ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີເປີດງານວາງສະແດງຮູບພາບ ແລະ ຈໍາໜ່າຍສິນຄ້າ ເພື່ອສະເຫຼີມສະຫຼອງວັນສ້າງຕັ້ງແຂວງເຊກອງ ຄົບຮອບ 40 ປີ ຂຶ້ນໃນວັນທີ 2 ເມສາ 2024 ທີ່ເດີ່ນກິລາແຂວງເຊກອງ, ໂດຍມີທ່ານ ເຫຼັກໄຫຼ ສີວິໄລ ເຈົ້າແຂວງເຊກອງ, ມີບັນດາເຈົ້າແຂວງ, ຮອງເຈົ້າແຂວງ 7 ແຂວງພາກກາງ ສປປ ລາວ, 5 ແຂວງພາກກາງ ສສ ຫວຽດນາມ ແລະ ແຂວງອຸບົນລາຊະທານີ ລາຊະອານາຈັກໄທ, ພ້ອມດ້ວຍຫົວໜ່ວຍທຸລະກິດເຂົ້າຮ່ວມ.
ທ່ານ ດາວວີ ສວຍທະລັງສີ ຫົວຫນ້າພະແນກອຸດສາຫະກໍາ ແລະການຄ້າແຂວງ, ຫົວຫນ້າຄະນະຮັບຜິດຊອບການຈັດງານວາງສະແດງສິນຄ້າ ກ່າວວ່າ: ການຈັດງານວາງສະແດງສິນຄ້າໃນຄັ້້ງນີ້ ເພື່ອສົ່ງເສີມການຜະລິດເປັນສິນຄ້າທີ່ເປັນທ່າແຮງໂດຍສະເພາະແມ່ນສິນຄ້າກະສິກຳໃຫ້ເຂັ້ມແຂງ ແລະ ຍືນຍົງ, ຕິດພັນກັບການສົ່ງເສີມດ້ານການຕະຫຼາດໃໝ່ ພາຍໃນ ແລະ ຕ່າງປະເທດ.
ງານຄັ້ງນີ້ມີທັງໝົດ 132 ຫ້ອງວາງສະແດງຂາຍສິນຄ້າ, ມີຫົວໜ່ວຍທຸລະກິດພາຍໃນ, ຕ່າງແຂວງ ແລະ ຕາງປະເທດເຂົ້າ ຮ່ວມ 103 ຫົວໜ່ວຍ, ປະກອບມີ: ສໍານັກງານອົງການຂອງພາກລັດພາຍໃນແຂວງ, ກຸ່ມສິນຄ້າໜຶ່ງເມືອງໜຶ່ງຜະລິດຕະພັນ (ODOP), ລັດວິສາຫະກິດ, ບໍລິສັດເອກະຊົນ, ສິນຄ້າທົ່ວໄປ, ເຊິ່ງສິນຄ້າທີ່ນໍາເຂົ້າມາວາງສະແດງ ແລະ ຈໍາໜ່າຍໃນຄັ້ງນີ້ ປະກອບມີ ຜະລິດຕະພັນກະສິກໍາ ແລະ ອຸດສາຫະກໍາປຸງແຕ່ງຈາກໂສມທີ່ເປັນເອກະລັກທ້ອງຖິ່ນ, ເຄື່ອງຫັດຖະກຳຈັກສານແຜ່ນແພລາຍເອກະລັກເຜົ່າ, ໂຄສະນາແຫຼ່ງທ່ອງທ່ຽວ, ຮູບພາບຜົນງານ ແລະ ສິນຄ້າປະເພດຕ່າງໆ. ມູນຄ່າປະມານ 2 ຕື້ກວ່າກີບ, ຄາດວ່າຈະມີການຮ່ວມມືທາງດ້ານທຸລະກິດ, ການແລກປ່ຽນຊື້- ຂາຍ ສິນຄ້າຮ່ວມກັນ ແລະ ຄາດວ່າຈະມີເງິນໝູນວຽນໃນແຕ່ ລະວັນບໍ່ຕໍ່າກວ່າ 80 ລ້ານກີບຕໍ່ວັນ, ນອກຈາກນີ້ ຍັງເປັນການແລກປ່ຽນດ້ານສີມືແຮງງານ, ການຫຸ້ມຫໍ່ຜະລິດຕະພັນ ແລະ ເປີດກວ້າງຕະຫຼາດໃຫ້ເຊິ່ງກັນແລະກັນຫຼາຍຂຶ້ນ. ງານດັ່ງກ່າວແມ່ນເລີ່ມແຕ່ ວັນທີ 01-05 ເມສາ 2024 ນີ້.