ວັນທີ 17 ພຶດສະພາ 2024, ລັດຖະບານແຫ່ງ ສປປ ລາວ ແລະ ຄູ່ຮ່ວມພັດທະນາ ໄດ້ເລີ່ມຂະບວນການຮັບວັກຊີນກັນພະຍາດໝາກແດງໃຫຍ່ ແລະ ໝາກແດງນ້ອຍ ທົ່ວປະເທດ ຢ່າງເປັນທາງການ ທີ່ ສູນການຄ້າວຽງຈັນເຊັນເຕີ້ ທີ່ ນະຄອນຫຼວງວຽງຈັນ, ພາຍໃຕ້ການເປັນປະທານໂດຍ ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ, ມີບັນດາຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ຜູ້ຕາງໜ້າອົງການ ຢູນິເຊບ ປະຈຳລາວ, ອຸປະທູດ ອົດສະຕາລີ່ ປະຈຳລາວ, ຮັກສາການຜູ້ຕາງໜ້າອົງການອະນາໄມໂລກ ປະຈຳລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ດຣ. ສະໜອງ ທອງຊະນະ, ຮອງລັດຖະມົນຕີກະຊວງສາທາລະນະສຸກ ກ່າວວ່າ ພະຍາດໝາກແດງນ້ອຍ ແລະ ໝາກແດງໃຫ່ຍ ເປັນພະຍາດຕິດເຊຶ້ອທີ່ເກີດຈາກໄວຣັສ ທີ່ມີອັດຕາການແຜ່ເຊື້ອສູງ ແລະ ເປັນສາເຫດໜຶ່ງທີ່ສໍາຄັນຂອງການເຈັບປ່ວຍ ແລະ ມີອັດຕາການເສຍຊີວິດໃນເດັກນ້ອຍສູງ, ພະຍາດໝາກແດງທັງສອງຊະນິດນີ້ ເປັນສາເຫດສຳຄັນຂອງການເສຍຊີວິດຂອງເດັກນ້ອຍໃນທົ່ວໂລກ ເຖິງວ່າເປັນພະຍາດທີ່ສາມາດປ້ອງກັນໄດ້ດ້ວຍວັກຊິນກໍຕາມ ເຊິ່ງມີລາຍງານໃຫ້ຮູ້ວ່າໃນປະເທດທີ່ກໍາລັງພັດທະນາ, ອັດຕາການເສຍຊີວິດຂອງເດັກນ້ອຍອາດສູງເຖິງ 5 – 10%.
ໃນຊຸມປີຜ່ານມາອັດຕາປົກຄຸມການສັກວັກຊີນໝາກແດງ ໃນຫຼາຍພື້ນທີ່ທົ່ວໂລກ ແມ່ນຫຼຸດລົງ, ຈຳນວນກໍລະນີທີ່ຕິດເຊື້ອໝາກແດງໃຫ່ຍໃນປີ 2022 ເພີ່ມຂຶ້ນ 18% ແລະ ເສຍຊີວິດ 43% ທົ່ວໂລກ (ທຽບໃສ່ປີ 2021), ເຮັດໃຫ້ຈຳນວນກໍລະນີທີ່ຕິດເຊື້ອໝາກແດງໃຫ່ຍ ສະເລ່ຍ 9 ລ້ານຄົນ ແລະ ເສຍຊີວິດ 136,000 ຄົນ, ສ່ວນໃຫຍ່ແມ່ນໃນກຸ່ມເດັກນ້ອຍ, ພະຍາດໝາກແດງໃຫຍ່ ແລະ ໝາກແດງນ້ອຍ ແມ່ນສາມາດເຮັດໃຫ້ເກີດອາການສົນ ຫຼື ເຮັດໃຫ້ເສຍຊີວິດໄດ້.
ສຳລັບຢູ່ປະເທດລາວ ມີປະຫວັດການເກີດລະບາດຂອງພະຍາດໝາກແດງ ໃນຫຼາຍພື້ນທີ່ທົ່ວປະເທດເຊັ່ນ: 2019-2020 ເກີດຢູ່ນະຄອນຫຼວງ, ແຂວງ ແລະ ຂົງເຂດອື່ນໆ, ປີ 2019 ມີ 1,242 ກໍລະນີ ແລະ ປີ 2020 ມີ 132 ກໍລະນີ.
ເພື່ອປ້ອງກັນການແຜ່ລະບາດຂອງພະຍາດໝາກແດງໃຫ່ຍ ແລະ ໝາກແດງນ້ອຍ ມີຄວາມຈຳເປັນຕ້ອງໄດ້ສັກວັກຊິນຢ່າງເປັນຂະບວນ ເຊິ່ງລາວ ແມ່ນ 1 ໃນ 3 ປະເທດ ທີ່ມີແຜນຈັດຕັ້ງປະຕິບັດ ວສຊ ໃນປີ 2024 (ປະຕິບັດໄປພ້ອມໆກັບ ມາເລເຊຍ ແລະ ກຳປູເຈຍ) ແລະ ລາວເຮົາກໍເຄີຍຈັດຂະບວນການວັກວັກຊິນໝາກແດງນ້ອຍ ໝາກແດງໃຫ່ຍ ໃນທົ່ວປະເທດຄັ້ງສຸດທ້າຍປີ 2017, ໃນປີນີ້ຈະຈັດຂື້ນໃນລະຫວ່າງວັນທີ 20-31 ພຶດສະພາ 2024 ເຊິ່ງຈະຈັດເປັນຂະບວນການໃຫ່ຍໃນທຸກແຂວງ, ທຸກເມືອງໃນຂອບເຂດ ທົ່ວປະເທດ ແລະ ກຸ່ມເປົ້າໝາຍທີ່ຈະໄດ້ຮັບວັກຊິນໃນຊຸດນີ້ແມ່ນເດັກກຸ່ມອາຍຸ 0 ຫາ 5 ປີ;
ການສັກວັກຊີນ ແມ່ນມີຄວາມສໍາຄັນທີ່ສຸດ ໃນການຮັບມືກັບຄວາມສ່ຽງຕໍ່ສຸຂະພາບເດັກ ທີ່ເກີດຂຶ້ນໄດ້ຈາກພະຍາດໝາກແດງໃຫຍ່ ແລະ ໝາກແດງນ້ອຍ.” ວັກຊີນກັນພະຍາດໝາກແດງໃຫຍ່ ແລະ ໝາກແດງນ້ອຍ ແມ່ນສາມາດສັກໄດ້ທີ່ ສຸກສາລາ ທຸກແຫ່ງທົ່ວປະເທດ ໂດຍບໍ່ຕ້ອງເສຍຄ່າໃຊ້ຈ່າຍໃດໆ.
ພ້ອມນັ້ນ ບັນດາຜູ້ຕາງໜ້າອົງການຈັດຕັ້ງສາກົນ ທີ່ໃຫ້ການສະໜັບສະໜູນ ທາງດ້ານງົບປະມານ, ດ້ານວິຊາການ ພ້ອມກັນມີຄວາມເຫັນຕໍ່ງານດັ່ງກ່າວ.
ຂະບວນການສັກວັກຊີນປ້ອງກັນພະຍາດໝາກແດງໃຫຍ່ ແລະ ໝາກເເດງນ້ອຍ ຈະຈັດຕັ້ງປະຕິບັດໃນຂອບເຂດທົ່ວປະເທດ ເຊິ່ງບາງແຂວງໄດ້ເລີ່ມຈັດຕັງປະຕິບັດ ແລະ ບາງແຂວງພວມຈັດຕັ້ງປະຕິບັດພ້ອມກັນໃນຂອບເຂດທົ່ວປະເທດ.
