ຕອນຄໍ່າ ວັນທີ 27 ພະຈິກ 2020 ທີ່ເດີ່ນປະຕູໄຊ ໄດ້ມີພິທີເປີດການນໍາໃຊ້ລະບົບໄຟເຍືອງທາງໃນ 7 ເສັ້ນທາງແລະລະບົບນໍ້າພຸປະຕູໄຊ ໃນໂຄງການແສງສະຫວ່າງຂອງເຂດເທດສະບານ ໃຈກາງຕົວເມືອງນະຄອນຫຼວງວຽງຈັນ ເຊິ່ງເປັນໂຄງການຊ່ວຍເຫຼືອລ້າຈາກລັດຖະບານແຫ່ງ ສປຈີນ ໂດຍການໃຫ້ກຽດເຊົ້າຮ່ວມຂອງທ່ານ ສິນລະວົງ ຄຸດໄພທູນ, ເຈົ້າຄອງນະຄອນຫຼວງວຽງຈັນ ແລະ ທ່ານ ຈ່ຽງຈ້າຍຕຸງ ເອກອັກຄະລັດຖະທູດຈີນ ປະຈໍາລາວ.

ໂຄງການດັ່ງກ່າວ ປະກອບມີ 3 ໜ້າວຽກຫຼັກຄື: ຍົກລະດັບລະບົບໄຟຟ້າເຂດເທດສະບານ ແລະຊານເມືອງໃນນະຄອນຫຼວງວຽງຈັນ, ປັບປຸງລະບົບນໍ້າພຸຢູ່ສວນປະຕູໄຊ ແລະຍົກລະດັບລະບົບໄຟແສງສະຫວ່າງເຍືອງທາງໃນ 7 ເສັ້ນທາງ ຂອງເຂດໃຈກາງນະຄອນຫຼວງວຽງຈັນ.

ໂອກາດນີ້, ທ່ານ ຊົງເລົ່າ ຢົງນູ ຫົວຫນ້າພະແນກພະ ລັງງານ ແລະ ບໍ່ແຮ່ ໄດ້ຕາງໜ້າຄະນະຮັບຜິດຊອບໂຄງ ການຝ່າຍລາວ ລາຍງານຄວາມຄືບໜ້າການຈັດຕັ້ງປະຕິ ບັດໂຄງການນີ້ ພາຍຫຼັງສອງຝ່າຍ ລາວ-ຈີນ ໄດ້ລົງມືຕິດຕັ້ງລະບົບດັ່ງກ່າວ ນັບແຕ່ວັນທີ 12 ກັນຍາ ປີ 2020 ຮອດປັດຈຸບັນນີ້, ໂຄງການໄດ້ສຳເລັດໂດຍພື້ນຖານໃນການກໍ່ ສ້າງ-ຕິດຕັ້ງ ແລະສາມາດເປີດນໍາໃຊ້ຢ່າງເປັນທາງການ.

ໂຄງການດັ່ງກ່າວ ຍັງມີວຽກຈໍານວນໜຶ່ງຈະຕ້ອງໄດ້ສືບຕໍ່ປະຕິບັດ ເຊັ່ນ: ການປັບປຸງທາງຍ່າງ, ບ່ອນຕິດຕັ້ງຕີນເສົາ, ຕິດຕັ້ງລະບົບກ້ອງວົງຈອນປິດ ແລະຫ້ອງຄວບຄຸມ ລວມທັງສັນຍານສົ່ງຂໍ້ມູນ ແລະອື່ນໆ ເຊິ່ງຈະໃຫ້ສໍາເລັດໃນວັນທີ 25 ກຸມພາ ປີ 2021 ແລະຄາດວ່າຈະໄດ້ມອບ-ຮັບໂຄງການ ໃນວັນທີ 25 ມີນາ ປີ 2021.

Cr: CRI-93 + Lao Youth FM 90

Loading...