ເປີດສູນອະນຸລັກ ແລະ ຂະຫຍາຍພັນຊ້າງອາຊີ ພູແຂນ

ພິທີເປີດແຫລ່ງທ່ອງທ່ຽວ ສູນອະນຸລັກຊ້າງ ແລະ ຂະຫຍາຍພັນຊ້າງ ພູແຂນ ບ້ານນາຕໍໃຫຍ່, ເມືອງໄຊຍະບູລີ, ແຂວງໄຊຍະບູລີ ຈັດຂຶ້ນໃນວັນທີ 11 ເມສາ 2024 ໂດຍການເຂົ້າຮ່ວມຂອງທ່ານ ພົງສະຫວັນ ສິດທະວົງ ເຈົ້າແຂວງໆໄຊຍະບູລີ.

ທ່ານ ບຸນດ່ວນ ໄຊດວງຕາ ທີ່ປຶກສາ ບໍລິສັດ ລົງທຶນພັດທະ ນາການທ່ອງທ່ຽວ ເຊໂນ-ລາວ ໄດ້ລາຍງານວ່າ: ສູນອະນຸລັກຊ້າງແຫ່ງນີ້ ໄດ້ກໍ່ສ້າງຂຶ້ນ ຢູ່ບ້ານນາຕໍໃຫຍ່, ເມືອງໄຊຍະບູລີ, ແຂວງໄຊຍະບູລີ ໃນເນື້ອທີ່ 137,8 ເຮັກຕາ, ເຊິ່ງໄດ້ລົງທຶນໃນເບື້ອງຕົ້ນ 17 ລ້ານໂດລາສະຫະລັດ ໃຊ້ເວລາກໍ່ສ້າງ 4 ປີ ໂດຍແບ່ງເປັນ 2 ໄລຍະຄື: ໄລຍະທີ 1 ໄດ້ກໍ່ສ້າງປະຕູໂຂງເຂົ້າຫາສູນອະນຸລັກຊ້າງ, ປູທາງເບຕົງພາຍໃນສູນ, ບຸກເບີກສະຖານທີ່ຈອດລົດ, ກໍ່ສ້າງຫໍພັກພະນັກງານຂອງບໍລິສັດ, ສ້າງຮ້ານອາຫານ, ຮ້ານຂາຍເຄື່ອງຂອງທີ່ລະນຶກ, ສ້າງເຮືອນຂຶ້ນຂີ່ຊ້າງ 2 ຫລັງ, ກໍ່ສ້າງບ່ອນນັ່ງຊົມຊ້າງອາບນ້ຳ, ໂຮງໝໍຊ້າງ, ຄອກຊ້າງ 25 ຄອກ, ຫໍພັກຄວານຊ້າງ 2 ຫລັງ, ໄດ້ຕິດຕັ້ງລະບົບໄຟຟ້າ, ນໍ້າປະປາຢູ່ພາຍໃນສູນ ແລະ ໄດ້ນໍາຊ້າງເຂົ້າມາອະນຸລັກ ຈໍານວນ 12 ເຊືອກ (ໂຕ) ໃນນີ້, ມີຊ້າງເພດຜູ້ 3 ເຊືອກ ແລະ ເພດແມ່ 9 ເຊືອກ.

ສຳລັບໄລຍະທີ 2, ບໍລິສັດຈະໄດ້ສືບຕໍ່ພັດທະນາສູນອະນຸລັກຊ້າງແຫ່ງນີ້ ໃຫ້ມີຫລາກຫລາຍກິດຈະກຳເພີ່ມຂຶ້ນຕື່ມ ເປັນຕົ້ນ ສືບຕໍ່ກໍ່ສ້າງໂຮງແຮມວິນລາໂຮມສະເຕ ຈຳນວນ 25 ຫລັງ ຢູ່ພາຍໃນສູນອະນຸລັກຊ້າງພູແຄນ ໃຫ້ນັກທ່ອງທ່ຽວໄດ້ພັກເຊົາ, ສ້າງທ່າເຮືອນ້ອຍແຄມນໍ້າຮຸ່ງ ຈຸດຮ້ານອາຫານສູນອະນຸລັກຊ້າງພູແຄນລ່ອງໄປຫາດອນກາງນ້ຳຮຸ່ງ ມີໄລຍະທາງ 1 ກິໂລແມັດ, ຄົ້ນຄວ້າຂຶ້ນແຜນຊື້ເຮືອສຳລານ 70 ບ່ອນນັ່ງ ເຂົ້າມາບໍລິການລ່ອງແຕ່ຫລວງພະບາງ ມາຫາໜ້າເຂື່ອນໄຟຟ້ານ້ຳຂອງເຂດບ້ານທ່າເດື່ອ ເມືອງໄຊຍະບູລີ, ຂຶ້ນແຜນຈັດຊື້ລົດຕູ້ ຮັບ-ສົ່ງນັກທ່ອງທ່ຽວ, ສືບຕໍ່ສ້າງເຮືອນຂີ່ຊ້າງເພີ່ມອີກໜຶ່ງຫລັງ ຢູ່ຈຸດແຄມນ້ຳຮຸ່ງເບື້ອງໃຕ້, ຂຶ້ນແຜນສ້າງບ່ອນລ້ຽງນົກຍຸງຢູ່ພາຍໃນສູນ ໃຫ້ນັກທ່ອງທ່ຽວໄດ້ຊົມ ແລະ ສືບຕໍ່ນຳເອົາຊ້າງເຂົ້າມາເພີ່ມຢູ່ສູນອະນຸລັກຊ້າງ ເພື່ອບໍລິການນັກທ່ອງທ່ຽວໃຫ້ມີຄວາມພຽງພໍ.

ໃນພິທີຜູ້ເຂົ້າຮ່ວມຍັງໄດ້ ຊົມການສະແດງສິລະປະວັນນະຄະດີ, ການສະແດງຂອງຊ້າງ, ໃຫ້ອາຫານຊ້າງ ແລະ ເບິ່ງຊ້າງຫລິ້ນນໍ້າ.

ຂ່າວ-ພາບ: ອຸ່ນເຮືອນ ໂພທິລັກ