ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກົມສົ່ງເສີມການຄ້າ ແລະ ຫັດຖະກຳ ກະຊວງອຸດສາຫະກໍາ ແລະ ການຄ້າ ຈັດພິທີເປີດບໍລິການລະບົບການຄ້າ(ແພລັດຟອມ) ເອເລັກໂຕຣນິກ ສຳລັບຜະລິດຕະພັນກະສິກຳລາວ ໂດຍໄດ້ຮັບການຊ່ວຍເຫລືອລ້າຈາກ ລັດຖະບານ ສປ ຈີນ ໃຫ້ແກ່ລັດຖະບານ ສປປ ລາວ ໃນວັນທີ 13 ພຶດສະພາ 2024 ທີ່ ນະຄອນຫລວງວຽງຈັນ ໂດຍການເປັນປະທານຮ່ວມເປີດພິທີຂອງ ທ່ານ ມະໄລທອງ ກົມມະສິດ ລັດຖະມົນຕີ ກະຊວອຸດສາຫະກຳ ແລະ ການຄ້າ, ທ່ານ ຫວາງສ້າງ ອຸປະທູດຊົ່ວຄາວ ສະຖານເອກອັກຄະລັດຖະທູດ ແຫ່ງ ສປ ຈີນ ປະຈຳ ສປປ ລາວ, ມີຜູ້ຕາງໜ້າອົງການຈັດຕັ້ງ, ບໍລິສັດ ແລະ ພາກສ່ວຍກ່ຽວຂ້ອງເຂົ້າຮ່ວມ.
ທ່ານ ວິທູນ ສິດທິມໍລະດາ ຫົວໜ້າກົມສົ່ງເສີມການຄ້າ ແລະ ຫັດຖະກຳ ໄດ້ໃຫ້ຮູ້ກ່ຽວກັບຈຸດປະສົງການກໍ່ສ້າງລະບົບການຄ້າ ເອເລັກໂຕຣນິກ ສຳລັບຜະລິດຕະພັນກະສິກຳລາວ ວ່າ: ກົມສົ່ງເສີມການຄ້າ ແລະ ຫັດຖະກຳ, ກະຊວງອຸດສາຫະກໍາ ແລະ ການຄ້າ ໃນນາມຜູ້ຈັດຕັ້ງປະຕິບັດໂຄງການຊ່ວຍເຫລືອກໍ່ສ້າງລະບົບການຄ້າຜ່ານທາງເອເລັກໂຕຣນິກ ຫລື E-commerce ສໍາລັບຜະລິດຕະພັນກະສິກໍາລາວ ເຊິ່ງເປັນໜຶ່ງໃນໂຄງການທີ່ສຳຄັນ ທີ່ໄດ້ຮັບການຊ່ວຍເຫລືອຫລ້າຈາກ ລັດຖະບານ ແລະ ປະຊາຊົນ ສປ ຈີນ. ພາຍຫລັງໄດ້ເຊັນສັນຍາວ່າດ້ວຍ ການຊ່ວຍເຫລືອກໍ່ສ້າງໂຄງການ ໃນວັນທີ 19 ພະຈິກ 2020, ກະຊວງອຸດສາຫະກຳ ແລະ ການຄ້າ ໄດ້ແຕ່ງຕັ້ງຄະນະກໍາມະການປະເມີນວຽກງານ ການບໍລິການ E-commerce ແລະ ບຳລຸງຮັກສາ, ສະບັບເລກທີ 0172/ອຄ,ຈພງ, ລົງວັນທີ 4 ມີນາ 2021 ໂດຍໄດ້ເຮັດວຽກຄັດເລືອກເອົາ ບໍລິສັດທີ່ປຶກສາ EST Consulting ຈໍາກັດ ແລະ ບໍລິສັດດຳເນີນງານ ອາໂລ ເຕັກໂນໂລຊີ(ALO Technology) ຈໍາກັດ ທີ່ເປັນບໍລິສັດພັດທະນາລະບົບໄອຊີທີ ເຂົ້າຮ່ວມໃນຂະບວນການ ກໍ່ສ້າງລະບົບຮ່ວມກັບ ບໍລິສັດ ຈາກ ສປ ຈີນ ທີ່ໄດ້ຮັບມອບໝາຍ.
ກົມສົ່ງເສີມການຄ້າ ແລະ ຫັດຖະກໍາ ສືບຕໍ່ຮ່ວມມືກັບບໍລິສັດດໍາເນີນງານ ອາໂລ ເຕັກໂນໂລຊີ ເປັນຜູ້ດຳເນີນການບໍລິຫານ ແລະ ໃຫ້ບໍລິການ ເວັບໄຊທີ່ສ້າງຂື້ນ, ສ່ວນທາງ ບໍລິສັດ ອ່ານຫຸ່ຍອີ້ຊ່າງ ເຕັກໂນໂລຊີ ດີຈິຕອນ ແມ່ນປະກອບຊ່ຽວຊານປະຈຳການ ຕິດຕາມບຳລຸງຮັກສາລະບົບຊ່ວຍ ຈົນສິ້ນສຸດໂຄງການ.
ນອກນີ້, ການກໍ່ສ້າງລະບົບການຄ້າເອເລັກໂຕຣນິກສຳລັບສິນຄ້າກະສິກຳລາວ ກໍຄື ການສ້າງແພລັດຟອມ ທີ່ເປັນແຫລ່ງຂໍ້ມູນສິນຄ້າກະສິກຳລາວ ເປັນເວັບໄຊທີ່ຮັບໃຊ້ສາທາລະນະແລ້ວ, ຍັງເປັນການລິເລີ່ມສ້າງພື້ນຖານໂຄງລ່າງດ້ານເຕັກໂນໂລຊີຂໍ້ມູນຂ່າວສານ ແລະ ການສື່ສານ ໃນຂົງເຂດການຄ້າ ແລະ ບໍລິການ, ສ້າງຈຸດບໍລິການ E-commerce ໃນທົ່ວປະເທດ, ຝຶກອົບຮົມໃຫ້ພະນັກງານລັດ, ຜູ້ຜະລິດ ແລະ ຫົວໜ່ວຍທຸລະກິດທີ່ກ່ຽວຂ້ອງ, ສະໜັບສະໜູນດ້ານເຕັກນິກ ການບໍລິຫານລະບົບ E-commerce, ສ້າງຕັ້ງຮູບແບບການພັດທະນາໃຫ້ E-commerce ເຂົ້າເຖິງເຂດຊົນນະບົດເພື່ອສາມາດເຊື່ອມໂຍງ ດ້ານຂໍ້ມູນໃຫ້ເກີດໝາກຜົນ ບັນລຸໄດ້ການ ຊື້-ຂາຍ ອອນລາຍ ລະຫວ່າງຜູ້ຜະລິດ ແລະ ຜູ້ບໍລິໂພກ, ຊຸກຍູ້ການຜະລິດກະສິນກຳຂອງລາວ ໃຫ້ເປັນຜະລິດຕະພັນສົ່ງອອກໄປຕ່າງປະເທດ ຂະຫຍາຍຕົວກວ້າງຂວາງຂຶ້ນ ໂດຍຜ່ານ ແພລັດຟອມ ຢູ່ເທິງເວັບໄຊ ທີ່ມີຊື່ວ່າ www.laoproduct.com.la ທີ່ເປັນແພລັດຟອມພາຍໃນ ແລະ www.laoproduct.com.cn ທີ່ເປັນແພລັດຟອມຂ້າມແດນ.
ພ້ອມນີ້, ໄດ້ສຳເລັດການຕິດຕັ້ງປ້າຍຈຸດໜ່ວຍບໍລິການ ທັງໝົດ 20 ຈຸດ ລວມທັງຢູ່ໃນນະຄອນຫລວງວຽງຈັນ ແຂວງຈຳປາສັກ, ຄໍາມ່ວນ, ວຽງຈັນ, ຊຽງຂວາງ, ຫລວງພະບາງ, ອັດຕະປື, ຫລວງນໍ້າທາ ແລະ ແຂວງໄຊຍະບູລີ.
ຂ່າວ: ວຽງສະຫວັນ
ພາບ: ອ່າຍຄຳ
May be an image of 6 people and text