ເປີດແລ່ນລົດໄຟຂົນສົ່ງໂດຍສານ ລາວ-ໄທ

ພິທີເປີດແລ່ນລົດໄຟ ຂົນສົ່ງຜູ້ໂດຍສານ ລາວ-ໄທ ແຕ່ ນະຄອນຫລວງວຽງຈັນ (ສະຖານີຄໍາສະຫວາດ) ຫາ ບາງກອກ (ສະຖານີ ກຸງເທບອະພິວັດ) ຈັດຂຶ້ນໃນວັນທີ 20 ກໍລະກົດ 2024 ໂດຍມີ ທ່ານ ໄຊສົງຄາມ ມະໂນທັມ ຮອງລັດຖະມົນຕີ ກະຊວງ ໂຍທາທິການ ແລະ ຂົນສົ່ງ ແຫ່ງ ສປປ ລາວ, ທ່ານ ສຸລະພົງ ປີຍະໂຊດ ຮອງລັດຖະ ມົນຕີ ກະຊວງຄົມມະນາຄົມ ແຫ່ງ ຣາຊະອານາຈັກໄທ, ພ້ອມດ້ວຍ ຄະນະຜູ້ແທນ ຂອງສອງປະເທດເຂົ້າຮ່ວມ.

ໂອກາດນີ້, ທ່ານ ຫີນເພັດ ຫລ້າຄອນວົງ ຮອງຫົວໜ້າກົມທາງລົດໄຟ ກະຊວງໂຍທາທິການ ແລະ ຂົນສົ່ງ ລາຍງານໃຫ້ຮູ້ວ່າ: ພິທີເປີດແລ່ນລົດໄຟຂົນສົ່ງຜູ້ໂດຍສານ ລາວ-ໄທ ແຕ່ ນະຄອນ ຫລວງວຽງຈັນ (ສະຖານີຄໍາສະຫວາດ) ຫາ ບາງກອກ (ສະຖານີ ກຸງເທບອະພິວັດ) ແມ່ນໜຶ່ງໃນບັນດາໂຄງການຮ່ວມມື ຂອງສອງລັດຖະບານ ລາວ-ໄທ ໃນການສ້າງເງື່ອນໄຂອໍານວຍຄວາມ ສະດວກໃຫ້ແກ່ການສັນຈອນ ໄປ-ມາ ຫາສູ່ກັນຂອງປະຊາຊົນສອງຊາດ ລາວ-ໄທ ແລະ ການຂົນສົ່ງລະຫວ່າງປະເທດ ເພື່ອສົ່ງເສີມດ້ານການຄ້າ-ການລົງທຶນ ແລະ ທ່ອງທ່ຽວ ກໍຄື ການນໍາໃຊ້ທີ່ຕັ້ງຍຸດທະສາດສໍາຄັນຂອງສອງປະເທດ ຢູ່ອະນຸພາກພື້ນລຸ່ມແມ່ນໍ້າຂອງ ແລະ ອາຊີຕາເວັນອອກ-ສ່ຽງໃຕ້ ໃນການເຊື່ອມໂຍງ-ເຊື່ອມຈອດ ພື້ນຖານໂຄງລ່າງ ຕາມແລວເສດຖະກິດ ຕາເວັນ ອອກ-ຕາເວັນຕົກ, ເໜືອ-ໃຕ້ ເຊິ່ງຈະເປັນການອໍານວຍຄວາມສະ ດວກ ແລະ ສະໜັບສະໜູນ ການພັດທະນາການເຊື່ອມໂຍງການຂົນສົ່ງໃຫ້ໂລ່ງລ່ຽນ ລະຫວ່າງ ສອງປະເທດ ລາວ-ໄທ ກັບບັນດາປະເທດອະນຸພາກພື້ນ ໃຫ້ເກີດຜົນປະໂຫຍດສູງສຸດຮ່ວມກັນ.

ໂຄງການກໍ່ສ້າງເສັ້ນທາງລົດໄຟ ລາວ-ໄທ ທ່ານາແລ້ງ-ຄໍາສະຫວາດ ແມ່ນໄດ້ຮັບການສະໜັບສະໜູນຊ່ວຍເຫລືອທາງດ້ານງົບປະມານໃຫ້ແກ່ ສປປ ລາວ ຈາກລັດຖະບານໄທ ຜ່ານອົງການ NEDA ເຊິ່ງນອນໃນແຜນຍຸດທະສາດ ການພັດທະນາເສັ້ນທາງລົດໄຟ ເຊື່ອມຕໍ່ ລາວ-ໄທ ຂອງກະຊວງ ໂຍທາທິການ ແລະ ຂົນ ສົ່ງ, ເປັນການຊ່ວຍ ເຫລືອທີ່ມີຄວາມໝາຍສຳຄັນ ໃນການພັດ ທະນາໂຄງລ່າງພື້ນຖານ ຂອງ ສປປ ລາວ, ໂຄງການນີ້ແມ່ນໃຊ້ງົບປະມານທັງໝົດ 1.650 ລ້ານບາດ, ໃນນີ້ເປັນເງິນກູ້ 70% ແລະ ຊ່ວຍເຫລືອລ້າ 30%. ໂຄງການກໍ່ສ້າງເສັ້ນທາງລົດໄຟ ລາວ-ໄທ ໄລຍະ 2 ເຊິ່ງປະກອບມີການກໍ່ສ້າງສະຖານີວຽງຈັນ (ຄຳສະຫວາດ), ສະຖານີສິນຄ້າ ທ່ານາແລ້ງ ແລະ ການກໍ່ສ້າງລາງລົດໄຟ ແຕ່ສະຖານີທ່ານາແລ້ງ-ສະຖານີວຽງຈັນ (ຄຳສະຫວາດ), ລວງຍາວ 7,5 ກິໂລແມັດ ແລະ ໄດ້ສໍາເລັດ, ພ້ອມທັງເປີດນຳໃຊ້ສະຖານີດັ່ງກ່າວ, ໃນວັນທີ 30 ຕຸລາ 2023 ຜ່ານມາ.

ທ່ານ ຫີນເພັດ ຫລ້າຄອນວົງ ຍັງໄດ້ສະແດງຄວາມຂອບໃຈ ຕໍ່ລັດຖະບານ ແລະ ປະຊາຊາຊົນ ແຫ່ງ ຣາຊະອານາຈັກໄທ ກໍຄື ອົງການ NEDA ທີ່ໄດ້ສະໜອງທຶນກູ້ຢືມ ແລະ ຊວ່ຍເຫລືອລ້າ ໃນການກໍ່ສ້າງທາງລົດໄຟ ລາວ-ໄທ ແລະ ການສ້າງບຸກຄະລະກອນ ເພື່ອກຽມຄວາມພ້ອມໃນການຂົນສົ່ງ ແລະ ຂອບໃຈ ການລົດໄຟແຫ່ງປະເທດໄທ ທີ່ໄດ້ຊ່ວຍເຫລືອໃນການຝຶກອົບຮົມ, ກະກຽມຄວາມພ້ອມຂອງລະບົບລາງ ແລະ ເອົາຂະບວນລົດເຂົ້າມາແລ່ນຮັບໃຊ້ ຂົນສົ່ງຜູ້ໂດຍສານ ຢ່າງເປັນທາງການໃນຄັ້ງນີ້.

ສຳລັບ ລາຄາການຂົນສົ່ງຜູ້ໂດຍສານທາງລົດໄຟ ລາວ-ໄທ ໄດ້ກຳນົດລາຄາ ຄ່າໂດຍສານເບື້ອງຕົ້ນ ຂອງແຕ່ລະປະເພດບ່ອນນັ່ງ ຄື: ນະຄອນຫລວງວຽງຈັນ (ສະຖານີຄຳສະຫວາດ) ຫາ ໜອງຄາຍ ຕູ້ລົດໄຟແບບນັ່ງ ແລະ ນອນປັບອາກາດ ຊັ້ນສອງ ລາຄາ 80.000 ກີບ ຫລື 120 ບາດ; ຕູ້ລົດໄຟປະເພດພັດລົມ ຊັ້ນສາມ ລາຄາ 47.000 ກີບ ຫລື 70 ບາດ; ນະຄອນຫລວງວຽງຈັນ (ສະຖານີຄຳສະຫວາດ) ຫາ ອຸດອນທານີ ຕູ້ລົດໄຟແບບນັ່ງ ແລະ ນອນປັບອາກາດ ຊັ້ນສອງ ລາຄາ 133.500 ກີບ ຫລື 200 ບາດ; ຕູ້ລົດໄຟປະເພດພັດລົມ ຊັ້ນສາມ ລາຄາ 67.000 ກີບ ຫລື 100 ບາດ; ນະຄອນຫລວງວຽງຈັນ (ສະຖານີຄຳສະຫວາດ) ຫາ ກຸງເທບ (ບາງກອກ) ຕູ້ລົດໄຟແບບນັ່ງ ແລະ ນອນປັບອາກາດ ຊັ້ນສອງ ຕຽງເທິງ ລາຄາ 523.000 ກີບ ຫລື 784 ບາດ ແລະ ຕຽງລຸ່ມ ລາຄາ 583.000 ກີບ ຫລື 874 ບາດ; ຕູ້ລົດໄຟແບບນັ່ງປັບອາກາດ ຊັ້ນສອງ ລາຄາ 383.000 ກີບ ຫລື 574 ບາດ; ຕູ້ລົດໄຟປະເພດພັດລົມ ຊັ້ນສາມ ລາຄາ 187.500 ກີບ ຫລື 281 ບາດ.

ສ່ວນການກຳນົດລາຄາປີ້ໂດຍສານ ແມ່ນຈະກຳນົດລາຄາເປັນເງິນບາດ (ເນື່ອງຈາກວ່າຈະຕ້ອງໄດ້ນຳສົ່ງເງິນຂາຍປີ້ທັງໝົດໃຫ້ການລົດໄຟແຫ່ງປະເທດໄທ ເປັນເງິນບາດ), ແຕ່ຜູ້ໂດຍສານ ສາມາດຈ່າຍເປັນເງິນກີບໄດ້ ໂດຍອີງຕາມອັດຕາແລກປ່ຽນ ຂອງທະນາຄານ ໃນແຕ່ລະວັນ ເປັນເລກມົນ.

ຂ່າວ: ທະນູທອງ

ພາບ: ອ່າຍຄຳ