ໃນຕອນບ່າຍວັນທີ 25 ມິຖຸນາ 2024 ພົຕ ຄໍາກິ່ງ ຜຸຍຫຼ້າມະນີວົງ, ຮອງລັດຖະມົນຕີ ກະຊວງປ້ອງກັນຄວາມສະຫງົບ ໄດ້ເປັນປະທານເປີດຫໍວາງສະແດງຕໍ່ຕ້ານຢາເສບຕິດ ຢູ່ດອນຊາວ ເຂດເສດຖະກິດພິເສດສາມຫຼ່ຽມຄໍາ ໂດຍມີທ່ານ ຮອງເຈົ້າແຂວງ ບໍ່ແກ້ວ, ຜູ້ຕາງໜ້າຈາກອົງການ UNODC ປະຈໍາ ສປປລາວ ມີຕາງໜ້າກະຊວງປ້ອງກັນປະເທດ, ກະຊວງການຕ່າງປະເທດ, ກະຊວງແຜນການແລະການລົງທຶນ, ຕ່າງໜ້າຈາກ ສະຖານທູດ 5 ປະເທດ ປະຈໍາ ສປປລາວ ແລະ ບັນດາເຈົ້າໜ້າທີ່ຈາກປະເທດສະມາຊິກລຸ່ມແມ່ນໍ້າຂອງ ຈໍານວນ 5 ປະເທດ ຄື: ສປ ຈີນ, ມຽນມາ, ລາວ, ກໍາປູເຈຍ ແລະ ສສ ຫວຽດນາມ ເຂົ້າຮ່ວມ.
ພົຕ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ກະຊວງປ້ອງກັນຄວາມສະຫງົບ ພ້ອມດ້ວຍ ຫົວໜ້າຄະນະຈາກບັນດາປະເທດລຸ່ມແມ່ນໍ້າຂອງ ໄດ້ຕັດແຖບຜ້າເປີດປ້າຍຢ່າງເປັນທາງການ ພ້ອມທັງທ່ຽວຊົມເບິ່ງຮູບພາບຕ່າງໆພາຍໃນຫໍ ທີ່ສະແດງໃຫ້ເຫັນຜົນຮ້າຍຂອງຢາເສບຕິດ. ຈຸດປະສົງໃນການເປີດຫໍວາງສະແດງຕໍ່ຕ້ານຢາເສບຕິດໃນຄັ້ງນີ້ ກໍເພື່ອໃຫ້ເຍົາວະຊົນ-ຊາວໜຸ່ມ, ນັກສຶກສາ ແລະ ບຸກຄົນທົ່ວໄປ ໄດ້ເຂົ້າມາສຶກສາເຖິງຜົນຮ້າຍຂອງຢາເສບຕິດ, ລວມເຖິງການຄວບຄຸມ ແລະ ສະກັ້ດກັ້ນຢາເສບຕິດແມ່ນຫນ້າທີ່ຮັບຜິດຂອງທຸກຄົນ.
ຫໍວາງສະແດງແຫ່ງນີ້ເປັນສະຖານທີ່ແຫ່ງທໍາອິດຂອງໂລກ ທີ່ຢູ່ໃນລາວ ພາຍໃຕ້ຫົວຂໍ້ “ ຕ້ານຢາເສບຕິດ ” ໂດຍສຸ່ມໃສ່ 3 ດ້ານຄື: ການປ້ອງກັນຢາເສບຕິດ, ການຕ້ານຢາເສບຕິດ ແລະ ປະຕິເສດຢາເສບຕິດ ດ້ວຍແນວຄິດການອອກແບບການເລົ່າເລື່ອງ, ການອອກແບບສະແດງເປັນລະຄອນ, ເຕັກນິກແບບຕອບໂຕ້ ເພື່ອໃຫ້ປະສົບການຫຼາຍດ້ານທີ່ຕື່ນເຕັ້ນມາສຶກສາ ແລະ ສ້າງຄວາມບັນເທີງໃນການສຶກສາຕ້ານຢາເສບຕິດ ທີ່ມີຫຼາກຫຼາຍສີສັນໃຫ້ແກ່ມວນຊົນ.
ເຂດເສດຖະກິດພິເສດ ສາມຫຼ່ຽມຄຳ ສະຖານທີ່ແຫ່ງນີ້ ເຄີຍເປັນສະຖານທີ່ປູກຝັງຝິ່ນມາເປັນເວລາຫຼາຍຮ້ອຍປີ, ໄດ້ດຶງດູດຄວາມສົນໃຈຂອງອົງການສະຫະປະຊາຊາດ. ໃນນັ້ນ, ລັດຖະບານລາວ ໄດ້ຊຸກຍູ້ການເພີ່ມທະວີການພົວພັນກັບຕ່າງປະເທດ ບົນພື້ນຖານການປະຕິບັດ “5 ຂໍ້ຫຼັກການ ” ແລະ ຮັດແໜ້ນການພົວພັນ ແລະ ການຮ່ວມມືລະຫວ່າງບັນດາປະເທດ, ພາກພື້ນ ແລະ ສາກົນໃນວຽກງານຕ້ານຢາເສບຕິດ. ເຖິງວ່າເຂດສາມຫຼ່ຽມຄຳ ຄ່ອຍໆເລີ່ມຫັນປ່ຽນຈາກຍຸກ “ຝິ່ນ” ມາເປັນຍຸກ “ດອກງິ້ວ”, ດ້ວຍການປູກພືດເສດຖະກິດທົດແທນການປູກຝິ່ນ, ແຕ່ບັນດາປັດໄຈທີ່ຫຼົງເຫຼືອຈາກປະຫວັດສາດ ຍັງເຕືອນໃຫ້ປະຊາຊົນຄວນເອົາໃຈໃສ່ຮຽນຮູ້ ທາງດ້ານການຕ້ານຢາເສບຕິດໃຫ້ຫຼາຍຂຶ້ນ.
