ພິທີເປີດການນໍາໃຊ້ສະຖານີລົດໄຟວຽງຈັນ (ຄຳສະຫວາດ) ໂຄງການກໍ່ສ້າງທາງລົດໄຟ ລາວ-ໄທ ໄລຍະ II ຢ່າງເປັນທາງການ ຈັດຂຶ້ນໃນຕອນເຊົ້າວັນທີ 30 ຕຸລາ ປີ 2023 ໂດຍການໃຫ້ກຽດເຂົ້າຮ່ວມຂອງ ພະນະ ທ່ານ ສອນໄຊ ສີພັນດອນ, ນາຍົກລັດ ຖະມົນຕີ ແຫ່ງ ສປປ ລາວ ແລະ ພະນະ ທ່ານ ເສດຖາ ທະວີສິນ, ນາຍົກລັດຖະມົນຕີ ແຫ່ງ ຣາຊະອານາຈັກໄທ, ພ້ອມດ້ວຍການນໍາຂັ້ນສູງຂອງສອງປະເທດລາວ-ໄທ.
ໃນໂອກາດນີ້ ທ່ານ ງາມປະສົງ ເມືອງມະນີ, ລັດຖະມົນຕີ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ໄດ້ລາຍງານໃຫ້ຮູ່ວ່າ: ໂຄງການກໍ່ສ້າງທາງລົດໄຟ ລາວ-ໄທ ໄລຍະ II ໄດ້ຮັບການສະໜັບສະໜູນດ້ານການເງິນຈາກລັດ ຖະບານ ແຫ່ງ ຣາຊະອານາຈັກໄທ ໂດຍຜ່ານອົງການຮ່ວມມືພັດທະນາທາງດ້ານເສດຖະກິດກັບປະ ເທດເພື່ອນບ້ານ ຫຼື NEDA ໃນຮູບແບບເງິນກູ້ຢືມດອກເບ້ຍຕໍ່າ ແລະ ຊ່ວຍເຫຼືອລ້າ ເປັນຈຳນວນເງີນທັງໝົດ 1 ຕື້ 650 ລ້ານບາດ, ລວມທັງ ຕອນທີ 1 ແລະ ຕອນທີ 2 ເປັນເງິນກູ້ຢືມ 70% ແລະ ຊ່ວຍເຫຼືອລ້າ 30%.
ໂຄງການກໍ່ສ້າງທາງລົດໄຟ ລາວ-ໄທ ໄລຍະ II ( ຕອນທີ 2) ປະກອບມີ: ວຽກກໍ່ ສ້າງທາງລົດໄຟ ແຕ່ ສະ ຖານີທ່ານາແລ້ງ ຫາ ສະຖານີວຽງຈັນ (ຄຳສະຫວາດ) ມີຄວາມຍາວ 7,5 Km, ວຽກກໍ່ສ້າງສະຖານີວຽງຈັນ (ຄຳສະ ຫວາດ), ວຽກກໍ່ສ້າງເຮືອນພັກພະນັກງານ, ວຽກກໍ່ສ້າງທາງເຂົ້າເຂດສະຖານີ ແລະ ເຂດເຮືອນພັກພະ ນັກງານ, ວຽກກໍ່ ສ້າງທາງຕັດຜ່ານ, ທາງດິນແດງ (ສໍາລັບໃຫ້ປະຊາຊົນນຳໃຊ້ ແລະ ສ້ອມແປງທາງລົດໄຟ) ແລະ ວຽກອື່ນໆ ຈຳນວນນື່ງ. ໂດຍແມ່ນກົມທາງລົດໄຟ, ກະຊວງໂຍທາທິການ ແລະ ຂົນສົ່ງ ເປັນເຈົ້າຂອງໂຄງການ, ໄດ້ວ່າຈ້າງບໍລິສັດ ເອຊຽນ ອິນຈີເນຍຣິງ ຄອນຊາວເຕັນ (AEC) ແລະ ບໍລິສັດ LGE ຈາກ ລາວ ແລະ ໄທ ເປັນທີ່ປຶກສາຄວບຄຸມການກໍ່ສ້າງ ແລະ ວ່າຈ້າງບໍລິສັດ ເສີມສະຫງວນ ກໍ່ສ້າງ ຈຳກັດ ຈາກໄທ ເປັນຜູ້ຮັບເໝົາກໍ່ສ້າງ. ໂຄງການນີ້ໄດ້ເລີ່ມລົງມືກໍ່ສ້າງຕັ້ງແຕ່ເດືອນ ຕຸລາ ປີ 2019 ແລະ ສໍາເລັດໃນເດືອນ ມີຖຸນາ 2022, ມູນຄ່າໂຄງການທັງໝົດ ປະມານ 958.699.805,69 ບາດ, ໄລ ຍະເວລາກໍ່ສ້າງ 33 ເດືອນ.
ທ່ານ ງາມປະສົງ ເມືອງມະນີ ກ່າວຕື່ມວ່າ: ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ຈະໄດ້ສຶບຕໍ່ຄຸ້ມຄອງ, ບູລະນະ, ຮັກສາ ແລະ ນຳໃຊ້ສະຖານີວຽງຈັນ (ຄຳສະຫວາດ) ກໍ່ຄື ພື້ນຖານໂຄງລ່າງທາງລົດໄຟ ແລະ ສິ່ງອຳນວນຄວາມສະດວກຕ່າງໆ ໃຫ້ຍືນຍົງ ແລະ ມີປະສິດທິຜົນນັບແຕ່ນີ້ເປັນຕົ້ນໄປ. ພ້ອມນີ້ ທ່ານໄດ້ຕາງ ໜ້າໃຫ້ລັດຖະ ບານລາວສະແດງຄວາມຮູ້ບຸນຄຸນເປັນຢ່າງຍິ່ງທີ່ອົງການ NEDA ກໍ່ຄື ລັດຖະບານ ແຫ່ງ ຣາຊະອານາຈັກໄທ ທີ່ໄດ້ໃຫ້ການສະໜັບສະໜູນໃນການພັດທະນາພື້ນຖານໂຄງລ່າງດ້ານຄົມມະນນາຄົມ ເປັນຕົ້ນ: ການກໍ່ສ້າງທາງຫຼວງແຫ່ງຊາດ ເລກທີ 11 ການກໍ່ສ້າງຂົວມິດຕະພາບ ລາວ-ໄທ ແຫ່ງທີ 5 ແລະ ໂຄງການອື່ນໆ.
ໃນໂອກາດນີ້ ນາຍົກລັດຖະມົນຕີລາວ ແລະ ໄທ ໄດ້ໃຫ້ກຽດກົດປຸ່ມເພື່ອເປີດການນໍາໃຊ້ສະຖານີລົດໄຟວຽງຈັນ (ຄຳສະຫວາດ) ໂຄງການກໍ່ສ້າງທາງລົດໄຟ ລາວ-ໄທ ໄລຍະ II ຢ່າງເປັນທາງການ.
ຂ່າວ: ບຸນຕຽງ ຈັນທະວົງ
ພາບ: ອະພິນຍາ
