ກອງປະຊຸມເຜີຍແຜ່ກົດໝາຍ ວ່າດ້ວຍການສໍາຫຼວດວັດແທກ ແລະ ສ້າງແຜນທີ່ ໃຫ້ 08 ແຂວງພາກເໜືອ ໄດ້ຈັດຂຶ້ນໃນວັນທີ 06 ມິຖຸນາ 2022 ນີ້ ທີ່ ນະ ຄອນຫຼວງພະບາງ ແຂວງຫຼວງພະບາງ ພາຍໃຕ້ການເປັນປະທານຂອງ ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ, ມີຫົວໜ້າຫ້ອງການ, ຫົວໜ້າກົມ ກະຊວງພາຍໃນ ແລະ ມີບັນດາທ່ານຫົວໜ້າ-ຮອງຫົວໜ້າພະແນກພາຍໃນ, ຫົວໜ້າຂະແໜງ ຂົງເຂດວຽກງານພາຍໃນ ຈາກ 08 ແຂວງພາກ ເໜືອ ແລະ ມີຕາງໜ້າຈາກ ພະແນກການອ້ອມຂ້າງແຂວງຫຼວງພະບາງ ເຂົ້າຮ່ວມ.
ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ມີຄໍາເຫັນວ່າ: ກອງປະຊຸມເຜີຍແຜ່ກົດໝາຍວ່າດ້ວຍ ການສໍາຫຼວດວັດແທກ ແລະ ສ້າງແຜນທີ່ ມີຄວາມໝາຍຄວາມສໍາຄັນ ພວກເຮົາໄດ້ຮັບຟັງການເຜີຍແຜ່ເນື້ອໃນຂອງກົດໝາຍດັ່ງກ່າວ, ໄດ້ພ້ອມກັນຄົ້ນຄວ້າ, ປຶກສາຫາລື ກ່ຽວກັບສິດ ແລະ ໜ້າທີ່ຂອງພະ ແນກພາຍໃນແຂວງ, ຫ້ອງການພາຍໃນເມືອງ ແລະ ນະຄອນ ເພື່ອຜັນຂະຫຍາຍອອກມາເປັນບົດແນະນໍາໃນການຈັດຕັ້ງປະຕິບັດກົດໝາຍສະບັບນີ້ ແລະ ເປັນບ່ອນອີງອັນລະອຽດຈະແຈ້ງໃຫ້ແກ່ການຈັດຕັ້ງປະຕິບັດການຄຸ້ມຄອງ, ຕິດຕາມ, ກວດກາ ວຽກງານສໍາຫຼວດວັດແທກ ແລະ ສ້າງແຜນທີ່ ທີ່ຢູ່ໃນຄວາມຮັບ ຜິດຊອບ, ຂອບເຂດສິດ ແລະ ພາລະບົດບາດຂອງຂະແໜງພາຍໃນ.
ກົດໝາຍວ່າດ້ວຍ ການສໍາຫຼວດວັດແທກ ແລະ ສ້າງແຜນທີ່ ເປັນເຄື່ອງມືທີ່ສຳຄັນໃຫ້ແກ່ການຄຸ້ມຄອງການຈັດຕັ້ງປະຕິບັດ ແລະ ພັດທະນາວຽກງານການສໍາຫຼວດວັດແທກ ແລະ ສ້າງແຜນທີ່ ນັບແຕ່ຂັ້ນສູນກາງ ແລະ ທ້ອງຖິ່ນ ໃນການຄຸ້ມຄອງການເຄື່ອນໄຫວວຽກງານສຳຫຼວດວັດ ແທກ, ຖ່າຍພາບທາງອາກາດ ແລະ ສ້າງແຜນທີ່ ໃຫ້ຖືກຕ້ອງຕາມແນວທາງນະໂຍບາຍ ແລະ ນິຕິກຳຕ່າງໆຂອງລັດ ວາງອອກ, ສາມາດຄຸ້ມຄອງການເຄື່ອນ ໄຫວວຽກງານດັ່ງກ່າວ ຂອງບຸກຄົນ, ນິຕິບຸກຄົນ ແລະ ການຈັດຕັ້ງທັງພາຍໃນ ແລະ ຕ່າງປະເທດ ຢ່າງມີປະສິດທິຜົນ ເຮັດໃຫ້ການສ້າງ ແລະ ນຳໃຊ້ຂໍ້ມູນແຜນ ທີ່ ລວມສູນເປັນເອກະພາບໃນຂອບເຂດທົ່ວປະເທດ ໂດຍມີມາດ ຕະຖານເຕັກ ນິກດຽວກັນ, ມີຄວາມສະດວກໃນການຄຸ້ມຄອງ-ກວດກາ, ນຳໃຊ້ ແລະ ແລກ ປ່ຽນຂໍ້ມູນຮ່ວມກັນ, ສະດວກໃນການປັບປຸງ ແລະ ສະໜອງຂໍ້ມູນ. ສາມາດຫຼີກລ່ຽງໄດ້ການຈັດຕັ້ງປະຕິບັດວຽກງານສຳຫຼວດວັດແທກ, ຖ່າຍພາບທາງອາກາດ ແລະ ສ້າງແຜນທີ່ ທີ່ຊ້ຳຊ້ອນກັນ ຂອງຫຼາຍຂະແໜງການ ທັງເປັນການປະຢັດງົບປະມານຂອງລັດຖະບານ.
ກົດໝາຍວ່າດ້ວຍ ການສໍາຫຼວດວັດແທກ ແລະ ສ້າງແຜນທີ່ ໄດ້ກໍານົດລັກການ, ລະ ບຽບການ ແລະ ມາດຕະການ ໃນການຄຸ້ມຄອງ, ຕິດຕາມ, ກວດກາ ວຽກງານສໍາຫຼວດວັດແທກ ແລະ ສ້າງແຜນທີ່ ເພື່ອເຮັດໃຫ້ວຽກງານດັ່ງກ່າວ ມີປະສິດ ທິ ພາບ, ປະສິດທິຜົນ ແລະ ທັນສະໄໝ ແນໃສ່ເຮັດໃຫ້ການສໍາຫຼວດວັດແທກ ແລະ ການສ້າງແຜນທີ່ ດໍາເນີນໄປຢ່າງເປັນເອກະພາບ, ຖືກຕ້ອງ, ຊັດເຈນ, ສາມາດເຊື່ອມໂຍງກັບພາກພື້ນ ແລະ ສາກົນ ປະ ກອບສ່ວນເຂົ້າໃນວຽກງານປ້ອງກັນຊາດ- ປ້ອງກັນຄວາມສະຫງົບ, ຄຸ້ມຄອງຊັບພະ ຍາກອນທໍາມະຊາດ ແລະ ສິ່ງ ແວດລ້ອມ ແລະ ການພັດທະນາເສດ ຖະກິດ-ສັງຄົມຂອງຊາດ, ເຊິ່ງປະກອບມີ 10 ພາກ, 16 ໝວດ ແລະ 92 ມາດຕາ.
ກອງປະຊຸມຄັ້ງນີ້ ຜູ້ເຂົ້າຮ່ວມໄດ້ຮັບຟັງ ທ່ານ ນ ສີໄຄ ສໍສິລິບຸນມາ ຫົວໜ້າກົມແຜນທີ່ແຫ່ງຊາດ ເຜີຍແຜ່ກົດໝາຍວ່າດ້ວຍການສໍາຫຼວດວັດແທກ ແລະ ສ້າງແຜນທີ່, ຮັບຟັງ ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນ ເຜີຍແຜ່ຄໍາສັ່ງວ່າດ້ວຍການເພິ່ມທະວີຄວາມຮັບຜິດຊອບໃນການຄຸ້ມຄອງ ແລະ ແກ້ ໄຂວຽກງານເຂດແດນເຊື່ອມຕໍ່ທົ່ວປະ ເທດ ສະບັບເລກທີ 06/ນຍ ລົງວັນທີ 23 ມີນາ 2022 ແລະ ຜູ້ເຂົ້າຮ່ວມຍັງໄດ້ສົນທະນາ ແລະ ແລກປ່ຽນຄໍາຄິດເຫັນຮ່ວມກັນ ກ່ຽວກັບການແບ່ງຂອດ ແລະ ຂັ້ນຄຸ້ມຄອງ ລະຫວ່າງສູນກາງ ແລະ ທ້ອງຖິ່ນ ເພື່ອເຮັດໃຫ້ການຈັດຕັ້ງປະຕິ ບັດວຽກງານຕົວຈິງ ມີຄວາມສະດວກ ແລະ ເປັນເອກະພາບກັນ ໃນຂອບເຂດທົ່ວປະເທດ.
Loading...