ກອງປະຊຸມເຜີຍແຜ່ຄຳແນະນຳກ່ຽວກັບການປະເມີນການໂຄສະນາ ເຜີຍແຜ່ກົດໝາຍ ຂອງຂະແໜງຍຸຕິທຳ ຈັດຂຶ້ນໃນວັນ ທີ 23 ກໍລະກົດ 2024 ທີ່ຫ້ອງປະຊຸມໃຫຍ່ ຫ້ອງວ່າການປົກຄອງເມືອງວຽງຄຳ, ແຂວງວຽງຈັນ ໂດຍການເເປັນປະທານຂອງ ທ່ານ ບຸນທາ ຊົງເຢີທ່າວ ຮອງລັດຖະມົນຕີກະຊວງຍຸຕິທຳ.
ຈຸດປະສົງ ເພື່ອສ້າງຄວາມຮັບຮູ້, ເຂົ້າໃຈກ່ຽວກັບຈຸດປະສົງ, ຄາດໝາຍຂອງການປະເມີນຜົນການນໍາໃຊ້ແບບພິມປະເມີນ ແລະ ການນໍາຂໍ້ມູນເຂົ້າໃນລະບົບປະເມີນຜົນຄວາມຮັບຮູ້ດ້ານກົດໝາຍ ໃຫ້ແກ່ຄະນະຮັບຜິດຊອບປະເມີນການໂຄສະນາ ເຜີຍແຜ່ກົດ ໝາຍຂັ້ນແຂວງ ແລະ ຂັ້ນເມືອງ ເພື່ອນຳໄປຈັດຕັ້ງປະຕິບັດເຂົ້າໃນວຽກງານຕົວຈິງ ໃນທ້ອງຖິ່ນຕົນ ໃຫ້ມີປະສິດທິຜົນ ທັງຮັບປະກັນໄດ້ທາງດ້ານປະລິມານ ແລະ ຄຸນນະພາບ.
ກອງປະຊຸມຄັ້ງນີ້ ຜູ້ເຂົ້າຮ່ວມ ກໍໄດ້ຮັບຟັງການເຜີຍແຜ່ຄຳ ແນະນຳ ສະບັບເລກທີ 487/ກຍ, ລົງວັນທີ 10 ເມສາ 2024 ກ່ຽວກັບການປະເມີນການໂຄສະນາເຜີຍແຜ່ກົດໝາຍຂອງຂະແໜງຍຸຕິທໍາ; ແນະນໍາການນໍາໃຊ້ແບບພິມ ແລະ ວິທີການສຳພາດກຸ່ມເປົ້າໝາຍ; ແນະນຳແບບພິມສະຫຼຸບຜົນການປະເມີນ ແລະ ການນຳຂໍ້ມູນເຂົ້າໃນລະບົບປະເມີນຜົນຄວາມຮັບຮູ້ດ້ານກົດໝາຍ ພ້ອມທັງທົດລອງປ້ອນຂໍ້ມູນຕົວຈິງເຂົ້າໃນລະບົບ.
ຫຼັງຈາກນັ້ນ, ຄະນະຮັບຜິດຊອບປະເມີນການໂຄສະນາເຜີຍແຜ່ກົດໝາຍ ຂັ້ນສູນກາງ ກໍໄດ້ໂຄສະນາເຜີຍແຜ່ກົດໝາຍຈຳນວນໜຶ່ງ ພ້ອມທັງປະເມີນຄວາມຮັບຮູ້ກົດໝາຍຂອງພະນັກງານ-ລັດຖະກອນ, ທະຫານ, ຕຳຫຼວດ, ນັກທຸລະກິດ ແລະ ພົນລະເມືອງທີ່ຢູ່ແຂວງວຽງຈັນ; ສ່ວນຄະນະຮັບຜິດຊອບປະເມີນການໂຄສະນາເຜີຍແຜ່ກົດໝາຍຂັ້ນເມືອງ ໄດ້ສືບຕໍ່ໂຄສະນາເຜີຍແຜ່ກົດໝາຍ ແລະ ປະເມີນຄວາມຮັບຮູ້ກົດໝາຍຂອງພົນລະເມືອງທີ່ຢູ່ພາຍໃນເມືອງຂອງຕົນ.
