ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີເປີດຈຸດບໍລິການຈັດຫາງານຂອງເມືອງທຸລະຄົມ ແຂວງວຽງຈັນ ຈັດຂຶ້ນຕອນບ່າຍວັນທີ 22 ທັນວາ 2023 ຢູ່ທີ່ຫ້ອງການແຮງງານ ແລະ ສະຫວັດດີການສັງຄົມ ເມືອງ, ພາຍໃຕ້ການເປັນປະທານຮ່ວມຂອງ ທ່ານ ນາງ ວົງເດືອນ ວັດຕະໂສ ເຈົ້າເມືອງໆທຸລະຄົມ, ທ່ານ ນາງ ວັນນີ ແກ້ວໄຊຍະວົງ ຮອງຫົວໜ້າກົມການຈັດຫາງານ ກະຊວງແຮງງານ ແລະ ສະຫວັດດີການສັງຄົມ ແລະ ທ່ານ ສີສະໄຫວ ແກ້ວດາລາວິນ ຫົວໜ້າພະແນກແຮງງານ ແລະ ສະຫວັດດີການສັງຄົມ ແຂວງວຽງຈັນ; ມີ ຫົວໜ້າ, ຮອງຫົວໜ້າຫ້ອງການ, ອົງການ, ກົມກອງອ້ອມຂ້າງເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ໄມ ໄຊຍະວົງ ຫົວໜ້າຫ້ອງການແຮງງານ ແລະ ສະຫວັດດີການສັງຄົມ ເມືອງ ໄດ້ລາຍງານສະພາບລວມຂອງການເຄື່ອນໄຫວບໍລິການຈັດຫາງານຢູ່ເມືອງທຸລະຄົມ, ຊຶ່ງໃນໄລຍະຜ່ານມາໄດ້ເຄື່ອນໄຫວເປັນເສນາທິການໃຫ້ພະແນກ ຮສສ ແຂວງ ກໍຄືອົງການປົກຄອງເມືອງ ນໍາພາພະນັກງານເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ, ໃນນັ້ນວຽກງານຈັດຫາງານ ເປັນວຽກສໍາຄັນໜຶ່ງທີ່ໄດ້ເອົາໃຈໃສ່ຈັດຕັ້ງປະຕິບັດ, ໂດຍເປັນໃຈກາງປະສານສົມທົບກັບຫົວໜ່ວຍແຮງງານ ແລະ ຜູ້ຕ້ອງການວຽກເຮັດງານທໍາ ສາມາດແນະນໍາຊ່ວຍເຫຼືອໃຫ້ຊາວໜຸ່ມ-ປະຊາຊົນມີວຽກເຮັດງານທໍາໃນລະດັັບໜຶ່ງ. ພ້ອມກັນນັ້ນ ຍັງໄດ້ອຳນວຍຄວາມສະດວກໃຫ້ແກ່ບໍລິສັດຈັດຫາງານທີ່ມາເຄື່ອນໄຫວຂຸດຄົ້ນແຮງງານຢູ່ເມືອງທຸລະຄົມ ເພື່ອໄປອອກແຮງງານສ້າງວຽກເຮັດງານທໍາ ແລະ ເພື່ອພັດທະນາສີມືແຮງງານ ປະກອບມີ 3 ບໍລິສັດ ເຊັ່ນ: ບໍລິສັດ ສະຫວັນຈັດຫາງານ; ບໍລິສັດ ສຸດໃຈ ຈັດຫາງານ ແລະ ບໍລິສັດ ໄອຈ໋ອບ ຈັດຫາງານ ໂດຍຜ່ານຂະບວນການຂັ້ນຕອນຄັດເລືອກ ແລະ ສໍາພາດ ຕາມແຈ້ງການຂອງຂັ້ນເທິງ, ສາມາດນໍາເອົາແຮງງານໄປອອກແຮງງານຕາມລະດູການຢູ່ຕ່າງປະເທດແລ້ວຈໍານວນໜຶ່ງ, ຍັງມີອີກຈໍານວນໜຶ່ງໄດ້ຜ່ານການສໍາພາດ ແລະ ກໍາລັງຝຶກອົບຮົມຢູ່ສູນກຽມໄປອອກແຮງງານຕາມແຜນການຂອງບໍລິສັດຈ້າງງານວາງອອກ.
ໂອກາດນນີ້ ຄະນະປະທານທັງ 3 ທ່ານ ໄດ້ຜັດປ່ຽນກັນມີຄໍາເຫັນຕໍ່ພິທີ, ໂດຍລວມມີຄວາມພາກພູມໃຈ, ເຫັນດີສະໜັບສະໜູນ, ຮ່ວມມື, ອໍານວຍຄວາມສະດວກໃຫ້ແກ່ຈຸດບໍລິການທີ່ຕັ້ງຂຶ້ນ, ທັງນີ້ກໍເພື່ອເປົ້າໝາຍເຮັດໃຫ້ຂະບວນການຂຸດຄົ້ນແຮງງານ, ການຊອກວຽກເຮັດງານທໍາເຂົ້າສູ່ລະບົບລະບຽບ, ສອດຄອ່ງກັບກົດໝາຍແຮງງານຂອງ ສສປ ລາວ, ສົ່ງເສີມພັດທະນາສີມືແຮງງານ ທັງພາຍໃນ ແລະ ຕ່າງປະເທດ, ຫຼີກເວັ້ນການໂຄສະນາປຸກລະດົມຂຸດຄົ້ນແຮງງານທີ່ບໍ່ຖືກຕາມຂັ້ນຕອນ, ການໄປອອກແຮງງານແບບບໍ່ຖືກຕ້ອງ ແລະ ຄວາມສ່ຽງອື່ນໆ; ຮຽກອົງການຈັດຕັ້ງກ່ຽວຂ້ອງ, ຫົວໜ່ວຍທຸລະກິດ ສະໜອງຂໍ້ມູນແຜນຄວາມຕ້ອງການແຮງງານ, ປະສານສົມທົບພົວພັນຊຶ່ງກັນ ແລະ ກັນ, ລວມທັງຄະນະຮັບຜິດຊອບສູນ ຈົ່ງເອົາໃຈໃສ່ປະຕິບັດໜ້າທີ່ໃຫ້ມີຜົນສໍາເລັດ, ບໍລິການສັງຄົມ, ບັນດາຜູ້ມາສະໝັກງານ ເຮັດໃຫ້ຈຸດບໍລິການມີຄວາມຄືບໜ້າ, ຍືນຍົງ ສ້າງປະໂຫຍດໃຫ້ຜູ້ຊອກຫາວຽກເຮັດງານທໍາ; ໂອກາດນີ້ ທ່ານ ເຈົ້າເມືອງທຸລະຄົມ ຍັງໄດ້ກ່າວຍ້ອງຍໍຊົມເຊີຍ ຕໍ່ຂະແໜງແຮງງານ ແລະ ສະຫັວດດີການສັງຄົມ ທີ່ເອົາໃຈໃສ່ວາງແຜນໃນການຈັດຫາງານ ແລະ ແກ້ໄຂວຽກເຮັດງານທໍາໃຫ້ຊາວໜຸ່ມທີ່ວ່າງງານ, ຊົມເຊີຍຄະນະຮັບຜິດຊອບກ່ຽວຂ້ອງທຸກຂັ້ນ ທີ່ສາມາດຈັດພິທີຕັ້ງຈຸດບໍລິການຈັດຫາງານຂຶ້ນຢູ່ເມືອງທຸລະຄົມເປັນແຫ່ງທີ 41 ຂອງທົ່ວປະເທດ ແລະ ແຫ່ງທີ 4 ຂອງແຂວງວຽງຈັນ; ຊຶ່ງອົງການປົກຄອງເມືອງ ກໍຄືໃນນາມສ່ວນຕົວທ່ານຍິນດີໃຫ້ຄວາມຮ່ວມມື ແລະ ອຳນວຍຄວາມສະດວກໃຫ້ແກ່ການຈັດຕັ້ງປະຕິບັດວຽກງານດັ່ງກ່າວ, ເນື່ອງຈາກເມືອງທຸລະຄົມ ເປັນເມືອງທີ່ມີພົນລະເມືອງຫລາຍ ແລະ ຍັງມີຄົນຈໍານວນຫລວງຫລາຍຕ້ອງການວຽກເຮັດງານທໍາ ເພື່ອພັດທະນາສີມືແຮງງານ, ສ້າງວິຊາຊີບໃຫ້ຕົນເອງ ແລະ ເພື່ອຫາລາຍໄດ້ມາສູ່ຄອບຄົວແບບຖືກຕ້ອງຕາມລະບຽບກົດໝາຍ.