ON AIR

ຟັງວິທະຍຸ FM103.7Mhz ອອນລາຍ
Listen to Radio FM103.7Mhz Online

ເປີດນໍາໃຊ້ຢ່າງເປັນທາງການເສັ້ນທາງຫຼວງເລກທີ່ 4B ແຕ່ເມືອງຫົງສາ-ເມືອງຈອມເພັດ

ໃນວັນທີ 14 ມັງກອນ 2020, ທີ່ເມືອງຈອມເພັດ, ແຂວງຫຼວງພະບາງ, ໄດ້ຈັດພິທີມອບ-ຮັບ ແລະ ເປີດນຳໃຊ້ເສັ້ນທາງຫຼວງແຫ່ງຊາດເລກທີ່ 4B ແຕ່ເມືອງຫົງສາ ແຂວງໄຊຍະບູລີ ຫາ ບ້ານຊຽງແມນ ເມືອງຈອມເພັດ ແຂວງຫຼວງພະບາງ, ໂດຍມີ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໃຫ້ກຽດເຂົ້າຮ່ວມ ພ້ອມດ້ວຍ ທ່ານ ພິຣະເມດວຸດ ທິທອນເນທິຣັກ ປະທານອົງການນີດາ (ຜູ້ໃຫ້ທືນ), ທ່ານເອກອັກຄະລາຊທູດຣາຊະອານາຈັກໄທ ປະຈຳ ສປປ ລາວ ແລະ ຄະນະນຳກະຊວງໂຍທາທິການ ແລະ ຂົນສົ່ງ, ຄະນະນຳແຂວງຫຼວງພະບາງ-ແຂວງໄຊຍະບູລີ, ຜູ້ຕາງໜ້າຈາກບັນດາກະຊວງກ່ຽວຂ້ອງ, ບໍລິສັດຮັບເໝົາ, ພ້ອມດ້ວຍ ຜູ້ຕາງໜ້າຈາກພາກສ່ວນຕ່າງໆທີ່ກ່ຽວຂ້ອງ.

ໂຄງການກໍ່ສ້າງເສັ້ນທາງຫຼວງເລກທີ່ 4B ເປັນເສັ້ນທາງປູຢາງສອງຊັ້ນ, ຫນ້າທາງລົດແລ່ນມີ 2 ຊ່ອງຈະລາຈອນ, ຄວາມກວ້າງຫນ້າທາງເຂດທົ່ງພຽງ 9 ແມັດ, ເຂດຫຼຸບໂນນ 8 ແມັດ ແລະ ເຂດພູດອຍ 7 ແມັດ, ໂດຍມີການກໍ່ສ້າງຂົວຂ້າມທັງໝົດ 8 ແຫ່ງ, ໃນນັ້ນ ຢູ່ເຂດແຂວງໄຊຍະບູລີມີ 1 ແຫ່ງ ແລະ ຢູ່ເຂດແຂວງຫລວງພະບາງມີ 7 ແຫ່ງ, ມີຄວາມຍາວ ທັງໝົດ 114 ກິໂລແມັດ ຈາກບ້ານນາປຸ່ງ ເມືອງຫົງສາ ແຂວງໄຊຍະບູລີ ຫາ ບ້ານຊຽງແມນ ເມືອງຈອມເພັດ ແຂວງຫລວງພະບາງ, ໂດຍແມ່ນ ບໍລິສັດ ຊໍທະວີ ກໍ່ສ້າງຈໍາກັດ ແຫ່ງປະເທດໄທ ເປັນຜູ້ຮັບເຫມົາກໍ່ສ້າງF ລວມມູນຄ່າກໍ່ສ້າງປະມານ 2 ຕື້ບາດ (ສະກຸນເງີນໄທ) ຫຼື ປະມານ 580 ຕື້ກີບ, ໂດຍທືນສະຫນັບສະຫນູນຈາກລັດຖະບານໄທ ກໍ່ຄື ຈາກສໍານັກງານຄວາມຮ່ວມມືພັດທະນາເສດຖະກິດກັບປະເທດເພື່ອນບ້ານ (ອົງການມະຫາຊົນ ຫລື NEDA ແຫ່ງປະເທດໄທ), ໂດຍ ໃນນີ້ ເປັນທືນກູ້ຢືມ 80% ແລະ ທືນຊ່ວຍເຫລືອລ້າ 20%.

ການກໍ່ສ້າງໄດ້ເລີ່ມຕັ້ງແຕ່ເດືອນສິງຫາ 2015, ແລະ ອີງຕາມສັນຍາ, ໂຄງການແມ່ນມີກຳນົດເວລາ 32 ເດືອນເພື່ອກໍ່ສ້າງໃຫ້ສໍາເລັດ, ແຕ່ເມື່ອອີງໃສ່ເງື່ອນໄຂຕົວຈິງໃນການຍົກຍ້າຍສິ່ງກີດຂວາງ ແລະ ການນໍາເຂົ້າອຸປະກອນການກໍ່ສ້າງ ມີຄວາມຫຍຸ້ງຍາກ ຈຶ່ງເຮັດໃຫ້ການກໍ່ສ້າງເກີດລ້າຊ້າ ເກີນກໍານົດໄປເຖິງ 12 ເດືອນກວ່າ ຈົນມາຮອດປະຈຸບັນ ຈຶ່ງສໍາເລັດ 100%.
ໃນພິທີດັ່ງກ່າວ, ທ່ານລັດຖະມົນຕີກະຊວງໂຍທາທິການ ແລະ ຂົນສົ່ງແຫ່ງສປປ ລາວ ໄດ້ກ່າວເປີດນ້ຳໃຊ້ເສັ້ນທາງ ແລະກ່າວມອບໃຫ້ອົງການປົກຄອງທ້ອງຖີ່ນ ເປັນຜູ້ນຳໃຊ້ ແລະ ປົກປັກຮັກສາຕໍ່ໄປ.
ຈາກນັ້ນ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ກໍ່ໄດ້ຮ່ວມຕັດແຖບຜ້າ, ເພື່ອເປີດນໍາໃຊ້ເສັ້ນທາງຫຼວງເລກທີ່ 4B ຢ່າງເປັນທາງການ.

ຂ່າວ: ແຫຼ້ ສຸລີນພອນ