ເປີດງານ “ບຸນກາເຟ ບ້ານເຮົາ” ເພື່ອສົ່ງເສີມກາເຟລາວ ແລະ ສ້າງລາຍຮັບໃຫ້ຊາວກະສິກອນ.

ວັນທີ 27 ກັນຍາ 2024 ນີ້, ກະຊວງກະສິກຳ ແລະ ປ່າໄມ້ ຮ່ວມກັບ ລັດຖະບານຝຣັ່ງ ແລະ ສະຫະພາບເອີຣົບ ຈັດງານສະ ເຫລີມສະຫລອງ ວັນກາເຟສາກົນ (ICD) ຫລື “ບຸນກາເຟ ບ້ານເຮົາ” ຢູ່ສູນການຄ້າວຽງຈັນເຊັນເຕີ, ນະຄອນຫລວງວຽງຈັນ ເພື່ອເປັນການສົ່ງເສີມກາເຟລາວ ໃຫ້ກ້າວໄປສູ່ການປະຕິບັດແບບຍືນຍົງ ແລະ ຊ່ວຍສ້າງລາຍຮັບໃຫ້ຊາວສວນກາເຟ.

ທ່ານ ບຸນຈັນ ກົມບຸນຍະສິດ ຫົວໜ້າກົມປຸກຝັງ ກະຊວງກະສິກຳ ແລະ ປ່າໄມ້ ກ່າວວ່າ: ວັນກາເຟສາກົນ (1 ຕຸລາ) ມີການສະເຫລີມສະຫລອງຫລາຍກວ່າ 70 ປະເທດທົ່ວໂລກ; ສປປ ລາວ ໄດ້ຈັດຂຶ້ນທຸກໆປີ ນັບແຕ່ປີ 2018 ເປັນຕົ້ນມາ ແລະ ໄດ້ກາຍເປັນບ່ອນພົບປະຂອງຄົນຮັກກາເຟ ເພື່ອຍົກໃຫ້ເຫັນເຖິງຄວາມສຳຄັນຂອງກາເຟລາວ ທັງພາຍໃນ ແລະ ຕ່າງປະເທດ, ທັງສະແດງໃຫ້ເຫັນເຖິງການຮ່ວມມື ເພື່ອການພັດທະນາແບບຍືນ ຍົງ.

ກາເຟລາວຜະລິດຢູ່ໃນເນື້ອທີ່ປະມານ 98,000 ເຮັກຕາ, ຄາດຄະເນຜົນຜະລິດໃນແຕ່ລະປີແມ່ນຢູ່ທີ່ 150,000 ໂຕນ, ສ່ວນຫລາຍແມ່ນມາຈາກບັນດາແຂວງພາກໃຕ້. ຊາວກະສິກອນຫລາຍກວ່າ 300,000 ຄົນມີລາຍໄດ້ຈາກອຸດສາຫະກໍາກາເຟ, ເຊິ່ງແຕ່ລະປີ ລາວໄດ້ສົ່ງອອກກາເຟ ເມັດຫຼາຍກວ່າ 100,000 ໂຕນ ມີມູນຄ່າຫລາຍກວ່າ 100 ລ້ານໂດລາສະຫະລັດ.

ທ່ານ ນາງ ຈັນທະຄອນ ບົວລະພັນ, ຮອງລັດຖະມົນຕີ ກະ ຊວງກະສິກໍາ ແລະ ປ່າໄມ້ ໄດ້ເນັ້ນວ່າ: ກາເຟ ແມ່ນໜຶ່ງໃນສິນຄ້າກະສິກຳ ທີ່ສຳຄັນຂອງ ສປປ ລາວ, ເປັນສິນຄ້າສົ່ງອອກສຳຄັນ ທີ່ປະກອບ ສ່ວນເຂົ້າໃນເສດຖະກິດຂອງລາວ, ໄດ້ຊ່ວຍສ້າງລາຍຮັບໃຫ້ຊາວສວນ ຂະຫນາດນ້ອຍ ແລະ ປະກອບ ສ່ວນເຂົ້າໃນລາຍຮັບແຫ່ງຊາດຂອງປະເທດ ແລະ ມີຫລາຍພາກສ່ວນພວມພະຍາຍາມຮ່ວມມືກັນ ສົ່ງເສີມກາເຟລາວ ໃຫ້ກ້າວໄປສູ່ການ ປະຕິບັດແບບຍືນຍົງ ໃນການຊຸກຍູ້ການພັດທະນາສີຂຽວ.

ງານດັ່ງກ່າວດຳເນີນໄປແຕ່ວັນທີ 27-29 ກັນຍານີ້ ແລະ ມີ 40 ກວ່າຮ້ານຈາກທົ່ວປະເທດມາ ວາງສະແດງຜະລິດຕະພັນກາເຟ.