ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກະຊວງປ້ອງກັນປະເທດ ເປີດນໍາໃຊ ຫໍພິພິທະພັນປະຫວັດ ສາດກອງທັບ ໃນວັນທີ 13 ທັນວາ 2023 ພາຍຫລັງທີ່ສຳເລັດການບູລະນະສ້ອມແປງ ແລະ ປັບປຸງເນື້ອໃນການ ວາງສະ ແດງຄືນໃໝ່ ເພື່ອກະກຽມຈັດຕັ້ງສະເຫລີມສະຫລອງ ວັນສ້າງຕັ້ງກອງ ທັບປະຊາຊົນລາວ ຄົບຮອບ 75 ປີ ທີ່ຈະມາເຖິງນີ້ ໂດຍການເຂົ້າຮ່ວມຂອງ ທ່ານ ພົອ ຈັນສະໝອນ ຈັນຍາລາດ ຮອງນາຍົກ ລັດຖະມົນຕີ,ລັດຖະມົນຕີກະຊວງປ້ອງກັນປະເທດ, ທ່ານ ຟາມ ມິນຈຽນ ອຸປະທູດຊົ່ວຄາວ ສະຖານທູດຫວຽດ ນາມ ປະຈຳລາວ, ພ້ອມດ້ວຍການນຳກະຊວງປ້ອງກັນປະເທດ ເຂົ້າຮ່ວມ.
ພົວ ແປ້ນຄຳ ບຸດຈັນແພງ ຫົວໜ້າກົມໂຄສະນາອົບຮົມ, ກົມໃຫຍ່ການເມືອງກງທັບ ກະຊວງປ້ອງກັນປະເທດ ໄດ້ໃຫ້ຮູ້ວ່າ: ນັບແຕ່ປີ 2006-2017 ຫໍພິພິທະພັນປະຫວັດສາດກອງ ທັບປະຊາຊົນລາວ ໄດ້ເປີດບໍລິການຮັບແຂກເຂົ້າຊົມຫລາຍແສນຄົນ ເຊິ່ງມີທັງພະນັກງານ, ທະຫານ, ຕຳຫລວດ, ນັກ ຮຽນນັກສຶກສາ, ປະຊາຊົນ ແລະ ແຂກຕ່າງປະເທດ. ຫໍພິພິທະພັນດັ່ງກ່າວ ໄດ້ເປັນຈຸດຢ້ຽມຢາມ, ທ່ອງທ່ຽວ ຂອງນະຄອນ ຫລວງວຽງຈັນ ແລະ ເປັນບ່ອນສຶກສາຮໍ່າຮຽນປະຫວັດສາດ ມູນ ເຊື້ອການຕໍ່ສູ້ອັນພິລະອາດຫານ, ລະອິດລະອ້ຽວ ຕ້ານຈັກກະພັດຜູ້ຮຸກຮານຂອງກອງທັບ ແລະ ປະ ຊາຊົນລາວບັນ ດາເຜົ່າ. ໃນປີ 2018 ເນື່ອງຈາກຫລັງຄາຂອງຫໍພິພິທະພັນດັ່ງກ່າວ ເລີ່ມຮົ່ວຊຶມ ເຮັດໃຫ້ເພດານເສຍຫາຍ ແລະ ວັດຖຸວາງສະແດງກໍມີການປຽກຊຶມດ້ວຍອາຍນໍ້າໃນລະດູຝົນ ການບໍລິການໃຫ້ແຂກເຂົ້າຊົມກໍບໍ່ສາມາດດໍາເນີນໄດ້. ມາໃນປີ 2019 ໄດ້ເລີ່ມປັບປຸງຫລັງຄາ ແລະ ອາຄານຕຶກວາງ ສະແດງຄືນ ໂດຍການຊ່ວຍເຫລືອດ້ານທຶນຮອນຈາກ ກະຊວງປ້ອງກັນປະເທດ ສສ ຫວຽດນາມ ເຊິ່ງການກໍ່ສ້າງ ແລະ ປັບປຸງຫໍພິພິທະພັນຄັ້ງນີ້ ແບ່ງເປັນ 3 ໄລຍະ ລວມມູນຄ່າທັງໝົດ 4.631.755 ໂດລາສະຫະລັດ, ໄລຍະທຳອິດ ມີການດັດແກ້ຄວາມສູງຂອງຫລັງຄາ, ລະບົບຝາເຮືອນແມ່ນດັດແກ້ສ້າງເພີ່ມເປັນລະບົບແບບຝາສອງຊັ້ນ ເພື່ອກັນຄວາມຮ້ອນໃນອາຄານ, ໄດ້ເສີມຕື່ມເສົາກົມໃຫຍ່ອ້ອມຮອບ ດ້ານນອກຕື່ມອີກ 18 ເສົາ ແລະ ເສີມຕື່ມທໍ່ລະບາຍນໍ້າຝົນຈາກຫລັງຄາລົງດິນ ລວມມູນຄ່າການກໍ່ສ້າງ 1.575.000 ໂດລາສະຫະລັດ; ໄລຍະທີ 2 ກໍ່ສ້າງເຮືອນຮົ່ມໄວ້ວາງສະແດງເຮືອບິນ, ພາຫະນະຂົນສົ່ງທະຫານ, ປືນໃຫຍ່, ລົດຕັງ, ລູກບົ່ມ ແລະ ວັດຖຸເສິກອື່ນໆ. ນອກນັ້ນ, ຍັງມີລະບົບໄຟຟ້າເຍືອງ ອ້ອມຫໍພິພິທະພັນ, ລະບົບນໍ້າປະປາ, ກ້ອງວົງຈອນປິດ, ເຮືອນຂາຍເຄື່ອງທີ່ລະນຶກ, ປູເດີ່ນດ້ວຍເບຕົງເສີມເຫລັກ ແລະ ຫ້ອງນໍ້າສາທາລະນະອີກສອງຫລັງ ເປັນມູນຄ່າ 1.179.121 ໂດລາສະຫະລັດ ແລະ ສຳລັບໄລຍະທີ 3 ປັບປຸງ ສະເພາະການກໍ່ສ້າງຈັດວາງສະແດງຢູ່ພາຍໃນອາຄານ ເປັນມູນຄ່າ 1.877.634 ໂດລາສະຫະລັດ.
ພົອ ຈັນສະໝອນ ຈັນຍາລາດ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນ ປະເທດ ມີຄຳເຫັນວ່າ: ການກໍ່ສ້າງຫໍພິພິທະພັນຄັ້ງນີ້, ແນໃສ່ປັບປຸງຄືນລະບົບໂຄງຮ່າງວາງສະແດງ ແລະ ເນື້ອໃນດ້ານຕ່າງໆ, ສ້າງໃຫ້ເປັນສູນລວມປະຫວັດສາດ, ທ້ອນໂຮມວັດຖຸກໍາ, ຄຸ້ມຄອງ-ປົກປັກຮັກສາ ແລະ ຈັດວາງສະ ແດງປະຫວັດມູນເຊື້ອ, ຜົນງານໄຊຊະນະຂອງກອງທັບປະຊາຊົນລາວ ພາຍໃຕ້ການນໍາພາ-ຊີ້ນໍາ ຂອງພັກປະຊາຊົນ ປະຕິວັດລາວ ໃຫ້ມວນຊົນທຸກຊັ້ນຄົນ ທັງພາຍໃນ ແລະ ຕ່າງປະເທດ ໄດ້ເຂົ້າມາຄົ້ນ ຄວ້າ, ສຶກສາຮໍ່າຮຽນ ແລະ ຢ້ຽມຊົມດ້ວຍຄວາມປະທັບໃຈ ຄືບັນຍາກາດໄດ້ຮ່ວມເຄື່ອນໄຫວຊີວິດຕົວຈິງຢູ່ໃນເຫດການປະຫວັດສາດຕ່າງໆ.
ປັດຈຸບັນ, ກອງທັບປະຊາຊົນລາວ ໄດ້ເປັນກຳລັງຫລັກແຫລ່ງ ເຮັດໜ້າທີ່ປົກປັກຮັກສາເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງປະເທດຊາດ ໄວ້ໃຫ້ໝັ້ນຄົງ, ຮັບປະກັນສະຖຽນລະພາບທາງການເມືອງ, ຄວາມເປັນລະບຽບຮຽບຮ້ອຍ ແລະ ຄວາມສະຫງົບປອດໄພທາງສັງຄົມ, ປົກປັກຮັກສາລະບອບປະຊາທິປະໄຕປະຊາຊົນ, ປະຊາຊົນບັນດາເຜົ່າ ແລະ ວັດທະນະທຳອັນດີງາມຂອງຊາດ, ກອງທັບປະຊາຊົນລາວ ໄດ້ເຕີບໃຫຍ່ຂະຫຍາຍຕົວຂຶ້ນເປັນກ້າວໆ ທັງດ້ານກໍາລັງ ແລະ ການປະກອບຢູ່ໃນທົ່ວກໍາລັງຫລວງ-ກໍາລັງທ້ອງຖິ່ນ ແລະ ບັນດາເຫລົ່າຮົບ ກໍໄດ້ຮັບການສ້າງຕັ້ງຂຶ້ນເປັນແຕ່ລະໄລຍະ, ດ້ວຍເຫດນັ້ນ, ທາດແທ້, ມູນເຊື້ອທີ່ກ້າແກ່ນສະຫງ່າງາມ ແລະ ຜົນງານ, ໄຊຊະນະອັນໃຫ່ຍຫລວງ ແລະ ການເຕີບໃຫຍ່ຂະຫຍາຍຕົວຂອງກອງ ທັບປະຊາຊົນລາວ ນັບແຕ່ມື້ກຳເນີດຈົນເຖິງປັດຈຸບັນ ຖືກບັນທຶກໄວ້ໃນຫໍພິພິທະພັນປະຫວັດສາດກອງ ທັບແຫ່ງນີ້ ເພື່ອໃຫ້ອະນຸຊົນຄົນຮຸ່ນຫລັງໄດ້ສຶກສາຮຽນຮູ້ ແລະ ສືບທອດພາລະກຳອັນເລີດລ້ຳສືບຕໍ່ໄປ.