກ eCRVS ໃນຄັ້ງນີ້, ຄືດັ່ງທີ່ພວກເຮົາຮູ້ນໍາກັນແລ້ວວ່າວຽກງານການຄູ້ມຄອງພົນລະເມືອງ ເປັນວຽກງານຍຸດທະສາດແຫ່ງການປົກຄອງຂອງພັກ-ລັດ, ເພາະວ່າພົນລະເມືອງປະກອບດ້ວຍຫຼາຍຊົນເຜົ່າ-ສາສະໜາ, ເຊີ່ງເປັນກໍາລັງແຫ່ງຄວາມສາມັກຄີໃນການປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເຫດຊາດກໍ່ຄືບ້ານຊ່ອງຂອງຕົນ ຍ້ອນເຫັນໄດ້ຄວາມສໍາຄັນແນວນັ້ນ, ພັກ-ລັດບໍ່ວ່າຍາມໃດກໍໄດ້ເອົາໃຈໃສ່ຄຸ້ມຄອງ, ດ້ວຍການຫັນເປັນນະໂຍບາຍ, ກໍານົດໄວ້ໃນລັດຖະທໍາມະນູນ, ກົດໝາຍ ແລະ ນິຕິກໍາຕ່າງໆ.ໃນໄລຍະຜ່ານມາການຄຸ້ມຄອງພົນລະເມືອງແມ່ນມີຄວາມຫຍຸ້ງຍາກສັບສົນ, ການເກັບກໍາສະຖິຕິການເໜັງຕີງຂອງພົນລະເມືອງບໍ່ມີຄວາມຊັດເຈນ, ເຮັດໃຫ້ສັງຄົມບໍ່ມີຄວາມສະຫງົບ ແລະ ເປັນລະບຽບຮຽບຮ້ອຍ ເປັນຕົ້ນ: ການຍົກຍ້າຍທີ່ຢູ່ອາໄສຈາກທ້ອງຖີ່ນນີ້ໄປຢູ່ທ້ອງຖີ່ນອື່ນບໍ່ເປັນປົກກະຕິ, ແຕ່ຈໍານວນໜຶ່ງກໍ່ມີເງື່ອນໄຂ ແລະ ດໍາເນີນຕາມຂັ້ນຕອນ ຖືກຕ້ອງຕາມລະບຽບກົດໝາຍ, ຈໍານວນໜຶ່ງກໍ່ໄປໂດຍບໍ່ຖືກຕ້ອງ ແລະ ສ້າງຄວາມບໍ່ສະຫງົບ ຫຼື ປະກົດການຫຍໍ້ທໍ້ເກີດຂຶ້ນຢູ່ທ້ອງຖີ່ນອື່ນ. ການຈົດທະ ບຽນຄອບຄົວຕ່າງໆ ແມ່ນຍັງໃຊ້ລະບົບເຈ້ຍສໍຢູ່ ເຮັດໃຫ້ມີຄວາມ ຫຍຸ້ງຍາກ ໃນການບໍລິການຮັບໃຊ້ປະຊາຊົນ ແລະ ການຄຸ້ມຄອງ, ຕິດຕາມກວດກາ. ການເປີດຂະບວນການຈົດທະບຽນການເກີດ ຜ່ານລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ eCRVS ໃນຄັ້ງນີ້ ມີຄວາມສໍາຄັນ ແລະ ຈໍາເປັນຫຼາຍທີ່ສຸດ ສໍາລັບແຂວງ ຈຳປາສັກ ເພື່ອຈະຫັນວຽກງານຄຸ້ມຄອງພົນລະເມືອງໄປສູ່ລະບົບທີ່ທັນສະໄໝ ຫຼື ວ່າຍຸກ 4.0; ຜ່ານມາຄະນະພັກ, ອົງການປົກຄອງແຂວງພວກ ໄດ້ໃຫ້ຄວາມສໍາຄັນຫຼາຍຕໍ່ກັບວຽກງານດັ່ງກ່າວ ໂດຍໄດ້ກໍານົດ ເຂົ້າເປັນວຽກງານ ໜຶ່ງໃນແຜນພັດທະນາເສດຖະ ກິດ-ສັງ ຄົມຂອງແຂວງ, ໂດຍສະເພາະແມ່ນ ວຽກງານຈົດທະບຽນ ແລະ ສະຖິຕິພົນລະເມືອງ, ເຊິ່ງໄດ້ກໍານົດຄາດໝາຍສູ້ຊົນຮອດປີ 2025 ຈະສູ້ຊົນໃຫ້ພົນລະ ເມືອງ ແລະ ເດັກເກີດໃໝ່ໃຫ້ໄດ້ຮັບການຈົດທະບຽນ ແລະ ມີໃບຢັ້ງຢືນການເກີດເປັນທາງການຢ່າງໜ້ອຍໃຫ້ໄດ້ 80% ຂຶ້ນໄປ ເປັນໂຕເລກທີ່ສູງກວ່າຂອງສູນກາງກໍານົດ, ເພາະສຸນກາງກໍານົດທົ່ວປະເທດ ແມ່ນ 70%, ແຕ່ເຖິງຢ່າງໃດກໍ່ຕາມແຂວງຈຳປາສັກ ຈະພະຍາຍາມສູ້ຊົນ ແລະ ໃຫ້ຄໍາໝັ້ນສັນຍາວ່າຈະໃຫ້ບັນລຸຕາມຄາດໝາຍທີ່ວາງໄວ້.
ການເປີດຂະບວນການຈົດທະບຽນການເກີດຜ່ານລະບົບຄຸ້ມຄອງຂໍ້ມູນພົນລະ ເມືອງ ເອເລັກໂຕຣນິກ ທີ່ເມືອງຈໍາປາສັກ ແຂວງຈໍາປາສັກ ເປັນແຂວງທີສອງ ເຊິ່ງເປັນການອໍານວຍຄວາມສະດວກໃຫ້ປະຊາຊົນ ສາມາດເຂົ້າເຖິງການບໍລິການຂອງພາກລັດ ໄດ້ສະດວກ ແລະ ວ່ອງໄວ, ເປັນການເພີ່ມຄວາມເຂົ້າໃຈ ແລະ ປຸກລະດົມຄວາມຕື່ນຕົວຂອງພົນລະເມືອງ ໃຫ້ເຂົ້າມາໃຊ້ການບໍລິການ ການຈົດທະບຽນການເກີດ ເພື່ອປົກປ້ອງສິດຜົນປະໂຫຍດຂອງຕົນເອງ ກໍ່ຄື ບຸກຄົນກ່ຽວຂ້ອງ. ທັງເປັນການເພີ່ມຈໍານວນການຈົດທະບຽນການເກີດ ເຂົ້າລະບົບຄຸ້ມຄອງຂໍ້ມູນພົນລະເມືອງ ເອເລັກໂຕຣນິກ ໃຫ້ບັນລຸເປົ້າໝາຍ, ໃຫ້ພົນລະເມືອງທຸກຄົນ ໄດ້ຮັບເອກະສານຢັ້ງຢືນສະຖາ ນະພາບ ການເປັນພົນລະເມືອງລາວ ຈາກການຈົດທະບຽນ ແລະ ສາມາດນໍາໃຊ້ຂໍ້ມູນສະຖິຕິພົນລະເມືອງ ປະກອບສ່ວນເຂົ້າໃນການສ້າງນະໂຍບາຍ ແລະ ແຜນພັດທະນາເສດຖະກິດ-ສັງຄົມແຫ່ງຊາດ.
ທ່ານ ປອ ທອງຈັນ ມະນີໄຊ ກໍາມະການສູນກາງພັກ, ເລຂາຄະນະພັກ -ລັດຖະ ມົນຕີກະຊວງພາຍໃນ ໄດ້ກ່າວຕໍ່ພິທີວ່າ: ວຽກງານການຈົດທະບຽນ ແລະ ສະຖິຕິພົນລະເມືອງ ເປັນວຽກງານໜຶ່ງ ທີ່ມີຄວາມສຳຄັນ ຊຶ່ງຕິດພັນກັບການປົກປ້ອງສິດຜົນປະໂຫຍດຂອງພົນລະເມືອງ, ສະໜັບສະໜູນການປົກຄອງທີ່ດີ ແລະ ການພັດທະນາພັດທະນາ ຄື: ທຸກຄົນໄດ້ຮັບເອກະສານທາງກົດໝາຍ ຈາກການຈົດທະບຽນການເກີດ, ການເສຍຊີວິດ ແລະ ເຫດການອື່ນໆທີ່ສໍາຄັນ ຈໍາເປັນໃນຊີວິດ ເພື່ອລະບຸຕົວຕົນ, ສະຖານະພາບການເປັນພົນລະເມືອງ ແລະ ການປະຕິບັດສິດຕ່າງໆ; ມີຕົວເລກສະຖິຕິທີ່ຖືກຕ້ອງ, ສົມບູນ ແລະ ທ່ວງທັນກັບເວລາ. ສໍາລັບລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ ໄດ້ເລີ່ມພັດທະນາໃນປີ 2022 ແລະ ໄດ້ເປີດການນໍາໃຊ້ລະບົບການຈົດທະບຽນການເກີດ ແລະ ການເສຍຊີວິດໃນວັນທີ 28 ກຸມພາ 2023 ເປັນຕົ້ນມາ. ລະບົບດັ່ງກ່າວ ຈະຕອບສະໜອງຂໍ້ມູນ ແລະ ອໍານວຍຄວາມສະດວກ ໃຫ້ແກ່ການຄຸ້ມຄອງ, ນໍາໃຊ້, ປົກປັກຮັກສາ ແລະ ຄົ້ນຫາຂໍ້ມູນຂອງພົນລະເມືອງ ໄດ້ສະດວກ ແລະ ວ່ອງໄວ, ວິເຄາະວິໄຈ ສະຖິຕິພົນລະເມືອງ ເພື່ອວາງແຜນພັດທະນາເສດຖະກິດ-ສັງຄົມ ຂອງລັດຖະບານ, ເປົ້າໝາຍຕົວຊີ້ວັດແຜນພັດທະນາແບບຍຶນຍົງ, ຖະແຫຼງການ ແລະ ຂໍ້ຕົກລົງຕ່າງໆ ທີ່ລັດຖະບານໄດ້ຮ່ວມລົງນາມ ແລະ ຮັບຮອງກັບສາກົນ. ການເປີດຂະບວນການຈົດ ທະບຽນການເກີດໃນຄັ້ງນີ້ ແມ່ນສ້າງຂະບວນປຸກລະດົມຄວາມຮັບຮູ້ ແລະ ຄວາມຕື່ນຕົວຂອງພົນລະເມືອງ ຢ່າງຕໍ່ເນື່ອງ ໂດຍຜ່ານທຸກຊ່ອງທາງທີ່ເປັນໄປໄດ້ ເພື່ອໃຫ້ພົນລະເມືອງມາຊົມໃຊ້ການບໍລິການລະບົບການຈົດທະບຽນການເກີດຜ່ານລະບົບເອເລັກໂຕຣນິກ ຢ່າງທົ່ວເຖີງ ແລະ ກວ້າງຂວາງ ທັງນີ້ກໍເພື່ອໃຫ້ໄດ້ສະຖິຕິພົນລະເມືອງປະຈໍາປີຈາກລະບົບຂໍ້ມູນການຈົດທະບຽນພົນລະເມືອງ, ຜະລິດ, ເຜີຍແຜ່ ແລະ ນໍາໃຊ້ສະຖິຕິໃນການກໍານົດນະໂຍບາຍ, ການວາງແຜນການ, ການຕິດຕາມ ແລະ ປະເມີນຜົນ.
ໃນໂອກາດນີ້, ທ່ານລັດຖະມົນຕີກະຊວງພາຍໃນ ຍັງເຊີນຊວນ ແລະ ຮຽກຮ້ອງມາຍັງພົນລະເມືອງ ໃນຂອບເຂດທົ່ວປະເທດ ໂດຍສະເພາະ ປະຊາຊົນຊາວເມືອງຈໍາປາສັກ ແຂວງຈໍາປາສັກ ຈົ່ງພ້ອມກັນເຂົ້າຮ່ວມຂະບວນການຈົດທະບຽນການເກີດ ຜ່ານລະບົບຄຸ້ມຄອງຂໍ້ມູນພົນລະເມືອງເອເລັກໂຕຣນິກ ໃນຄັ້ງນີ້ ເພື່ອມີໃບຢັ້ງຢືນການເກີດ ທີ່ຈະເປັນເອກະສານຫຼັກຖານສຳຄັນທາງດ້ານກົດໝາຍ ເພື່ອພິສູດຊື່, ອາຍຸ, ສາຍພົວພັນຄອບຄົວ, ສັນຊາດຂອງພົນລະເມືອງ ແລະ ເປັນຂໍ້ມູນສໍາຄັນເຂົ້າເຖິງການບໍລິການພື້ນຖານຂອງລັດ ເຊັ່ນ: ການປິ່ນປົວສຸຂະພາບ, ການສຶກສາ, ການປົກປ້ອງທາງສັງຄົມ, ການຄົ້ນຫາຂໍ້ມູນໃນກໍລະນີພັດພາກ, ກຳມະສິດຊັບສິນ, ການສືບທອດມູນມໍຣະດົກ ແລະ ອື່ນໆ.