ກົມຊັບສິນທາງປັນຍາ ກະຊວງອຸດສາຫະກໍາ ແລະ ການຄ້າ (ອຄ) ຈັດພິທີເປີດໂຕ ລະບົບແຫຼ່ງຂໍ້ມູນຊັບສິນທາງປັນຍາ ຫຼື IP Portal ໃນ ວັນທີ 5 ສິງຫາ 2024 ການເປີດໂຕ ລະບົບແຫຼ່ງຂໍ້ມູນຊັບສິນທາງປັນຍາຂອງ ສປປ ລາວ ເປັນບາດກ້າວອັນສໍາຄັນຂອງວຽກງານຊັບສິນທາງປັນຍາ ເພື່ອປະກອບສ່ວນເຂົ້າໃນການພັດທະນາເສດຖະກິດ ແລະ ການຄ້າຂອງປະເທດເຮົາ ເນື່ອງຈາກວ່າແຫຼ່ງຂໍ້ມູນນີ້ຈະເຮັດໜ້າທີ່ເປັນຂົວເຊື່ອມຕໍ່ ລະຫວ່າງ ເຈົ້າຂອງຊັບສິນທາງປັນຍາ ກັບ ຜູ້ຊື້ສິນຄ້າດ້ານຊັບສິນທາງປັນຍາ, ເປັນຕະຫຼາດຊື້ ຂາຍ ສິນຄ້າດ້ານຊັບສິນທາງປັນຍາ ໃນທົ່ວປະເທດ ແລະ ເຊື່ອມຕໍ່ກັບຕະຫຼາດຕ່າງປະເທດອີກດ້ວຍ, ມັນຈະເຮັດໃຫ້ການເຂົ້າເຖິງການບໍລິການດ້ານຊັບສິນທາງປັນຍາຂອງກົມພວກເຮົາສະດວກວ່ອງໄວຂຶ້ນກວ່າເກົ່າ, ການເຂົ້າເຖິງແຫຼ່ງຂໍ້ມູນທີ່ຈຳເປັນໃນການກະກຽມຄວາມພ້ອມໃນການເຂົ້າຕະຫຼາດທາງດ້ານຊັບສິນທາງປັນຍາທັງພາຍໃນ ແລະ ຕ່າງປະເທດ ງ່າຍຂຶ້ນ, ການເຂົ້າເຖິງ
ແຫຼ່ງຂໍ້ມູນດ້ານນະວັດຕະກຳ ທີ່ໄດ້ຮັບການຈົດທະບຽນສິດທິບັດ ຈະເຮັດໃຫ້ນັກຄົ້ນຄວ້າ, ນັກສຶກສາ ສາມາດຄິດຄົ້ນການປະດິດສ້າງ ແລະ ປະດິດຄິດແຕ່ງ ໄດ້ຢ່າງມີປະສິດທິຜົນສູງຂຶ້ນ, ການຮຽນຮູ້ກ່ຽວກັບວຽກງານຊັບສິນທາງປັນຍາ ສຳລັບນັກຮຽນນັກສຶກສາ ລວມທັງບໍລິສັດຕົວແທນທີ່ໃຫ້ບໍລິການດ້ານຊັບສິນທາງປັນຍາ ຈະເຮັດໄດ້ສະດວກຂຶ້ນກວ່າເກົ່າ ເຊັ່ນດຽວກັບການຝຶກອົບຮົມທາງອອນລາຍຕ່າງໆ ຈາກອົງການຊັບສິນທາງປັນຍາໂລກ ແລະ ບັນດາປະເທດທີ່ເປັນພັນທະມິດຂອງເຮົາກໍຈະງ່າຍຂຶ້ນ.
ຊັບສິນທາງປັນຍາເປັນສິ່ງທີ່ມີຄວາມສຳຄັນຢ່າງຍິ່ງ ຕໍ່ການສົ່ງເສີມຄວາມຄິດສ້າງສັນ ແລະ ສ້າງນະວັດຕະກຳໃໝ່ ເພື່ອມາແກ້ໄຂບັນຫາ ຫຼື ປ່ຽນແປງສັງຄົມເຮົາເຮັດໃຫ້ການດຳລົງຊີວິດມີຄວາມສະດວກວ່ອງໄວຂຶ້ນກວ່າເກົ່າ ທັງເປັນການປະກອບສ່ວນເຂົ້າໃນການພັດທະນາເສດຖະກິດ ແລະສັງຄົມຂອງປະເທດເຮົາ ໃນຍຸກເຕັກໂນໂລຊີດີຈີຕອນ ທີ່ໂລກເຮົາເຂົ້າສູ່ການພັດທະນາທາງເຕັກໂນໂລຊີຢ່າງວ່ອງໄວ ເປັນຕົ້ນ: ອິນເຕີເນັດແຫ່ງຊັບປະສິ່ງ, Big Data, AI, 5G ແລະ ອື່ນໆ… ສະນັ້ນ, ການຄຸ້ມຄອງ ແລະ ຈັດການຊັບສິນທາງປັນຍາທີ່ມີປະສິດທິຜົນ ແລະ ປະສິດທິພາບສູງ ໄດ້ກາຍເປັນສິ່ງທີ່ຈໍາເປັນຢ່າງຍິ່ງ ເພື່ອຊ່ວຍໃຫ້ທຸລະກິດຂອງພວກເຮົາສາມາດເຂົ້າເຖິງຕະຫຼາດໂລກໄດ້ອີກວິທີໜຶ່ງ, ພ້ອມທັງສ້າງຄວາມສາມາດແຂ່ງຂັນໃນຕະຫຼາດໂລກ ແລະ ສ້າງມູນຄ່າເພີ່ມໃຫ້ກັບສິນຄ້າຂອງພວກເຮົາໄດ້ອີກດ້ວຍ.
ການທີ່ມີລະບົບແຫຼ່ງຂໍ້ມູນຊັບສິນທາງປັນຍາໃໝ່ນີ້ ບໍ່ພຽງແຕ່ຊ່ວຍໃຫ້ປະຊາຊົນ, ນັກທຸລະກິດ, ນັກວິໄຈ, ນັກຄົ້ນຄວ້າ ແລະ ນັກສຶກສາ ສາມາດເຂົ້າເຖິງຂໍ້ມູນຊັບສິນທາງປັນຍາ ໄດ້ງ່າຍຂຶ້ນເທົ່ານັ້ນ ແຕ່ຍັງເປັນເຄື່ອງມືທີ່ສຳຄັນໃນການຊ່ວຍເຫຼືອໃນການເຂົ້າເຖິງຕະຫຼາດຂອງທະລະກິດ ໂດຍສະເພາະ ວິສະຫະກິດຂະໜາດນ້ອຍ ແລະ ກາງ ທີ່ເປັນກຳລັງສຳຄັນໃນການພັດທະນາເສດຖະກິດແລະ ສັງຄົມ ຂອງປະເທດເຮົາ. ຂ້າພະເຈົ້າຂໍສະແດງຄວາມຂອບໃຈຢ່າງສູງມາຍັງ ອົງການ USAID ແລະ ໂຄງການ LBE ທີ່ໄດ້ໃຫ້ແລະ ການພັດທະນາວຽກງານຊັບສິນທາງປັນຍາດ້ານອື່ານໆ ອີກດ້ວຍ. ຂໍຂອບໃຈນຳ ບໍລິສັດ Team Yes ລວມທັງ ພະນັກງານໃນພະແນກສົ່ງເສີມຊັບສິນທາງປັນຍາ ແລະ ລິຂະສິດ ຂອງ ກົມຊັບສິນທາງ
ປັນຍາ ທຸກທ່ານທີ່ມີສ່ວນຮ່ວມໃນການພັດທະນາ ແລະ ສ້າງລະບົບດັ່ງກ່າວນີ້ຈົນສຳເລັດ.
ຂ້າພະເຈົ້າຫວັງວ່າ ລະບົບແຫຼ່ງຂໍ້ມູນຊັບສິນທາງປັນຍາ ຂອງ ສປປ ລາວ ຈະເປັນເຄື່ອງມືທີ່ສຳຄັນໃນການສ້າງຄວາມເຂັ້ມແຂງໃຫ້ພາກທຸລະກິດ, ສະຖາບັນຄົ້ນຄວ້າ, ສະຖາບັນການສຶກສາ ແລະ ອື່ນໆ ເພື່ອປະກອບສ່ວນເຂົ້າໃນການພັດທະນາເສດຖະກິດ ແລະ ສັງຄົມ ຂອງພວກເຮົາໃຫ້ນັບມື້ນັບຂະຫຍາຍຕົວຍິ່ງໆຂຶ້ນ. ນອກຈາກນັ້ນ, ຍັງເປັນແຮງຜັກດັນການຫັນເສດຖະກິດເປັນອຸດສາຫະກຳສີຂຽວ ແລະ ຍືນຍົງ ເປັນເສດຖະກິດພູມປັນຍາ ໃນອະນາຄົດອັນໃກ້ນີ້.
ຂ່າວ: ເສດຖະກິດການຄ້າ
