ສຳມະນາກອນທີ່ເປັນພະນັກງານຈາກກະຊວງການເງິນ, ທະນາຄານ ສປປ ລາວ ແລະ ມະຫາວິທະຍາໄລຂອງລາວ ທັງສູນກາງ ແລະ ທ້ອງຖິ່ນ ຈໍານວນ 45 ທ່ານ ເຂົ້າຮ່ວມຝຶກອົບຮົມ ການຄຸ້ມຄອງການເງິນສາທາລະນະ ສໍາລັບ ສປປ ລາວ ປະຈໍາປີ 2024 ເຊິ່ງໄຂຂຶ້ນໃນວັນທີ 30 ກໍລະກົດ ທີ່ຫ້ອງຈັດຝຶກອົບຮົມແນວລາວສ້າງຊາດ, ນະຄອນຫລວງວຽງຈັນ ເຊິ່ງໄດ້ຮັບການສະໜັບສະໜູນຈາກ ກະຊວງການຄ້າ ສປ ຈີນ ໂດຍການປະສານງານຂອງ ຫ້ອງການທີ່ປຶກສາເສດຖະກິດ-ການຄ້າ, ສະຖານທູດ ສປ ຈີນ ປະຈຳ ສປປ ລາວ ແລະ ຫ້ອງການຄະນະກຳມະການຮ່ວມມື ລາວ-ຈີນ ເປັນໜ່ວຍງານປະສານງານ, ມີວິທະຍາໄລເຕັກນິກວິຊາຊີບ ການຄ້າສາກົນ ແຂວງຫູນານ ເປັນຜູ້ຈັດຕັ້ງປະຕິບັດ ຫລື ຈັດຊຸດຝຶກອົບຮົມໃນຄັ້ງນີ້ ໂດຍການໃຫ້ກຽດເຂົ້າຮ່ວມພິທີເປີດຊຸດອົບຮົມຂອງ ທ່ານ ຄໍາແພງ ລັດມະນີ ຮອງຫົວຫນ້າຫ້ອງການ ຄະນະກໍາມະການຮ່ວມມື ລາວ-ຈີນ, ທ່ານ ເສົາ ຈ້ຽນຊິງ,ຮອງອໍານວຍການວິທະຍາໄລວິຊາຊີບການຄ້າຕ່າງປະເທດ ແຂວງຫູຫນານ, ສປ ຈີນ ພ້ອມດ້ວຍພາກສ່ວນທີ່ກ່ຽວຂ້ອງ.
ຈຸດປະສົງຂອງການຝຶກອົບຄັ້ງນີ້ ເພື່ອເປັນການຍາດແຍ່ງໂອກາດໃຫ້ພະນັກງານທີ່ກ່ຽວຂ້ອງຂອງຝ່າຍລາວ ໄດ້ມີໂອກາດຮຽນຮູ້ຄວາມຮູ້ອັນໃໝ່, ໂອກາດໃນການແລກປ່ຽນບົດຮຽນຈາກຊ່ຽວຊານ, ຄູອາຈານ ແລະ ວິທະຍາກອນ ທີ່ມີຄວາມຮູ້ຄວາມສາມາດຈາກ ສປ ຈີນ, ເຊິ່ງບົດຮຽນປະສົບການຂອງ ສປ ຈີນ ລ້ວນແຕ່ເປັນສິ່ງລໍ້າຄ່າທີ່ພະນັກງານບຸຄະລາກອນ ຢູ່ໃນຂົງເຂດວຽກການເງິນ-ການທະນາຄານຄວນຕ້ອງໄດ້ສຶກສາຮໍ່າຮຽນ ແລະ ທອດຖອນບົດຮຽນ ເພື່ອມາໝູນໃຊ້ໃນວຽກງານທີ່ຕົນຮັບຜິດຊອບ.
ໃນໂອກາດມີຄໍາເຫັນຕໍ່ພິທີເປີດຝຶກອົບຮົມໃນຄັ້ງນີ້ ທ່ານ ຄໍາແພງ ລັດມະນີ ຮອງຫົວຫນ້າຫ້ອງການ ຄະນະກໍາມະການຮ່ວມມື ລາວ-ຈີນ ໄດ້ສະແດງຄວາມເຊື່ອໝັ້ນວ່າ: ຜ່ານການຮຽນໃນຫ້ອງຮຽນ ແລະ ການແລກປ່ຽນບົດ ຮຽນຮ່ວມກັນຕົວຈິງ ຈະເຮັດໃຫ້ນັກສຳມະນາກອນໄດ້ຮຽນຮູ້ ແລະ ເຂົ້າໃຈຫຼາຍຂຶ້ນກ່ຽວກັບວຽກງານການຄຸ້ມຄອງດ້ານການເງິນ-ການທະນາຄານ ແລະ ຈະເປັນເງື່ອນໄຂອັນດີໃຫ້ແກ່ການສ້າງຄວາມຮັກແພງເຂົ້າໃຈເຊິ່ງກັນ ແລະກັນ ຂອງບັນດານັກສໍາມະນາກອນດ້ວຍກັນເອງ. ພ້ອມນີ້ ທ່ານໄດ້ສະແດງຄວາມຊົມເຊີຍ ຕໍ່ໜ່ວຍງານ ກະກຽມຂອງສອງຝ່າຍ ທີ່ໄດ້ມີການປະສານງານກັນຢ່າງໃກ້ຊິດ ເຮັດໃຫ້ສາມາດດໍາເນີນຊຸດຝຶກອົບຮົມນີ້ຕາມເປົ້າໝາຍທີ່ວ່າງໄວ້.
ສໍາລັບຊຸດຝຶກອົບຮົມຄັ້ງນີ້ ແມ່ນເປັນຊຸດຝຶກອົບທໍາອິດ ທີ່ໄດ້ຈັດຂຶ້ນຢູ່ລາວ ເຊິ່ງກະຊວງການຄ້າ ແຫ່ງ ສປ ຈີນ ກໄດ້ມອບໝາຍໃຫ້ ວິທະຍາໄລເຕັກນິກວິຊາຊີບການຄ້າສາກົນ ແຂວງຫູນານເປັນຜູ້ຈັດຕັ້ງປະຕິບັດ, ການຈັດຊຸດຝຶກອົບຈະດໍາເນີນຮອດວັນທີ 28 ສິງຫາ 2024, ລວມເວລາ 30 ວັນ. ພາຍໃຕ້ການປະສານງານຂອງສອງຝ່າຍ, ວິທະ ຍາໄລເຕັກນິກວິຊາຊີບ ການຄ້າສາກົນ ແຂວງຫູນານ ເປັນຜູ້ຈັດຕັ້ງປະປຕິບັດ, ໄດ້ມີການກະກຽມຫົວຂໍ້ວິຊາສະເພາະ ແລະ ເຊື້ອເຊີນຊ່ຽວຊານຄູອາຈານທີ່ມີປະສົບການສູງ ຈາກ ສປ ຈີນ ມາບັນລະຍາຍ ແລະ ແລກປ່ຽນບົດຮຽນນໍານັກສໍາມະນາກອນລາວ.
