ພິທີເປີດຊຸດຮຽນທິດສະດີການເມືອງຂັ້ນຕົ້ນຊຸດທີ 2 ຂອງກະຊວງຖະແຫລງຂ່າວ,ວັດທະນາທຳແລະທ່ອງທ່ຽວ ,ຈັດຂຶ້ນໃນຕອນເຊົ້າ ວັນທີ 19 ສິງຫາ 2024 ທີ່ສະຖານບັນສື່ມວນຊົນ, ວັດທະນາທຳແລະທ່ອງທ່ຽວ ນະຄອນຫລວງວຽງຈັນ, ພາຍໃຕ້ການເປັນປະທານຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫລງຂ່າວ,ວັດທະນາທຳແລະທ່ອງທ່ຽວ,ທ່ານ ນາງ ບຸນມີ ຈຸນລະຈັກ ຮອງຫົວຫນ້າສະຖາບັນການເມືອງແລະການປົກຄອງແຫ່ງຊາດ,ທ່ານ ຄຳຫລ້າ ຍອຍສາຍຄຳ ຫົວຫນ້າສະຖາບັນສື່ມວນຊົນ,ວັດທະນາທຳແລະທ່ອງທ່ຽວ,ມີຫົວຫນ້າກົມ,ຮອງກົມພ້ອມດ້ວຍສຳມະນາກອນຈາກພາກສ່ວນກ່ຽວຂ້ອງອ້ອມຂ້າງກະຊວງຖະແຫລງຂ່າວ,ວັດທະນາທຳແລະທ່ອງທ່ຽວເຂົ້າຮ່ວມ.
ທ່ານ ຄຳຫລ້າ ຍອຍສາຍຄຳ ຫົວຫນ້າສະຖາບັນສື່ມວນຊົນ,ວັດທະນາທຳແລະທ່ອງທ່ຽວກ່າວຈຸດປະສົງຂອງການເປີດຊຸດຮຽນທິດສະດີການເມືອງຂັ້ນຕົ້ນຊຸດທີ 2 ຂອງກະຊວງຖະແຫລງຂ່າວ,ວັດທະນາທຳແລະທ່ອງທ່ຽວຄັ້ງນີ້ເພື່ອຍົກລະດັບຄວາມຮູ້ຄວາມສາມາດດ້ານທິດສະດີການເມືອງ,ແນວຄິດໄກສອນພົມວິຫານ,ແນວທາງນະໂຍບາຍຂອງພັກ,ບັນດາກົດຫມາຍຂອງລັດແລະແຜນພັດທະນາເສດຖະກິດ-ສັງຄົມຂອງລັດ,ສ້າງພະນັກງານ-ລັດຖະກອນໃຫ້ມີຄຸນທາດການເມືອງຢ່າງຫນັກແຫນ້ນ,ມີລະດັບຄວາມສາມາດໃນການຈັດຕັ້ງປະຕິບັດຕາມແນວທາງນະໂຍບາຍຂອງພັກໃຫ້ເກີດດອກອອກຜົນຢ່າງຈະແຈ້ງ.
ໂອກາດນີ້ທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫລງຂ່າວ,ວັດທະນາທຳແລະທ່ອງທ່ຽວມີຄຳເຫັນວ່າ: ການຮຽນທິດສະດີການເມືອງຂັ້ນຕົ້ນຄັ້ງນີ້ຈະເຮັດໃຫ້ບັນດາສະມາຊິກພັກ-ພະນັກງານຫລັກແຫລ່ງຂອງບັນດາກົມອ້ອມຂ້າງກະຊວງຖວທ ທີ່ໄດ້ຝຶກອົບຮົມມີໂລກະທັດໃຫມ່ແລະຮັບຮູ້ກົດເກນທີ່ແນ່ນອນ,ຮູ້ໄດ້ເຫດຜົນເພື່ອແກ້ໄຂບັນຫາຕ່າງໆໃນຫນ້າທີ່ວຽກງານເຊິ່ງຈະເປັນຜູ້ທີ່ມີຄວາມຮູ້ຄວາມສາມາດໃນການນຳພາຄຸ້ມຄອງໃນການຈັດຕັ້ງຜັນຂະຫຍາຍແນວທາງນະໂຍບາຍ,ມະຕິ,ຄຳສັ່ງຂອງພັກ,ກົດຫມາຍແລະລະບຽບການຕ່າງໆຂອງລັດວາງອອກໃຫ້ປະກົດຜົນເປັນຈິງຢ່າງດີ,ພ້ອມນີ້ຍັງສ້າງໃຫ້ເປັນຜູ້ທີ່ມີວິໄສທັດອັນກ້ວາງໄກໃນການນຳເອົາແຜນພັດທະນາເສດຖະກິດ-ສັງຄົມແຫ່ງລັດເພື່ອມາຜັນຂະຫຍາຍເຂົ້າສູ່ວຽກງານທີ່ຕົນເອງຮັບຜິດຊອບໃຫ້ໄດ້ດີຍິ່ງໆຂຶ້ນ.
ສຳລັບຊຸດຮຽນທິດສະດີການເມືອງຂັ້ນຕົ້ນຊຸດທີ 2 ຂອງກະຊວງຖະແຫລງຂ່າວ,ວັດທະນາທຳແລະທ່ອງທ່ຽວຈະດຳເນີນໄປແຕ່ວັນທີ 19 ສິງຫາຫາວັນທີ 22 ພະຈິກນີ້ຈິ່ງຈະສຳເລັດ ເຊິ່ງສຳມະນາກອນຈະໄດ້ຄົ້ນຄ້ວາຮ່ຳຮຽນ ໃນ 6 ກຸ່ມວິຊາຮຽນ ເປັນຕົ້ນ:ກຸ່ມວິຊາປັດຊະຍາມາກ-ເລນິນ ,ກຸ່ມວິຊາເສດຖະສາດການເມືອງມາກ-ເລນິນ,ກຸ່ມວິຊາລັດທິສັງຄົມນິຍົມວິທະຍາສາດແລະວິຊາອື່ນໆ.
