ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ພິທີເປີດນໍາໃຊ້ໂຮງແຮມ ລາດຊະວົງ ວັນດ້າ ວິສຕ້າ ເຊິ່ງເປັນໜຶ່ງໃນໂຮງແຮມໃຫຍ່ທີ່ສຸດໃນນະຄອນຫລວງວຽງຈັນ ຈັດຂຶ້ນຢ່າງເປັນທາງການໃນວັນທີ 19 ມິຖຸນາ 2024 ໂດຍການໃຫ້ກຽດເຂົ້າຮ່ວມຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ, ທ່ານ ພົນເອກ ຈັນສະໝອນ ຈັນຍາລາດ, ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນປະເທດ, ທ່ານ ເຊິນປິ່ນ ປະທານບໍລິສັດ ລາດຊະວົງ ພັດທະນາຈຳກັດ, ມີການນຳພັກ-ລັດ, ແຂກຖືກເຊີນ ແລະ ພະນັກງານວິຊາ ການທີ່ກ່ຽວຂ້ອງເຂົ້າຮ່ວມ.
ໃນພິທີ, ທ່ານ ພົນເອກ ຈັນສະໝອນ ຈັນຍາລາດ ໄດ້ກ່າວວ່າ: ໂຄງການດັ່ງກ່າວ ໄດ້ເຊັນສັນຍາກັນໃນທ້າຍປີ 2013 ຊຶ່ງເປັນການຮ່ວມມືທຸລະກິດ ລະຫວ່າງ ກະຊວງປ້ອງກັນປະເທດ ກັບ ບໍລິສັດ ຊົງຊີງ ຟາງເຕີ ພັດທະນາ ອະສັງຫາລິມະຊັບ ຈຳກັດ ພາຍຫຼັງເຊັນສັນຍາ ໄດ້ດຳເນີນການກໍ່ສ້າງບັນດາໜ້າວຽກໂຄງສ້າງຫຼັກຂອງຕົວອາຄານສຳເລັດ ແຕ່ຍັງບໍ່ສົມບູນ ແລະ ໄດ້ຕົບແຕ່ງພາຍນອກສຳເລັດຈຳນວນໜຶ່ງ.
ຍ້ອນສະພາບການແຜ່ລະບາດຂອງພະຍາດໂຄວິດ-19 ແລະ ສະພາບການເງິນຂອງຜູ້ລົງທຶນບໍ່ຄ່ອງຕົວ, ສັນຍາ ແລະ ນິຕິກຳກ່ຽວພັນຈຳນວນໜຶ່ງ ຍັງບໍ່ທັນສອດຄ່ອງ ແລະ ບໍ່ຮັດກຸມເທົ່າທີ່ຄວນ. ສະນັ້ນ, ມາຮອດປີ 2016 ການຈັດຕັ້ງປະຕິບັດຕົວຈິງພົບຂໍ້ຫຍຸ້ງຍາກ ແລະ ໄດ້ໂຈະການກໍ່ສ້າງເປັນການຊົ່ວຄາວ ແຕ່ລັດຖະບານກໍຄືການນຳຂອງກະຊວງປ້ອງກັນປະເທດ ໄດ້ເອົາໃຈໃສ່ໄດ້ຊີ້ນຳ ແກ້ໄຂ ແລະ ຊຸກຍູ້ຈົນເຮັດໃຫ້ໂຄງການດັ່ງກ່າວສາມາດສືບຕໍ່ກໍ່ສ້າງຄືນໃໝ່ໃນປີ 2021 ແລະ ມາຮອດຕົ້ນປີ 2024 ໄດ້ເລີ່ມເປີດທົດລອງນໍາໃຊ້ບາງສ່ວນພ້ອມທັງປັບປຸງບາງຈຸດໃຫ້ສອດຄອງເໝາະສົມ ແລະ ປັດຈຸບັນນີ້ ໂຮງແຮມລາດຊະວົງ ວັນດ້າ ວິສຕ້າ ແມ່ນມີຄວາມພ້ອມໃຫ້ການບໍລິການແລ້ວ 100%.
ສໍາລັບໂຮງແຮມ ລາດຊະວົງ ພລາຊາ ວັນດ້າ ວິສຕ້າ ປະກອບມີໂຮງແຮມລະດັບ 5 ດາວ, ຫ້ອງການ, ອາພາດເມັນ, ສູນບຳບັດ ແລະ ປິ່ນປົວສຸຂະພາບ, ສູນການຄ້າຄົບວົງຈອນ, ສູນບັນເທີງ, ສູນກິລາ, ຮ້ານອາຫານນາໆຊາດ ແລະ ອື່ນໆ ຕັ້ງຢູ່ໃຈ ກາງນະຄອນຫຼວງວຽງຈັນ, ມີເນື້ອທີ່ກໍ່ສ້າງທັງໝົດ 188.000 ຕາແມັດ, ຄວາມສູງ 138 ແມັດ, ມີ 36 ຊັ້ນ, ເປັນອາຄານຕຶກທີ່ສູງທີ່ສຸດຢູ່ປະເທດລາວໃນປັດຈຸບັນ.
ນອກຈາກນີ້, ໂຮງແຮມດັ່ງກ່າວ ຈະເປັນອີກໂຄງການໜຶ່ງທີ່ປະກອບສ່ວນເຂົ້າໃນການສ້າງວຽກເຮັດງານທໍາ ໃຫ້ແກ່ປະຊາຊົນລາວເຮົາ, ດຶງດູດການທ່ອງທ່ຽວ ແລະ ການພັດທະນາເສດຖະກິດ-ສັງຄົມ ຂອງ ສປປ ລາວ ໂດຍສະເພາະ ຈະໄດ້ນໍາເຂົ້າໃນການ ຮັບໃຊ້ຄະນະຜູ້ແທນພາຍໃນ ແລະ ຕ່າງປະເທດ ມາຈັດກອງປະຊຸມ, ຈັດງານພິທີຕ່າງໆ ໃນນັ້ນ ລວມເຖິງການຮອງຮັບແຂກກອງປະຊຸມປ້ອງກັນປະເທດອາຊຽນ ແລະ ອາຊຽນບວກ ທີ່ ສປປ ລາວ ເປັນເຈົ້າພາບໃນປີ 2024 ນີ້.
May be an image of 14 people and dais
May be an image of skyscraper and text