ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີເປີດງານສັບປະດາແຫ່ງຊາດ ດ້ານຄວາມປອດໄພທາງຫລວງ ຈັດຂື້ນຕອນເຊົ້າວັນທີ່ 6 ເມສາ 2024 ທີ່ເດີນທາດຫລວງ ນະຄອນຫລວງພະບາງ ແຂວງຫລວງພະບາງ ພາຍໃຕ້ຫົວຂໍ້: “ຂັບຂີ່ມີວິໃນ ມີນໍ້າໃຈໃຫ້ກຽດຄົນຢ່າງ” ມີ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ປະທານຄະນະກໍາມະການແຫ່ງຊາດດ້ານຄວາມປອດໄພທາງຫຼວງ, ທ່ານ ງາມປະສົງ ເມືອງມະນີ ລັດຖະມົນຕີ ກະຊວງໂຍທາທິການ ແລະ ຂົນສົ່ງ, ທ່ານ ຄໍາຂັນ ຈັນທະວີສຸກ, ເຈົ້າແຂວງຫຼວງພະບາງ, ພ້ອມດ້ວຍມວນຊົນຊາວຫລວງພະບາງ ເຂົ້າຮ່ວມ.
ທ່ານ ງາມປະສົງ ເມືອງມະນີ ລັດຖະມົນຕີ, ໄດ້ລາຍງານການຈັດງານຄັ້ງນີ້ວ່າ: ຄວາມເສຍຫາຍຈາກອຸບັດປະຕິເຫດທາງຫລວງ ຖ້າຕີມູນຄ່າທາງດ້ານເສດຖະກິດແມ່ນມະຫາສານ, ທົ່ວໂລກປີໜຶ່ງມີຜູ້ເສຍຊີວິດ 1 ລ້ານ 3 ແສນຄົນ ຈາກການເກີດອຸບປະຕິເຫດທາງຫລວງ ແລະ ສປປ ລາວ ສະເລ່ຍເສຍຊີວິດປີລະ 1.000 ຄົນ. ດັ່ງນັ້ນ, ອົງການສະຫະປະຊາຊາດ ຈຶ່ງໄດ້ກຳນົດມາດຕະການປ້ອງກັນ ແລະແກ້ໄຂໂດຍມີ 5 ເສົາຄ້ຳຄື: ໂຄງລ່າງຄົມມະນາຄົມ-ຂົນສົ່ງປອດໄພ, ພາຫະນະປອດໄພ, ຄົນໃຊ້ລົດໃຊ້ທາງຫລວງປອດໄພ, ການກອບກູ້ຊີວິດຫລັງເກີດອຸປະຕິເຫດ ແລະການຄຸ້ມຄອງຄວາມປອດໄພ. ຊຶ່ງລວມມີໂຄສະນາເຜີຍແຜ່, ປູກຈິດສຳນຶກ, ການປະຕິບັດກົດໝາຍ ແລະງານສັບປະດາຄວາມປອດໄພ ສຳລັບຄວາມເປັນມາ ຂອງງານສັບປະດາຄວາມປອດໄພທາງຫລວງສາກົນ ຊຶ່ງອົງການສະຫະປະຊາຊາດເປັນຜູ້ລິເລີ່ມຈັດຄັ້ງທີ 1 ໃນປີ 2007 ແຕ່ລະປີກໍມີຄຳຂວັນແຕກຕ່າງກັນໄປໃນແຕ່ລະປີ.
ສ່ວນ ສປປ ລາວ ສັບປະດາແຫ່ງຊາດດ້ານຄວາມປອດໄພທາງຫລວງ, ກຳນົດເອົາ ສັບປະດາທຳອິດ ຂອງເດືອນເມສາ ເປັນມື້ຈັດງານສັບປະດາແຫ່ງຊາດ ດ້ານຄວາມປອດໄພທາງຫລວງ.
ໃນໂອກາດນີ້ ທ່ານ ກິແກ້ວ ໄຂຄຳພິທູນ ໄດ້ກ່າວເປີດງານວ່າ: ໃນຊຸມປີຜ່ານມາ, ເຖິງວ່າຈະປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍປະການ ສປປ ລາວ ໄດ້ພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ໄດ້ຮັບການປັບປຸງປົວແປງດີຂຶ້ນ, ການນໍາໃຊ້ຍານພາຫະນະທາງບົກ ແລະທາງຫຼວງ ກໍ່ເພີ່ມຂຶ້ນແບບກ້າວກະໂດດ. ຄຽງຄູ່ກັນນັ້ນ ຈໍານວນອຸບັດຕິເຫດກໍ່ມີທ່າອ່ຽງເພີ່ມຂຶ້ນ ຊຶ່ງເຮັດໃຫ້ມີຄົນຖືກບາດເຈັບ, ເສຍອົງຄະ, ເສຍຊີວິດຈໍານວນເພີ່ມຂຶ້ນ ລວມທັງຊັບສິນຂອງປະຊາຊົນກໍ່ຄືຂອງລັດ ເສຍຫາຍຫຼາຍຮ້ອຍຕື້ໃນແຕ່ລະປີ ທັງໄດ້ກາຍເປັນໜຶ່ງໃນປະກົດການຫຍໍ້ທໍ້ໃຫຍ່ຂອງສັງຄົມ; ເປັນເຫດສ້າງຄວາມສູນເສຍໃຫຍ່ຫຼວງທີ່ກົດໜ່ວງການພັດທະນາ; ເປັນຄວາມເປັນຫ່ວງເປັນໄຍ ແລະຫາງສຽງຈົ່ມວ່າເນືອງນັນຂອງສັງຄົມ, ເປັນສິ່ງທ້າທາຍໃຫຍ່ຂອງການບໍລິຫານ-ຄຸ້ມຄອງສັງຄົມຂອງລັດຖະບານ.
ການຈັດງານໃນຄັ້ງນີ້ ເປັນການຢັ້ງຢືນອີກເທື່ອໜຶ່ງເຖິງຄວາມເປັນຫ່ວງເປັນໄຍ, ຄວາມເອົາໃຈໃສ່ ແລະ ຄວາມຮັບຜິດຊອບຂອງລັດຖະບານກໍ່ຄືບັນດາແຂວງ ຕໍ່ວຽກງານຄວາມປອດໄພທາງຫຼວງ ແລະທັງເປັນການຈັດຕັ້ງປະຕິບັດກົດໝາຍວ່າດ້ວຍການຈະລາຈອນທາງບົກ, ຍຸດທະສາດແຫ່ງຊາດດ້ານຄວາມປອດໄພທາງຫຼວງ ແລະມະຕິຂອງອົງການສະຫະປະຊາຊາດ ກ່ຽວກັບການປັບປຸງຄວາມປອດໄພທາງຫຼວງໃນທົ່ວໂລກ (ປີ 2005) ແນໃສ່ເພື່ອໂຄສະນາ, ສ້າງສະຕິ ແລະປູກຈິດສໍານຶກໃຫ້ປະຊາຊົນທຸກຊັ້ນຄົນທົ່ວສັງຄົມ ເຫັນໄດ້ໄພອັນຕະລາຍຂອງການລະເມີດກົດຈະລາຈອນ ເປັນຕົ້ນການຂັບຂີ່ລົດໄວ, ການດື່ມສິ່ງມຶນເມົາແລ້ວຂັບ ຊຶ່ງເປັນສາເຫດສ່ວນໃຫຍ່ໃນການເກີດອຸບັດຕິເຫດ; ເຫັນໄດ້ຜົນກະທົບ ແລະຜົນສະທ້ອນຂອງການເກີດອຸບັດຕິເຫດຕໍ່ການດໍາລົງຊີວິດຂອງສັງຄົມ, ຕໍ່ເສດຖະກິດ ແລະ ການພັດທະນາຂອງຊາດ ຮຽກຮ້ອງມາຍັງທຸກພາກສ່ວນ, ທຸກຂະແໜງການ ແລະ ທົ່ວສັງຄົມ ຈົ່ງໄດ້ພ້ອມກັນຮ່ວມແຮງຮ່ວມໃຈປະຕິບັດກົດຈະລາຈອນຢ່າງເຂັ້ມງວດ ແລະ ໂຄສະນາປູກຈິດສໍານຶກກ່ຽວກັບວຽກງານຄວາມປອດໄພທາງຫຼວງໃຫ້ທົ່ວສັງຄົມຮັບຮູ້ ເພື່ອຈໍາກັດ, ຫຼຸດຜ່ອນອຸບັດຕິເຫດທາງຫຼວງ; ເພື່ອປົກປ້ອງຊີວິດ ແລະ ຊັບສິນຂອງປະຊາຊົນຂອງຊາດ ກໍ່ຄືການປົກປ້ອງສຸຂະພາບ ແລະ ສະຫວັດດີການສັງຄົມ.
อาจเป็นรูปภาพของ 1 คน