ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ເປີດດ່ານສາກົນປາງມອນຢ່າງເປັນທາງການ

ໃນຕອນເຊົ້າຂອງວັນທີ 1 ກຸມພາ 2020, ຢູ່ເມືອງຄອບ, ແຂວງ ໄຊຍະບູລີ, ໄດ້ຈັດພິທີ ເປີດດ່ານສາກົນ ປາງມອນ ຢ່າງເປັນທາງການ. ໃຫ້ກຽດເຂົ້າຮ່ວມພິທີໃນຄັ້ງນີ້, ມີທ່ານ ທອງສະຫັວນ ພົມວິຫານ, ຮອງລັດຖະມົນຕີກະຊວງການຕ່າງປະເທດ ແຫ່ງສປປ ລາວ ພ້ອມດ້ວຍຄະນະ, ແລະ ທ່ານ ຍັນຍົງ ສີປະເສີດ, ຮອງເຈົ້າແຂວງໆໄຊຍະບູລີ ພ້ອມດ້ວຍຄະນະ. ນອກນີ້ ຍັງມີ ທ່ານ ກະມົນ ຊຽງວົງ, ເຈົ້າແຂວງໆ ພະເຍົາ ລາຊະອານະຈັກໄທ ພ້ອມດ້ວຍພັນລະຍາ ແລະ ຄະນະ, ບັນດາຮອງລັດຖະມົນຕີ, ຜູ້ຕາງ ໜ້າຈາກກະຊວງຕ່າງໆ, ພ້ອມດ້ວຍເອກຄະລັດຖະທູດລາວ ປະຈຳ ລາຊະອານາຈັກໄທ, ເອກຄະລັດຖະທູດໄທ ປະຈຳສປປ ລາວ, ຮອງເຈົ້າແຂວງໆຫຼວງພະບາງ, ແຂວງ ບໍ່ແກ້ວ ແລະ ຜູ້ຕາງໜ້າຈາກແຂວງ ອຸດົມໄຊ, ເຈົ້າແຂວງໆຊຽງລາຍ, ປະເທດໄທ ພ້ອມດ້ວຍຄະນະ, ບັນດາເຈົ້າເມືອງຕ່າງໆ ພ້ອມດ້ວຍແຂກພາຍໃນ ແລະ ຕ່າງປະເທດ. ໃນພິທີດັ່ງກ່າວ, ທ່ານ ຍັນຍົງ ສີປະເສີດ, ຮອງເຈົ້າແຂວງໆໄຊຍະບູລີ ໃຫ້ກຽດຂຶ້ນກ່າວຕ້ອນຮັບ ພ້ອມທັງລາຍງານປະຫັວດຄວາມເປັນມາໂດຍສັງເຂບ ຂອງດ່ານປາງມອນ ເມືອງຄອບ, ແຂວງ ໄຊຍະບູລີ ຂອງສປປ ລາວ ຊຶ່ງຕັ້ງຢູ່ເຊິ່ງໜ້າກັບດ່ານ ບ້ານ ຮວກ, ເມືອງພູຊາງ, ແຂວງພະເຍົາ, ປະເທດໄທ, ເປັນດິນຕໍ່ແຜນ ທີ່ມີເສັ້ນທາງເຊື່ອມຕໍ່ກັນ.


ໃນວັນທີ 30 ພະຈິກ 1992, ລັດຖະບານສປປ ລາວ ໄດ້ເຫັນດີອະນຸມັດ ໃຫ້ເປີດເປັນດ່ານປະເພນີ ປາງມອນ ເພື່ອອຳນວຍຄວາມສະດວກໃນການໄປມາຫາສູ່ກັນ ແລະ ແລກປ່ຽນສິນຄ້າ ລະຫວ່າງ ປະຊາຊົນຊາວເມືອງຄອບ ແຂວງ ໄຊຍະບູລີ ແລະ ເມືອງ ພູຊາງ, ເມືອງ ຊຽງຄຳ ແຂວງ ພະເຍົາ ລາຊະອານາຈັກໄທ.
ມາຮອດປີ 2015 – 2016, ລັດຖະບານສປປ ລາວ ໄດ້ສ້າງເສັ້ນທາງເຊື່ອມຕໍ່ລະຫວ່າງຊາດ ຊຶ່ງໄດ້ມາດຕະຖານລະດັບອາຊຽນ ແລະ ໄດ້ສຳເລັດການກໍ່ສ້າງພື້ນຖານໂຄງລ່າງ ຂອງດ່ານປາງມອນ ຕາມການອະນຸມັດຂອງກະຊວງໂຍທາທິການ ແລະ ຂົນສົ່ງ ເພື່ອເຮັດໃຫ້ມີຄວາມສະດວກ ໃນການພົວພັນຮ່ວມມືທາງດ້ານການຄ້າ, ການລົງທຶນ ແລະ ການທ່ອງທ່ຽວ ລະຫວ່າງສອງແຂວງ ໄຊຍະບູລີ ກັບ ແຂວງ ພະເຍົາ ກໍ່ຄື ລະຫວ່າງສປປ ລາວ ກັບ ປະເທດໄທ, ຊຶ່ງມີການຂະຫຍາຍຕົວ ແລະ ເພີ່ມທະວີຂຶ້ນຢ່າງຕໍ່ເນື່ອງ ແລະ ທັງເປັນການຮອງຮັບໃຫ້ແກ່ການເປັນປະຊາຄົມເສດຖະກິດອາຊຽນອີກດ້ວຍ.
ການຕັດສິນໃຈຍົກລະດັບຈາກດ່ານປະເພນີ ເປັນດ່ານສາກົນປາງມອນ ເມືອງຄອບ, ແຂວງ ໄຊຍະບູລີ ແມ່ນຍ້ອນ ຈຸດດັ່ງກ່າວນີ້ ມີທີຕັ້ງຍຸດທະສາດທາງດ້ານການບໍລິການທາງຜ່ານ ແລະ ການຄ້າໃນລະດັບອະນຸພາກພື້ນ, ເປັນປະຕູດ່ານເຊື່ອມໂຍງລະບຽງເສດຖະກິດລະຫວ່າງ 8 ແຂວງພາກເໜືອ ສປປ ລາວ ຫາ ພາກເໜືອຕອນເທິງ ຂອງປະເທດໄທ ( ນະຄອນຊຽງໃໝ່ ), ແລະ ຍັງເປັນແລວທາງເຊື່ອມຕໍ່ລະຫວ່າງ ພາກເໜືອຕອນເທິງ ຂອງປະເທດໄທ ກັບ ເມືອງມໍລະດົກໂລກຫຼວງພະບາງ ຂອງລາວຊຶ່ງຈະເຮັດໃຫ້ການພົວພັນທາງດ້ານການຄ້າ, ການລົງທຶນ ແລະ ການທ່ອງທ່ຽວ ລະຫວ່າງສອງແຂວງ ແລະ ແຂວງ ໃກ້ຄຽງຂອງສອງປະເທດ ມີຄວາມສະດວກຂື້ນກວ່າເກົ່າ ຊຶ່ງບໍ່ພຽງແຕ່ຈະນຳເອົາຜົນປະໂຫຍດມາສູ່ແຂວງ ໄຊຍະບູລີເທົ່ານັ້ນ ແຕ່ຍັງຈະປະກອບສ່ວນເຂົ້າໃນການພັດທະນາລວມຂອງປະເທດລາວ, ທັງນີ້ເພື່ອບັນລຸແຜນຍຸທະສາດ ໃນການລືບລ້າງຄວາມທຸກຍາກ ແລະ ນຳພາປະເທດລາວໃຫ້ຫຼຸດພົ້ນອອກຈາກສະຖານະພາບດ້ອຍພັດທະນາອີກດ້ວຍ.
ໃນໂອກາດດຽວກັນນີ້, ທ່ານ ທອງສະຫວັນ ພົມວິຫານ, ຮອງລັດຖະມົນຕີ ກະຊວງການຕ່າງປະເທດ ແຫ່ງສປປ ລາວ ໄດ້ໃຫ້ກຽດກ່າວເປີດດ່ານສາກົນປາງມອນຢ່າງເປັນທາງການ; ຈາກນັ້ນ ທ່ານ ທອງສະຫວັນ ພົມວິຫານ ພ້ອມດ້ວຍຄະນະນຳຂັ້ນສູນກາງ, ຂັ້ນແຂວງ ແລະ ແຂກທີ່ຖືກເຊີນທັງພາຍໃນ ແລະ ຕ່າງປະເທດຍັງໄດ້ເຂົ້າຮ່ວມເປັນສັກຄີພິຍານ ໃນການລັ່ນຄ້ອງ 9 ບາດ ພ້ອມທັງປ່ອຍໝາກປຸ່ມເປົ່າຂື້ນສູ່ທ້ອງຟ້າຕື່ມອີກ.

ຂ່າວ: ທອງແກ້ວ ຈາກເມືອງຄອບ