ຊຸດຝຶກອົບຮົມເຕັກນິກການຂຽນຂ່າວແບບໃໝ່ ຕິດພັນກັບການຜັນຂະຫຍາຍ 2 ວາລະວັນແຫ່ງຊາດ ໂດຍພາຍໃຕ້ການເຂົ້າຮ່ວມເປັນປະທານຂອງ ທ່ານ ມະໄລວອນ ສີປະເສີດ ກໍາມະການພັກແຂວງ ຫົວໜ້າພະແນກ ຖວທແຂວງ, ທ່ານ ວັນໄຊ ຕະວິນຍານ ບັນນາທິການ ໜັງສືພິມປະຊາຊົນ, ມີບັນດາທ່ານຄະນະຮັບຜິດ ຊອບຊຸດອົບຮົມ, ນັກສໍາມະກອນສື່ມວນຊົນຈາກພະແນກການອ້ອມຂ້າງແຂວງ ແລະ 08 ຕົວເມືອງເຂົ້າຮ່ວມ.
ທ່ານ ມະໄລວອນ ສີປະເສີດ ຫົວໜ້າພະແນກ ຖະແຫຼງຂ່າວ, ວັດທະນະທໍາ ແລະ ທ່ອງທ່ຽວແຂວງ ໄດ້ກ່າວວ່າ: ຊຸດຝຶກອົບຮົມ ເຕັກນິກການຂຽນຂ່າວ ແບບໃໝ່ໃນຄັ້ງນີ້ ແມ່ນມີຄວາມໝາຍຄວາມສໍາຄັນເປັນຢ່າງຍິ່ງ ເພື່ອແນໃສ່ປັບປຸງ ແລະ ພັດທະນາວຽກງານສື່ມວນຊົນຢູ່ແຂວງສາລະວັນ ຂອງພວກເຮົາໃຫ້ກ້າວໄປສູ່ຄຸນນະພາບໃໝ່ ໂດຍສະເພາະ ແມ່ນເພື່ອຍົກລະດັບຄວາມຮູ້-ຄວາມສາມາດໃຫ້ແກ່ບັນນາທິການ ແລະ ນັກຂ່າວຂອງບັນດາອົງການສື່ມວນຊົນ, ອົງການສື່ມວນຊົນຈາກ 8 ເມືອງ ແລະ ບັນດາອົງການສື່ມວນຊົນຂະແໜງການກ່ຽວ ຂ້ອງອ້ອມຂ້າງແຂວງ, ຈາກນັ້ນສຳມະນາກອນຈະໄດ້ຮຽນຮູ້ຫຼັກການພື້ນຖານການຂຽນຂ່າວ 6 ປັດໄຈ : 5 W , 1 H, ຝຶກແອບຂຽນຂ່າວຕົວຈິງອີກດ້ວຍ, ເຊິ່ງຊຸດອົບຮົມຄັ້ງນີ້ ພວກເຮົາຈະໄດ້ຮຽນຮູ້ທັງພາກທິດສະດີ ແລະ ການລົງປະຕິບັດວຽກງານຕົວຈິງ, ນອກນັ້ນຈະໄດ້ຮຽນພາກທິດສະດີ 1 ວັນ ເພື່ອທົບທວນຄືນ ດ້ານຫຼັກການໃນການຂຽນຂ່າວ, ວິທີເກັບກໍາຂໍ້ມູນຂ່າວ, ຫຼັກການສໍາພາດຂ່າວ, ຫຼັກການວິເຄາະ-ວິໄຈຂໍ້ມູນຂ່າວ ແລະ ເຕັກນິກການນໍາສະເໜີຂ່າວແບບໃໝ່, ສ່ວນພາກລົງປະຕິບັດວຽກງານຕົວຈິງ ແມ່ນພວກເຮົາຈະໃຊ້ເວລາ 3 ວັນເຕັມ. ຕໍ່ກັບເນື້ອຫາສາລະການຝຶກອົບຮົມໃນຄັ້ງນີ້ ໃຫ້ມີຄວາມເໝາະສົມ, ເປັນລະບົບ ແລະ ຖືກຕ້ອງຕາມຫຼັກວິຊາການ, ໂດຍແມ່ນ ທ່ານ ວັນໄຊ ຕະວິນຍານ ບັນນາທິການ ໜັງສືພິມປະຊາຊົນ ເປັນຄູຝືກ.
ຊຸດຝຶກອົບຮົມຄັ້ງນີ້ ຈະດໍາເນີນໄປເປັນເວລາ 4 ເຊິ່ງເລີ່ມແຕ່ວັນທີ 20-23 ມິຖຸນາ ຈິ່ງຈະສຳເລັດ.
ໂດຍ: ກິນດາວັນ ອ້ວນນາຄູ
