ຕອນບ່າຍວັນທີ 17 ພະຈິກ 2022 ນີ້ຢູ່ທີ່ຫ້ອງການແຮງງານ ແລະ ສະຫວັດດີການສັງຄົມ ເມືອງປາກລາຍ ແຂວງໄຊຍະບູລີ ໄດ້ມີພິທີເປີດ ຈຸດບໍລິການຈັດຫາງານຢູ່ຂັ້ນເມືອງຂື້ນ ໂດຍການເປັນປະທານຮ່ວມພິທີເປີດຂອງທ່ານ ບຸນພະລັງ ວິໄລສັກ ຮອງເຈົ້າເມືອງໆປາກລາຍ, ທ່ານ ໜູພອນ ໄຊປັນຍາຈິດ ຮອງຫົວໜ້າພະແນກແຮງງານ ແລະ ສະຫວັດດີການສັງຄົມແຂວງໄຊຍະບູລີ, ມີຜູ້ຕາງໜ້າຈາກກົມຈັດຫາງານ ກະຊວງແຮງງານ ແລະ ສະຫວັດດີການສັງຄົມ, ພ້ອມນາຍບ້ານໃນເທດສະບານເມືອງ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ໜູພອນ ໄຊປັນຍາຈິດ ຮອງຫົວໜ້າພະແນກ ຮສສ ແຂວງ ກ່າວວ່າ: ການຈັດຕັ້ງເປີດຈຸດບໍລິການຈັດຫາງານຢູ່ເມືອງປາກລາຍ ຄັ້ງນີ້ ມີຈຸດປະສົງເພື່ອຂະຫຍາຍວຽກງານບໍລິການຈັດຫາງານລົງສູ່ທ້ອງຖິ່ນຮາກຖານ, ເພື່ອຮັບປະກັນການເຂົ້າເຖິງການບໍລິການຂອງຜູ້ຊອກວຽກເຮັດງານທຳ ແລະ ຜູ້ໃຊ້ແຮງງານ ໂດຍສະເພາະການບໍລິການຂື້ນທະບຽນຜູ້ວ່າງງານທົ່ວໄປ ແລະ ຜູ້ວ່າງງານໃນລະບົບປະກັນສັງຄົມ, ເພື່ອເປັນຈຸດໃຫ້ຄຳປຶກສາ, ແນະນຳອາຊີບ, ການພົວພັນກັບຜູ້ໃຊ້ແຮງງານຂື້ນທະບຽນຄວາມຕ້ອງການແຮງງານ ແລະ ການປະສານສົມທົບກັບພາກສ່ວນກ່ຽວຂ້ອງ ເພື່ອຊຸກຍູ້ວຽກງານການຈັດຫາງານ.
ຈາກນັ້ນ ທ່ານ ບຸນພະລັງ ວິໄລສັກ ຮອງເຈົ້າເມືອງປາກລາຍ ກ່າວເປີດ ແລະຕັດແຖບຜ້າເປີດປ້າຍ ຈຸດບໍລິການຈັດຫາງານຢູ່ເມືອງປາກລາຍ ແຂວງໄຊຍະບູລີ ຢ່າງເປັນທາງການ.
ໂດຍ : ທອງສະຫວັດ ໄຊຍະລາດ
