ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ແຂວງບໍ່ແກ້ວ ຈັດພິທີເປີດງານເທດສະການດອກງິ້ວບານ ຄັ້ງທີ XXI ປະຈໍາປີ 2024 ຂຶ້ນໃນວັນທີ 26 ມັງກອນນີ້, ທີ່ເຂດເສດຖະກິດພິເສດສາມຫຼ່ຽມຄໍາ ເມືອງຕົ້ນເຜິ້ງ ແຂວງບໍ່ແກ້ວ ໂດຍການເປັນກຽດເຂົ້າຮ່ວມຂອງ ທ່ານ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ທ່ານ ສົມສະຫວາດ ເລັ່ງສະຫວັດ ອາດີດຮອງນາຍົກ ລັດຖະມົນຕີ, ທ່ານ ຈ້າວ ເຫວີຍ ປະທານສະພາບໍລິຫານເຂດເສດຖະກິດພິເສດສາມຫຼ່ຽມຄໍາ, ມີບັນດາການນໍາພັກ-ລັດ, ອະດີດການນໍາຂັ້ນສູນກາງ, ຂັ້ນແຂວງ-ເມືອງ, ແຂກຖືກເຊີນທັງພາຍໃນ ແລະ ຕ່າງປະເທດ, ມວນຊົນຊາວແຂວງບໍ່ແກ້ວເຂົ້າຮ່ວມ.
ທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ກ່າວວ່າ: ເທດສະການງານບຸນດັ່ງກ່າວເປັນເຫດການທີ່ມີຄວາໝາຍ-ຄວາມສໍາຄັນ ທັງເປັນປາງບຸນໃຫຍ່ໜຶ່ງທີ່ຊາວແຂວງບໍ່ແກ້ວເຄີຍຈັດຕັ້ງປະຕິບັດມານັບແຕ່ປີ 2000. ມາຮອດປີ 2024 ເປັນຄັ້ງທີ XXI; ການຈັດງານເທດສະການດອກງິ້ວບານຂຶ້ນໂດຍມີຈຸດປະສົງເພື່ອເປັນການສົ່ງເສີມ ແລະ ປົກປັກຮັກສາຄວາມເປັນເອກະລັກ ແລະ ຮີດຄອງປະເພນີອັນດີງາມຂອງທ້ອງຖິ່ນ ກໍຄືຂອງຊາດ, ທັງເປັນການເປີດກິດຈະກໍາການທ່ອງທ່ຽວລະດັບຊາດ ຕາມທີ່ລັດຖະບານໄດ້ກໍານົດເອົາງານເທດສະການບຸນດອກງິ້ວບານເປັນກິດຈະກໍາການທ່ອງທ່ຽວລະດັບຊາດຢູ່ແຂວງບໍ່ແກ້ວ ແນໃສ່ສົ່ງເສີມການທ່ອງທ່ຽວທໍາມະຊາດຂອງດອນຊາວຕິດພັນກັບການບໍລິການ ແລະ ການທ່ອງທ່ຽວ ຄົບວົງຈອນຢູ່ເຂດເສດຖະກິດພິເສດສາມຫຼ່ຽມຄໍາ ເພື່ອເຊີນມວນຊົນຢູ່ທຸກແຫ່ງຫົນເຂົ້າມາທ່ຽວຊົມ ທັງເປັນການຊຸກຍູ້ສົ່ງເສີມການລົງທຶນ, ການສົ່ງເສີມງານຕະຫຼາດນັດ, ການແລກປ່ຽນສິນຄ້າ, ການເສີມຂະຫຍາຍຄວາມສາມັກຄີຮັກແພງຂອງປະຊາຊົນບັນດາເຜົ່າ, ງານເທດສະການໃນຄັ້ງນີ້, ປະກອບມີກິດຈະກໍາຕ່າງໆທີ່ສໍາຄັນເປັນຕົ້ນ ການປະກວດນາງສາວດອກງິ້ວບານປະຈໍາປີ 2024; ການປະກວດນາງສາວທ່ອງທ່ຽວລາວ ປະຈໍາປີ 2024; ການສະແດງສີລະປະວັນນະຄະດີຈາກ 4 ປະເທດຄື: ລາວ, ສປ ຈີນ, ໄທ ແລະ ມຽນມາ; ໄດ້ມີການແຂ່ງຂັນກິລາຕີກັອຟ ຊິງຖ້ວຍລາງວັນດອກງິ້ວຄໍາຄັ້ງທີ 1; ການວາງສະແດງ ແລະ ຈໍາໜ່າຍສິນຄ້າ; ການແຂ່ງກິລາຕີມວຍ, ຮີດຄອງປະເພນີ, ວິຖີດໍາລົງຊີວິດ 13 ເຜົ່າພາຍໃນແຂວງບໍ່ແກ້ວ, ການສະແດງຈູດບັ້ງໄຟດອກ ແລະ ປ່ອຍໂຄມໄຟ ແລະ ອື່ນໆ. ເທດສະການດອກງິ້ວບານໃນປີນີ້ແມ່ນໄດ້ເປີດໃຫ້ມວນຊົນທັງພາຍໃນ ແລະ ຕ່າງປະເທດເຂົ້າມາທ່ຽວຊົມຈົນເຖິງວັນທີ 28 ມັງກອນ 2024 ນີ້.
ຂ່າວ ດວງສະຫັວນ ຂັນທະວົງສາ
ພາບ ວັນເພັງ
May be an image of 10 people, dais and text
May be an image of one or more people and crowd
May be an image of one or more people and crowd